Read Shona Union Version 2002 2 Samueri 1 Bible Online

2 Samueri 1 - Shona Union Version 2002 bible

2 Samueri 1

¹Zvino Sauro wakati afa, Dhavhidhi akadzoka pakuuraya vaAmareki, Dhavhidhi akagara mazuva maviri paZikiragi;

²zvino nezuva retatu mumwe munhu wakasvika achibva kumisasa kuna Sauro, nguo dzake dzakabvaruka, uye ane ivhu pamusoro wake; akati achisvika kuna Dhavhidhi, akazviwisira pasi, akanamata kwaari.

³Dhavhidhi akati kwaari, “Wabvepiko?” Akati kwaari, “Ndapukunyuka ndichibva kumisasa yaIsiraeri.”

⁴Dhavhidhi akati kwaari, “Kwakaitweiko? Ndiudze hako.” Akapindura, akati, “Vanhu vatiza pakurwa, vanhu vazhinji vawira pasi vafa, uye Sauro nomwanakomana wake Jonatani vafawo.”

⁵Ipapo Dhavhidhi akati kujaya rakamuudza izvozvo, “Unoziva sei kuti Sauro naJonatani mwanakomana wake vafawo.”

⁶Jaya rikamuudza rikati, “Ndakanga ndichifamba hangu pagomo reGiribhoa, ndikaona Sauro achisendamira papfumo rake, ndikaonawo ngoro navatasvi vachimutevera kwazvo.

⁷Zvino iye wakati achicheuka, akandiona, akandidana. Ndikapindura ndikati, ‘Ndiri pano hangu.’

⁸Akati kwandiri, ‘Ndiwe aniko?’ Ndikamupindura ndikati, ‘Ndiri muAmareki.’

⁹Akati kwandiri, ‘Mira kuno kwandiri, undiuraye, nokuti ndabatwa nedzungu kwazvo, nokuti upenyu hwangu huchiri mandiri chose.’

¹⁰“Naizvozvo ndikamira kwaari, ndikamuuraya, nokuti ndakanga ndichiziva kwazvo kuti haangararami, kana achinge awira pasi; ndikatora korona yakanga iri pamusoro wake, norundarira rwaiva paruoko rwake, ndikauya nazvo pano kunashe wangu.”

¹¹Ipapo Dhavhidhi akabata nguo dzake, akadzibvarura, navarume vose vaiva naye vakaitawo saizvozvo.

¹²Vakachema, nokuungudza, nokuzvinyima zvokudya kusvikira madeko pamusoro paSauro naJonatani mwanakomana wake, napamusoro pavanhu vaJehovha, napamusoro peimba yaIsiraeri, nokuti vakanga vaurawa nomunondo.

¹³Dhavhidhi akati kujaya rakanga ramuudza izvozvo, “Uri wepiko?” Iye akapindura akati, “Ndiri mwanakomana womutorwa, muAmareki.”

¹⁴Dhavhidhi akati kwaari, “Hauna kutya neiko kutambanudza ruoko rwako kuti uparadze muzodzwa waJehovha?”

¹⁵Ipapo Dhavhidhi akadana rimwe jaya akati, “Swedera, umuuraye.” Iye akamubaya, akafa.

¹⁶Dhavhidhi akati kwaari, “Ropa rako ngarive pamusoro wako, nokuti muromo wako wakupupurira, zvawakati, ‘Ndakauraya muzodzwa waJehovha.’ ”

¹⁷Dhavhidhi akachema Sauro naJonatani mwanakomana wake nokuchema uku.

¹⁸Akavaraira kuti vadzidzise vana vaJudha rwiyo urwu rwokuchema; tarirai, rwakanyorwa mubhuku raJashari.

¹⁹“Haiwa Isiraeri! Kubwinya kwako kwaurawa pamatunhu ako akakwirira! Haiwa! Vane simba vakawira pasi sei!

²⁰Musazvireva paGati, Musazviparidza panzira dzeAshikeroni; Kuti vakunda vavaFirisitia varege kufara, Kuti vakunda vavasina kudzingiswa varege kupembera.

²¹“Imi makomo eGirobhoa, Ngakurege kuva nedova kana mvura pamusoro penyu, kana minda yezvipo; Nokuti ndipo pakangorashwa nhoo dzemhare, Nhoo yaSauro, seisina kuzodzwa mafuta.

²²Uta hwaJonatani hahuna kudzoka. Husina ropa ravakaurawa. Nomunondo waSauro hauna kudzoka usina mafuta aVane simba.

²³“Sauro naJonatani vakanga vakadikanwa, vakanaka, paupenyu hwavo; Napakufa kwavo havana kuparadzaniswa; Vaikurumidza kupfuura makondo, Vaiva nesimba kupfuura shumba.

²⁴“Imi vakunda vaIsiraeri, chemai Sauro, Iye waikufukidzai nomucheka mutsvuku wakanaka, Waiisa zvishongo zvendarama pazvisimiro zvenyu.

²⁵“Haiwa! Vane simba vakawira pasi sei pakurwa! Jonatani wakaurawa pamatunhu akakwirira.

²⁶“Ndinotambudzika kwazvo pamusoro pako, munun’una wangu Jonatani; Wakanga uchindifadza kwazvo; Rudo rwako kwandiri rwaishamisa, Rwaipfuura rudo rwavakadzi.

²⁷“Haiwa! Vane simba vakawira pasi sei! Nhumbi dzokurwa nadzo dzakaparadzwa sei!”