Read Shona Union Version 2002 2 Samueri 11 Bible Online

2 Samueri 11 - Shona Union Version 2002 bible

2 Samueri 11

¹Zvino gore rakati rapera, panguva yokurwa kwamadzimambo, Dhavhidhi akatuma Joabhu pamwechete navaranda vake navaIsiraeri vose; vakaparadza vana vaAmoni, vakakombawo Rabha. Asi Dhavhidhi wakasara Jerusaremu.

²Zvino nenguva yamadekwana, Dhavhidhi akamuka panhoo dzake, akafamba pamusoro pedenga reimba yamambo; akaona, aripo padenga, mukadzi wakanga achishamba; zvino mukadzi uyo wakanga akanaka kwazvo pakuonekwa kwake.

³Dhavhidhi akatuma munhu kundobvunza kuti mukadzi uyo ndianiko? Mumwe akati, “Ko haazi iye Bhatishebha mukunda waEriami, mukadzi waUriya muHiti here?”

⁴Dhavhidhi akatuma nhume kundomutora, akasvika kwaari, akavata naye (nokuti wakanga anatswa pakusanaka kwake;) iye akadzokera kumba kwake.

⁵Mukadzi akatora mimba, akatuma shoko kuna Dhavhidhi akamuudza akati, “Ndava nemimba.”

⁶Dhavhidhi akatuma shoko kuna Joabhu, akati, “Tuma Uriya muHiti, auye kwandiri.” Joabhu akatuma Uriya kuna Dhavhidhi.

⁷Zvino Uriya wakati achisvika kwaari, Dhavhidhi akamubvunza kuti, “Joabhu wakadini, navanhu vakadini, nokurwa kwakadini.”

⁸Zvino Dhavhidhi akati kuna Uriya, “Burukira kumba kwako, undoshambidza tsoka dzako.” Uriya akabva paimba yamambo, akatumirwa chipo chezvokudya namambo.

⁹Asi Uriya wakavata pamukova weimba yamambo pamwechete navaranda vose vatenzi wake, haana kuburukira kumba kwake.

¹⁰Zvino Dhavhidhi wakati achiudzwa kuti Uriya haana kuburukira kumba kwake, Dhavhidhi akati kuna Uriya, “Hauna kubva kurwendo here? Waregereiko kuburukira kumba kwako?”

¹¹Uriya akati kuna Dhavhidhi, “Areka, navaIsiraeri, navaJudha vagere mumatumba, nashe wangu Joabhu, navaranda vashe wangu vari mumatende avo kusango; zvino ini ndingapinda seiko mumba mangu ndidye ndinwe, ndivate nomukadzi wangu? Noupenyu hwenyu, uye noupenyu hwomweya wenyu, handingatongoiti chinhu ichi.”

¹²Dhavhidhi akati kuna Uriya, “Gara pano nanhasi, mangwana ndichakutendera kuenda.” Naizvozvo Uriya akagara Jerusaremu zuva iro neramangwana.

¹³Ipapo Dhavhidhi akamudana, akadya nokunwa pamberi pake, akamubatisa nedoro; zvino madeko akabuda akandovata panhoo dzake navaranda vashe wake, asi haana kuburukira kumba kwake.

¹⁴Zvino mangwana Dhavhidhi akanyorera Joabhu rugwaro, akarutuma noruoko rwaUriya.

¹⁵Akanyora parugwaro, akati, “Isa Uriya pamberi panonyanyisa kurwiwa, mumusiye ari oga, aurawe afe.”

¹⁶Zvino Joabhu wakati acherekedza guta, akaisa Uriya paakanga achiziva kuti varume voumhare varipo.

¹⁷Vanhu veguta vakabuda kuzorwa naJoabhu, vamwe varanda vaDhavhidhi vakaurawa, naiye Uriya muHiti akafawo.

¹⁸Ipapo Joabhu akatuma munhu kundoudza Dhavhidhi mashoko ose okurwa.

¹⁹Akaraira nhume, akati, “Kana wapedza kurondedzera kuna mambo mashoko ose okurwa,

²⁰kana kutsamwa kwamambo kukamuka, iye akati kwauri, ‘Makaswederereiko pedyo zvikuru neguta pakurwa kwenyu? Hamuna kuziva here kuti vachafura vari parusvingo?

²¹Ndianiko wakauraya Abhimereki mwanakomana waJeribhesheti? Wakanga asiri mukadzi wakakanda huyo pamusoro pake ari parusvingo, akafira paTebhezi here? Makaswederereiko pedyo zvikuru norusvingo?’ Ipapo iwe uti, ‘Muranda wenyu Uriya muHiti, wafawo.’ ”

²²Naizvozvo nhume yakaenda, ikasvika, ikaudza Dhavhidhi zvose zvayakanga yatumirwa naJoabhu.

²³Nhume ikati kuna Dhavhidhi, “Varume avo vakatikurira, vakabudira kwatiri kusango, tikavadzingirira kusvikira pavanopinda napo pasuo.

²⁴Vafuri vakafura varanda venyu vari parusvingo, vamwe varanda vamambo vakafa, naiye muranda wenyu Uriya muHiti wafawo.”

²⁵Ipapo Dhavhidhi akati kunhume, “Iti kuna Joabhu, ‘Izvi ngazvirege kukusuwisa, nokuti munondo unoparadza mumwe pano nomumwe kumwe; tsunga hako pakurwa neguta, uriputse; newe enda undomusimbisa.’ ”

²⁶Zvino mukadzi waUriya wakati anzwa kuti murume wake Uriya wafa, akachema murume wake.

²⁷Akati apedza kuchema, Dhavhidhi akatuma nhume kumutora, akamuisa mumba make, akava mukadzi wake, akamuberekera mwanakomana. Asi chinhu ichi, chakanga chaitwa naDhavhidhi, hachina kufadza Mwari.