Read Shona Union Version 2002 2 Samueri 13 Bible Online

2 Samueri 13 - Shona Union Version 2002 bible

2 Samueri 13

¹Zvino shure kwaizvozvo Abhusaromu mwanakomana waDhavhidhi wakanga ane hanzvadzi yakanaka, wainzi Tamari; Amoni mwanakomana waDhavhidhi akamuda.

²Amoni akatambudzika, akarwara pamusoro paTamari hanzvadzi yake; nokuti yakanga iri mhandara, Amoni akaona kuti haangamuiti chinhu.

³Asi Amoni wakanga ane shamwari, yainzi Jonadhabhu mwanakomana waShimei, mukoma waDhavhidhi; zvino Jonadhabhu wakanga ari munhu waiva namano.

⁴Iye akati kwaari, “Nhandi, mwanakomana wamambo, wakawondereiko kudai mazuva ose? Haungandiudzi here?” Amoni akati kwaari, “Ndinoda Tamari, hanzvadzi yomunun’una wangu Abhusaromu.”

⁵Jonadhabhu akati kwaari, “Vata panhoo dzako, uzviite somunhu unorwara; zvino kana baba vako vakasvika kuzokuona, uti kwavari, ‘Ndinokumbira kuti hanzvadzi yangu Tamari auye, andipe zvokudya, ndidye, agadzire zvokudya pamberi pangu, ndizviwone, ndizvidye pamaoko ake.’ ”

⁶Naizvozvo Amoni akavata pasi, akazviita somunhu unorwara; zvino mambo wakati achisvika kuzomuona, Amoni akati kuna mambo, “Ndinokumbira kuti Tamari, hanzvadzi yangu auye, andibikire zvingwa zviviri ndichizviona, kuti ndidye pamaoko ake.”

⁷Dhavhidhi akatuma shoko kumusha kuna Tamari, akati, “Enda zvino kumba kwaAmoni hanzvadzi yako, umugadzirire zvokudya.”

⁸Naizvozvo Tamari akaenda kumba kwehanzvadzi yake Amoni; iye akanga avete pasi. Akatora mukanyiwa, akaukanya, akaumba zvingwa achizviona, akabika zvingwa.

⁹Akatora gango, akazvidurura pamberi pake; asi iye wakaramba kudya. Amoni akati, “Vanhu vose ngavabude kwandiri.” Vanhu vose vakabuda kwaari.

¹⁰Amoni akati kuna Tamari, “Uya nezvokudya muimba yokuvata, kuti ndidye pamaoko ako.” Tamari akatora zvingwa zvaakanga abika, akauya nazvo mumba mokuvata maAmoni hanzvadzi yake.

¹¹Zvino wakati aswedera pedyo kwaari nazvo, iye akamubata, akati kwaari, “Uya uvate neni, hanzvadzi yangu.”

¹²Iye akamupindura akati, “Kwete, hanzvadzi yangu, usandichinya; nokuti chinhu chakadai hachifaniri kuitwa pakati pavaIsiraeri; usaita chinhu ichi chakaipa.

¹³Neni ndichaendepiko nokunyara kwangu? Kana uriwe, uchava sebenzi pakati paIsiraeri. Naizvozvo zvino, dotaura hako namambo; nokuti ivo havangandinyimi iwe.”

¹⁴Asi wakaramba kuteerera izwi rake, akaita simba naye, akamukurira, akavata naye.

¹⁵Ipapo Amoni akamuvenga nokuvenga kukuru kwazvo; nokuti kuvenga kwaakamuvenga nako, kwakapfuura rudo rwaaimuda narwo. Amoni akati kwaari, “Muka, uende.”

¹⁶Iye akati kwaari, “Kwete, nokuti chinhu ichi chokundidzinga chikuru kunechecho chawandiitira.” Asi wakaramba kumuteerera.

¹⁷Zvino akadana muranda wake wakanga achimubatira, akati, “Dzinga mukadzi uyu abve kwandiri, ukiye mukova kana abva.”

¹⁸Zvino iye wakanga ane nguo yakareba ina maoko, nokuti vakunda vamambo, vaiva mhandara, vaifuka nguo dzakadai. Muranda wake akamubudisa, akakiya mukova abva.

¹⁹Zvino Tamari akaisa madota pamusoro wake, akabvarura nguo yake yakareba ina maoko, akabata ruoko rwake pamusoro wake, akaenda achichema.

²⁰Abhusaromu hanzvadzi yake, akati kwaari, “Amoni hanzvadzi yako wakanga ari kwauri here? Chinyarara hako, hanzvadzi yangu; iye ihanzvadzi yako, usazvidya mwoyo nemhaka yechinhu ichi.” Naizvozvo Tamari akagara ari oga mumba maAbhusaromu hanzvadzi yake.

²¹Asi, mambo Dhavhidhi wakati achinzwa izvi zvose, akatsamwa kwazvo.

²²Asi Abhusaromu haana kutaura chinhu chakanaka kana chakaipa kuna Amoni; nokuti Abhusaromu wakavenga Amoni, nokuti wakanga achiva hanzvadzi yake Tamari.

²³Zvino makore maviri akati apfuura, Abhusaromu wakanga ana vaveuri vamakwai paBhaarihazori pedyo naEfuremu; Abhusaromu akakoka vana vose vamambo.

²⁴Abhusaromu akaenda kuna mambo, akati, “Tarirai zvino, muranda wenyu anavaveuri vamakwai; ndinokumbira kuti mambo navaranda vake vaende nomuranda wenyu.”

²⁵Mambo akati kuna Abhusaromu, “Kwete, mwana wangu, ngatirege kuenda isu tose, tirege kuzokutambudza.” Akamukurudzira, asi wakaramba kuenda, akamuropafadza hake.

²⁶Zvino Abhusaromu akati, “Kana musingadi henyu, ndinokumbira kuti mukoma wangu Amoni aende nesu.” Mambo akati kwaari, “Iye unofanira kuendireiko newe?”

²⁷Asi Abhusaromu akamukurudzira, akatendera Amoni navamwe vana vose vamambo kuenda naye.

²⁸Zvino Abhusaromu akaraira varanda vake akati, “Tarirai zvakanaka zvino, kana mwoyo waAmoni wofara newaini, ini ndikati kwamuri, ‘Urayai Amoni!’ Imi munofanira kumuuraya, musatya henyu; handizini ndakakurairai here? Tsungai, muve noumhare.”

²⁹Zvino varanda vaAbhusaromu vakaitira Amoni sezvavakanga varairwa naAbhusaromu. Ipapo vanakomana vose vamambo vakasimuka, mumwe nomumwe akakwira mbongoro yake vakatiza.

³⁰Zvino vakati vachiti munzira, shoko rikasvika kuna Dhavhidhi rokuti, “Abhusaromu wauraya vanakomana vose vamambo, hakuna wakasara kwavari kunyangwe nomumwe.”

³¹Ipapo mambo akasimuka, akabvarura nguo dzake, akavata pasi; navaranda vake vose vakamirapo nenguo dzakabvarurwa.

³²Asi Jonadhabhu, mwanakomana waShimei, mukoma waDhavhidhi, akapindura, akati, “Ishe wangu ngaarege kuti vauraya majaya ose, ivo vana vamambo; nokuti Amoni woga ndiye wafa, nokuti Abhusaromu wakavaraira izvozvo kubva pazuva raakachiva hanzvadzi yake Tamari.

³³Zvino ishe wangu mambo ngaarege kuzvidya mwoyo pamusoro pechinhu ichi, achiti vanakomana vose vamambo vafa, nokuti Amoni woga ndiye wafa.”

³⁴Asi Abhusaromu wakatiza. Zvino jaya rakanga rakarindira rakatarira, rikaona vanhu vazhinji vachiuya nenzira yegomo mushure make.

³⁵Jonadhabhu akati kuna mambo, “Tarirai, vana vamambo vasvika; zvaitika sezvakataura muranda wenyu.”

³⁶Wakati apedza kutaura, vana vamambo vakasvika, vakachema kwazvo; namambowo navaranda vake vose vakachemawo kwazvo.

³⁷Asi Abhusaromu wakatiza, akaenda kuna Tarimai mwanakomana waAmihuri mambo weGeshuri. Dhavhidhi akachema mwanakomana wake mazuva ose.

³⁸Naizvozvo Abhusaromu akatiza akaenda Geshuri, akagarapo makore matatu.

³⁹Mwoyo wamambo Dhavhidhi ukada kwazvo kuenda kuna Abhusaromu, nokuti wakanga anyaradzwa pamusoro paAmoni, achiti wafa hake.