Read Shona Union Version 2002 2 Samueri 17 Bible Online

2 Samueri 17 - Shona Union Version 2002 bible

2 Samueri 17

¹Zvino Ahitoferi wakati kuna Abhusaromu, “Nditenderei zvino nditsaure varume vane zviuru zvine gumi nezviviri, ndisimuke, nditeverere Dhavhidhi usiku hwuno;

²ndimuvambe akaneta, asine simba, ndimutyise, vanhu vose vaanavo vatize; ini ndichauraya mambo oga.

³Ipapo ndichadzosera vanhu vose kwamuri; kana mawana munhu mumwe wamunotsvaka, vanhu vose vachadzoka; naizvozvo vanhu vose vachava norugare.”

⁴Shoko iro rakafadza Abhusaromu navakuru vose vaIsiraeri.

⁵Ipapo Abhusaromu akati, “Danai Hushai muArikiwo, tinzwe zvaanotaura.”

⁶Hushai wakati asvika kuna Abhusaromu, Abhusaromu akataura naye akati, “Ahitoferi wataura zvokuti nezvokuti; zvino toita sezvaakataura here? Kana tisingafaniri kudaro, taura iwe.”

⁷Hushai akati kuna Abhusaromu, “Zano ramapiwa nguva ino naAhitoferi harina kunaka.”

⁸Hushai akawedzera, akati, “Munoziva baba venyu navanhu vavo, kuti vanhu voumhare, zvino vane shungu pamwoyo pavo, sebere ratorerwa vana varo kusango; baba venyu munhu wokurwa, havangavati navanhu.

⁹Tarirai, zvino vandovanda pabako, kana pamwe; zvino kana vamwe vakatanga kuurawa, ani naani unozvinzwa uchati, ‘Vanhu, vanotevera Abhusaromu, vourawa.’

¹⁰Ipapo kunyange munhu wemhare, ano mwoyo wakafanana noweshumba, uchawora mwoyo, nokuti vaIsiraeri vose vanoziva kuti baba venyu imhare, naivo vavanavo vanhu voumharewo.

¹¹Zvino zano rangu ndiro, kuti vaIsiraeri vose vaunganidzwe kwamuri, kubva paDhani kusvikira paBheerishebha, vawande sejecha riri pagungwa; nemiwo muende mumene kuhondo.

¹²Naizvozvo tichamuvamba paanenge achiwanikwa, tigomhara pamusoro pake somumharire weveta pasi; hatingasiyi kunyange mumwe wavo, kunyange ivo kunyange vanhu vavanavo.

¹³Uye, kana vakapinda muguta, vaIsiraeri vose vangauya namabote kuguta iro, tirikwevere murwizi, kusvikira pachishaikwa kunyange ibwe rimwe duku.”

¹⁴Ipapo Abhusaromu navarume vose vaIsiraeri vakati, “Zano raHushai muAriki rakanaka kukunda zano raAhitoferi.” Nokuti Jehovha wakanga atema kuti zano rakanaka raAhitoferi rikoneswe, kuti Jehovha apinze Abhusaromu panjodzi.

¹⁵Zvino Hushai akati kuna Zadhoki nokuna Abhiatari vapristi, “Ahitoferi wakapa Abhusaromu navakuru vaIsiraeri zano rokuti nerokuti, asi ini ndakavapa zano rokuti nerokuti.

¹⁶Naizvozvo zvino, tumai munhu pakarepo, audze Dhavhidhi, ati, ‘Regai kuvata usiku hwuno kumazambuko erenje, asi munofanira kuyambuka, kuti mambo arege kumedzwa navanhu vose vaanavo.’ ”

¹⁷Zvino Jonatani naAhimazi vakanga vari paEnirogeri; murandakadzi akaenda kundovaudza ivo vakandoudza mambo Dhavhidhi, nokuti havazaifanira kuonekwa vachipinda paguta.

¹⁸Asi mumwe mukomana wakavaona, akandoudza Abhusaromu; ivo vaviri vakakurumidza kuenda, vakasvika paimba yomumwe munhu paBhahurimu; iye wakanga ane tsime paruvazhe rwake, ivo vakaburukiramo.

¹⁹Mukadzi akatora chokufukidzira nacho, akachiwarira pamusoro pomuromo wetsime, akanika zviyo zvakaswiwa pamusoro pacho; hakune chinhu chakazozikanwa.

²⁰Zvino varanda vaAbhusaromu vakasvika kumukadzi kumba, vakati, “Ahimaazi naJonatani varipiko?” Mukadzi akati kwavari, “Vayambuka rukova.” Ivo vakavatsvaka, vakavashaiwa, vakadzokera Jerusaremu.

²¹Zvino vakati vabva, ivo vakabuda mutsime, vakandoudza mambo Dhavhidhi; vakati kuna Dhavhidhi, “Simukai, mukurumidze kuyambuka mvura, nokuti Ahitoferi wakapa zano rokuti nerokuti pamusoro penyu.”

²²Dhavhidhi akasimuka, navanhu vose vaakanga anavo, vakayambuka Jorodhani; kwakati kwoedza mangwanani, kwakanga kusino mumwe wavo wakanga achigere kuyambuka Jorodhani.

²³Zvino Ahitoferi wakati achiona kuti vakanga vasine hanya nezano rake, akaisa chityaro pamusoro pembongoro yake, akasimuka, akaenda kumba kwake kuguta rake, akaraira vose veimba yake, akazvisungirira, akafa, akavigwa muhwiro hwababa vake.

²⁴Zvino Dhavhidhi akasvika Mahanaimu. Abhusaromu akayambuka Jorodhani, iye navarume vose vaIsiraeri, vaakanga anavo.

²⁵Abhusaromu akagadza Amasa ave mutungamiriri wehondo panzvimbo yaJoabhu. Amasa wakanga ari mwanakomana womunhu wainzi Jitira muIsiraeri, wakanga apinda kuna Abhigairi, mukunda waNahashi, munun’una waZeruya, amai vaJoabhu.

²⁶VaIsiraeri naAbhusaromu vakadzika matende avo panyika yeGireadhi.

²⁷Zvino Dhavhidhi wakati achisvika paMahanaimu, Shobhi mwanakomana waNahashi weRabha, wavana vaAmoni, naMakiri mwanakomana waAmieri weRodhebhari, naBharizirai muGireadhi weRogerimi,

²⁸vakauya nenhoo, nehari, nemidziyo yevhu, nezviyo, nebhari, noupfu, nezviyo zvakakangwa, nenyimo, nenyemba, nezvakakangwa,

²⁹nouchi, namafuta, namakwai, namapundu omukaka, kuti Dhavhidhi navanhu vose vakanga anavo vadye; nokuti vakati, “Vanhu vane nzara, vaneta, vane nyota murenje.”