Read Shona Union Version 2002 2 Samueri 20 Bible Online

2 Samueri 20 - Shona Union Version 2002 bible

2 Samueri 20

¹Zvino kwakanga kuripo munhu wakaipa, wainzi Shebha, mwanakomana waBhikiri, muBhenjamini; iye akaridza hwamanda, akati, “Isu hatina mugove kuna Dhavhidhi, uye hatina nhaka kumwanakomana waJese; vaIsiraeri, mumwe nomumwe ngaaende kutende rake.”

²Naizvozvo varume vose vaIsiraeri vakarega kutevera Dhavhidhi, vakatevera Shebha mwanakomana waBhikiri; asi varume vaJudha vakanamatira mambo wavo, kubva paJorodhani kusvikira paJerusaremu.

³Dhavhidhi akasvika kumba kwake Jerusaremu, mambo akatora vakadzi vane gumi, ivo varongo vake vaakanga asiya kuti varinde imba, akavaisa panzvimbo pavangachengetwa, akavatumira zvokudya, asi haana kupinda kwavari. Naizvozvo vakapfigirwa kusvikira pazuva rokufa kwavo, vakagara sechirikadzi.

⁴Zvino mambo akati kuna Amasa, “Ndikokere varume vaJudha vaungane namazuva matatu; newe uve panowo.”

⁵Naizvozvo Amasa akaenda akakokera varume vaJudha, asi wakanonoka akadarika nguva yaakanga atarirwa naye.

⁶Dhavhidhi akati kuna Abhishai, “Zvino Shebha mwanakomana waBhikiri uchatitadzira kupfuura Abhusaromu. Tora varanda vashe wako, umuteverere, arege kuzviwanira maguta akakombwa namasvingo, akatipukunyukira.”

⁷Ipapo varume vaJoabhu, navaKereti navaPereti, navarume vose vemhare vakamutevera. Vakabuda Jerusaremu kuzoteverera Shebha mwanakomana waBhikiri.

⁸Vakati vachisvika pabwe guru raiva paGibheoni, Amasa akasangana navo. Zvino Joabhu wakanga akazvisunga nguo yake yokurwa nayo yaakanga afuka; iyo yakanga yakasungwa nebhanhire rakanga rino munondo wakasungirwa pachiuono chake, uri mumuhara mawo; zvino wakati achifamba, ukawira pasi.

⁹Joabhu akati kuna Amasa, “Wakadiniko, munun’una wangu?” Joabhu akabata ndebvu dzaAmasa noruoko rwake rworudyi, kuti amutsvoda.

¹⁰Asi Amasa haana kuchenjera munondo wakanga uri muruoko rwaJoabhu; naizvozvo akamubaya nawo nomudumbu, akatumburira ura hwake pasi, akasamubaya rwechipiri, akafirapo. Joabhu nomunun’una wake Abhishai vakateverera Shebha mwanakomana waBhikiri.

¹¹Zvino rimwe jaya raJoabhu rakanga rimirepo naye, rikati, “Ani nani unoda Joabhu, nouri kurutivi rwaDhavhidhi, ngaatevere Joabhu.”

¹²Asi Amasa wakanga achiumburuka muropa rake pakati penzira. Zvino murume uyu wakati achiona kuti vanhu vose vakaramba vamire, akabvisa Amasa panzira, akamutakurira kusango, akamufukidza nenguo, nokuti wakaona kuti vanhu vose, vakasvika kwaari, vakaramba vamire.

¹³Iye wakati abviswa panzira, vanhu vose vakatevera Joabhu, kuzoteverera Shebha mwanakomana waBhikiri.

¹⁴Akafamba namarudzi ose aIsiraeri kusvikira paAbheri, neBhetimaaka, navaBheri vose; vanhu vose vakaungana, vakamuteverawo.

¹⁵Vakandomukomba paAbheri reBhetimaaka, vakatutira gomo revhu paguta, rikaenzana norusvingo; vanhu vose vaiva naJoabhu vakarwa norusvingo kuti varuputse.

¹⁶Ipapo mumwe mukadzi, wakanga akachenjera, akadanidzira ari muguta, akati, “Inzwai, inzwai, doudzai Joabhu, muti, ‘Swedera pano, nditaure newe.’ ”

¹⁷Iye akaswedera kwaari. Mukadzi akati, “Ndiwe Joabhu here?” Iye akapindura akati, “Ndini.” Ipapo akati kwaari, “Inzwai mashoko omurandakadzi wenyu.” Iye akapindura akati, “Ndinonzwa.”

¹⁸Zvino akataura akati, “Kare vanhu vaiti, ‘Zvirokwazvo, vachabvunza mano paAbheri, mhosva ndokupererapo.’

¹⁹Ini ndiri mumwe wavanotsvaka rugare nowavakarurama pakati paIsiraeri, asi imi munotsvaka kuparadza guta, rakaita samai pakati paIsiraeri; munotsvakireiko kumedza nhaka yaJehovha?”

²⁰Joabhu akapindura akati, “Haisva, haisva, handingatongomedzi kana kuparadza;

²¹hazvizi izvo; asi munhu wenyika yamakomo yaEruremu, unonzi Shebha mwanakomana waBhikiri, ndiye wakasimudzira mambo Dhavhidhi ruoko rwake kuti arwe naye; mumuisei pano iye oga, ipapo ini ndichabva paguta.” Mukadzi akati kuna Joabhu, “Tarirai, musoro wake uchakandirwa kwamuri napamusoro porusvingo.”

²²Ipapo mukadzi akaenda kuvanhu vose nokuchenjera kwake. Ivo vakagura musoro waShebha mwanakomana waBhikiri, vakaukandira kuna Joabhu. Iye akaridza hwamanda, vanhu vakapararira vakabva paguta, mumwe nomumwe akaenda kutende rake. Joabhu akadzokera Jerusaremu kuna mambo.

²³Zvino Joabhu ndiye wairaira hondo yose yaIsiraeri, naBhenaya mwanakomana waJehoyadha ndiye wairaira vaKereti navaPereti;

²⁴Adhoaramu ndiye wairaira chibharo, naJehoshafati mwanakomana waAhirudhi waiva sahwira;

²⁵Sheva waiva munyori; naZadhoki naAbhiatari vaiva vapristi;

²⁶Ira muJairi waiva mupristiwo waDhavhidhi.