Read Shona Union Version 2002 2 Samueri 23 Bible Online

2 Samueri 23 - Shona Union Version 2002 bible

2 Samueri 23

¹Zvino ndiwo mashoko okupedzisira aDhavhidhi, Zvanzi naDhavhidhi mwanakomana waJese, Zvanzi nomunhu wakakudzwa kwazvo, Naiye muzodzwa waMwari waJakobho, Muimbi wezvakanaka waIsiraeri,

²“Mweya waJehovha wakataura mukati mangu, Shoko rake rakanga riri parurimi rwangu.

³Mwari waIsiraeri wakataura, dombo raIsiraeri rakataura neni, rikati, ‘Mumwe uchavapo, uchabata vanhu zvakarurama, Uchabata ushe achitya Mwari;

⁴Uchava sechiedza chamangwanani, kana zuva robuda, Samangwanani kana kusina makore. Kana bumhudza richibuda pavhu Kana mushana wobuda mvura yapera kunaya.’

⁵“Ko imba yangu haizakadaro kuna Mwari here? Nokuti wakaita neni sungano isingaperi, Yakanatswa pazvinhu zvose, yakasimba; Nokuti ndiko kuponeswa kwangu kwose, nokuda kwangu kwose, Ko haangazvikurisi here?

⁶Asi vose vasingadi Mwari vachafanana neminzwa inorashwa, Nokuti haigoni kubatwa namaoko;

⁷Asi munhu anoibata Anofanira kutora rutare norwiriko rwepfumo; Ipiswe kwazvo panzvimbo yayo nomoto.”

⁸Ndiwo mazita emhare dzaDhavhidhi: Joshebhibhashebheti muTakemoni, mukuru wavatariri; iye wakanga ari Adhino muEzini, wakauraya vanhu vana mazana masere nenguva imwe.

⁹Wakamutevera wakanga ari Ereazari mwanakomana waDhodhai, mwanakomana womuAhohi, mumwe wemhare nhatu dzakanga dzinaDhavhidhi, musi wavakavamba vaFirisitia vakanga vaungana kuzorwa, varume vaIsiraeri vabva;

¹⁰iye akasimuka, akabaya vaFirisitia kusvikira ruoko rwake rwaneta, ruoko rwake rukawomerera pamunondo wake; Jehovha akavakundisa kwazvo nomusi iwoyo, vanhu vakadzoka vachimutevera, kuzopamba kwoga.

¹¹Wakamutevera wakanga ari Shama mwanakomana waAgee, muHarari. VaFirisitia vakanga vaungana paRehi, pakanga pane bindu renyemba; vanhu vakatiza vaFirisitia.

¹²Asi iye wakamira pakati pebindu, akarirwira, akauraya vaFirisitia; Jehovha akavakundisa kwazvo.

¹³Zvino vatatu vavakuru vana makumi matatu vakaburuka, vakasvika kuna Dhavhidhi kubako reAdhuramu, nenguva yokukohwa; boka ravaFirisitia; rakanga radzika matende pamupata weRefaimu.

¹⁴Zvino nenguva iyo Dhavhidhi wakanga ari munhare, uye varwi vavaFirisitia vaiva paBheterehemu nenguva iyo.

¹⁵Dhavhidhi akapanga, akati, “Haiwa! Dai mumwe achindipa mvura yetsime reBheterehemu, riri pasuo, ndinwe!”

¹⁶Ipapo mhare idzo nhatu dzakapasanura napakati pehondo yavaFirisitia, vakandoteka mvura patsime reBheterehemu, riri pasuo, vakaitora vakauya nayo kuna Dhavhidhi; asi iye wakaramba kuinwa, akaidururira kuna Jehovha.

¹⁷Akati, “Haisva, Jehovha, handingaiti chinhu ichi! Ndinganwa ropa ravarume ava vakaenda vasingarangariri upenyu hwavo here?” Naizvozvo akaramba kuinwa. Ndizvo zvakaitwa nemhare idzo.

¹⁸Abhishai munun’una waJoabhu, mwanakomana waZeruya, wakanga ari mukuru wavatatu avo. Ndiye wakasimudza pfumo rake akarwa navanhu vana mazana matatu, akavauraya, akava nomukurumbira pakati pavatatu avo.

¹⁹Iye wakarumbidzwa zvikuru pakati pavatatu avo; naizvozvo akaitwa mukuru wavo, asi haana kuenzana navatatu vokutanga.

²⁰Bhenaya mwanakomana waJehoyadha, mwanakomana wemhare yeKabhizeeri, wakanga aita mabasa makuru, iye wakauraya vanakomana vaviri vaArieri waMoabhu, akandourayawo shumba mukati mehuzha panguva yechando;

²¹akaurayawo muIjipiti, murume wakanga akanaka, muIjipiti uyu wakanga akabata pfumo muruoko rwake, asi iye wakaburukira kwaari akabata tsvimbo, akabvuta pfumo muruoko rwomuIjipiti, akamuuraya nepfumo rake iro.

²²Zvinhu izvi zvakaitwa naBhenaya mwanakomana waJehoyadha, wakanga akakurumbira pakati pemhare idzo nhatu.

²³Iye wakanga achirumbidzwa kupfuura vana makumi matatu, asi haana kuenzana navatatu vokutanga. Dhavhidhi akamuita mutariri wavarindi vake.

²⁴Ashaheri munun’una waJoabhu wakanga ari mumwe wavana makumi matatu, naErihanani mwanakomana waDhodho weBheterehemu;

²⁵naShama muHarodhi, naErika muHarodhi;

²⁶naHerezi muPariti, naIra mwanakomana waIkeshe muTekoi;

²⁷naAbhiezeri muAnatoti, naMebhunai muHushati;

²⁸naZarimoni muAhohi, naMaharai muNetofati;

²⁹naHerebhu, mwanakomana waBhaana muNetofati, naItai mwanakomana waRibhai weGibhea wavana vaBhenjamini;

³⁰naBhenaya muPiratoni, naHidai wehova dzeGaashi;

³¹naAbhiaribhoni muAribhati, naAzimaveti muBharihumi;

³²naEriabha muShaaribhoni, naJonatani kuvana vaJasheni;

³³naShama muHarari, naAhiami mwanakomana waSharari muArari;

³⁴naErifereti mwanakomana waAhashabhai, mwanakomana womuMaakati, naEriami mwanakomana waAhitoferi muGironi;

³⁵naHezero muKarimeri, naParai muAribhi;

³⁶naIgari mwanakomana waNatani weZobha, naBhani muGadhi;

³⁷naZereki muAmoni, naNaharai muBheeroti, vaibata nhumbi dzokurwa nadzo dzaJoabhu mwanakomana waZeruya;

³⁸naIra muItiri, naGarebhi muItiri;

³⁹naUriya muHiti, vose makumi matatu navanomwe.