Read Shona Union Version 2002 2 Samueri 4 Bible Online

2 Samueri 4 - Shona Union Version 2002 bible

2 Samueri 4

¹Zvino Ishibhosheti mwanakomana waSauro, akati anzwa kuti Abhineri wakanga afa paHebhuroni, maoko ake akashaiwa simba, navaIsiraeri vose vakavhunduka.

²Zvino mwanakomana waSauro wakanga ana varume vaviri vakanga vari vakuru vamapoka; zita romumwe rakanga riri Bhaama, zita romumwe Rekabhu; vaiva vana vaRimoni muBheeroti, wavana vaBhenjamini; (nokuti Bheeroti rakanga richiverengerwawo kuna Bhenjamini;

³vaBheeroti vakatizira Gitaimu, vakava vatorwapo kusvikira nhasi).

⁴Zvino Jonatani mwanakomana waSauro, wakanga ano mwanakomana wakaremara pamakumbo ake. Iye wakanga ava namakore mashanu panguva yokusvika kweshoko rokuurawa kwaSauro naJonatani paJezereri, mureri wake akamusimudza akatiza naye; zvino wakati achikurumidza kutiza, mwana akawa, akaremara. Zita rake rakanga riri Mefibhosheti.

⁵Vana vaRimoni muBheeroti, vanaRekabhu naBhaana, vakaenda, vakasvika paimba yaIshibhosheti zuva richipisa, iye achizorora masikati.

⁶Vakapinda mukati meimba, vachiita sokuda kutora zviyo, vakamubaya nomudumbu; Rekabhu naBhaana ndokutiza.

⁷Nokuti vakanga vapinda mumba make mokuvata, vakamubaya, vakamuuraya, vakagura musoro wake, ndokutora musoro wake, vakaenda nenzira yeArabha usiku hwose.

⁸Vakaisa musoro waIshibhosheti kuna Dhavhidhi paHebhuroni, vakati kuna mambo, “Hoyo musoro waIshibhosheti mwanakomana waSauro muvengi wenyu, wakanga achitsvaka kukuurayai; Jehovha wakatsiva ishe wangu mambo nhasi pamusoro paSauro navana vake.”

⁹Dhavhidhi akapindura Rekabhu naBhaana munun’una wake, vana vaRimoni muBheeroti, akati kwavari, “NaJehovha mupenyu, wakadzikinura mweya wangu panjodzi dzose,

¹⁰musi wandakaudzwa nomumwe, achiti, ‘Tarirai, Sauro afa,’ achifunga kuti wauya neshoko rakanaka, ndakamubata, ndikamuuraya paZikiragi; ndiwo waiva mubayiro wandakamupa pamusoro peshoko rake.

¹¹Ndoda kana vanhu vakaipa vauraya munhu wakarurama hake mumba make, avete panhoo dzake, handingarevi ropa rake pamaoko enyu zvino, ndikakubvisai panyika here?”

¹²Ipapo Dhavhidhi akaraira majaya vakavauraya vakavagura maoko avo netsoka dzavo, vakavaturika kurutivi rwedziva paHebhuroni. Asi vakatora musoro waIshibhosheti, vakauviga muhwiro hwaAbhineri paHebhuroni.