Read Shona Union Version 2002 2 Samueri 5 Bible Online

2 Samueri 5 - Shona Union Version 2002 bible

2 Samueri 5

¹Zvino marudzi ose avaIsiraeri akauya kuna Dhavhidhi paHebhuroni, akataura akati, “Tarirai tiri mapfupa enyu nenyama yenyu.

²Kare Sauro achiri mambo wedu, ndimi maitungamirira vaIsiraeri muchibuda navo nokupinda navo; Jehovha akati kwamuri, ‘Iwe uchafudza vanhu vangu vaIsiraeri.’ ”

³Naizvozvo vakuru vose vaIsiraeri vakauya kuna mambo paHebhuroni, mambo Dhavhidhi akaita sungano paHebhuroni pamberi paJehovha; ivo vakazodza Dhavhidhi, kuti ave mambo waIsiraeri.

⁴Dhavhidhi wakanga ana makore makumi matatu pakutanga kwake kubata ushe, akabata ushe makore makumi mana.

⁵Akabata ushe paHebhuroni pavaJudha makore manomwe nemwedzi mitanhatu; akabatawo ushe paJerusaremu makore makumi matatu namatatu pavaIsiraeri navaJudha vose.

⁶Iye mambo navanhu vake vakaenda Jerusaremu kundorwa navaJebhusi vakanga vagere panyika iyo; ivo vakataura naDhavhidhi, vakati, “Haungapindi pano, mapofu nezvirema vangakudzinga, nokuti vakati, Dhavhidhi haangapindi pano.”

⁷Kunyange zvakadaro Dhavhidhi wakakunda nhare yeZioni; ndiro guta raDhavhidhi.

⁸Dhavhidhi akati nezuva iro, “Ani nani unoparadza vaJebhusi, ngaakwire kumugero wemvura, auraye zvirema namapofu, vanovengwa nomweya waDhavhidhi.” Naizvozvo vanoti, “Mapofu nezvirema havangapindi mumba.”

⁹Dhavhidhi akagara munhare, akaitumidza guta raDhavhidhi. Dhavhidhi akavaka kunhivi dzose, kubva paMiro, zvichipinda mukati.

¹⁰Dhavhidhi akaramba achikura, nokuti Jehovha, Mwari wehondo, wakanga anaye.

¹¹Hiramu mambo weTire akatuma nhume kuna Dhavhidhi namatanda emisidhari, navavezi, navavaki, vakavakira Dhavhidhi imba.

¹²Zvino Dhavhidhi akaziva kuti Jehovha wakanga amusimbisa kuti ave mambo waIsiraeri, uye kuti wakanga akudza ushe hwake nokuda kwavanhu vake Isiraeri.

¹³Dhavhidhi wakati abva Hebhuroni, akazvitorera vamwe varongo navakadzi paJerusaremu, Dhavhidhi akaberekerwa vanakomana navanasikana.

¹⁴Ndiwo mazita avakaberekerwa Jerusaremu: Shamua, naShobhabhu, naNatani, naSoromoni,

¹⁵naIbhari, naErishua, naNefegi, naJafia,

¹⁶naErishama, naEriadha, naErifereti.

¹⁷Zvino vaFirisitia vakati vachinzwa kuti Dhavhidhi wakanga azodzwa kuti ave mambo wavaIsiraeri, vaFirisitia vose vakakwira kundotsvaka Dhavhidhi; Dhavhidhi akazvinzwa, akaburukira kunhare.

¹⁸VaFirisitia vakanga vasvika, vakapararira pamupata weRefaimu.

¹⁹Dhavhidhi akabvunza Jehovha, akati, “Ndokwira kundorwa navaFirisitia here? Muchavaisa mumaoko angu here?” Jehovha akati kuna Dhavhidhi, “Kwira, nokuti zvirokwazvo ndichaisa vaFirisitia mumaoko ako.”

²⁰Dhavhidhi akasvika paBhaari‐perazimi, Dhavhidhi akavaparadzapo. Akati, “Jehovha wakapwanya vavengi vangu pamberi pangu, sokupwanya kwemvura.” Naizvozvo akatumidza nzvimbo iyo Bhaari‐perazimi.

²¹Vakasiya zvifananidzo zvavo ipapo, Dhavhidhi navanhu vake vakazvitora.

²²VaFirisitia vakauyazve, vakapararira pamupata weRefaimu.

²³Zvino Dhavhidhi wakati achibvunza Jehovha, iye akati, “Usakwira, asi upote shure kwavo, ugovavamba pakatarisana nemiti yemimaribheri.

²⁴Zvino kana uchinzwa kutinhira kwokufamba pangara dzemiti yemimaribheri, unofanira kukurumidza, nokuti ndiJehovha wakutungamirira kundoparadza hondo yavaFirisitia.”

²⁵Dhavhidhi akaita sezvaakarairwa naJehovha; akaparadza vaFirisitia kubva paGebha kusvikira paGezeri.