Read Shona Union Version 2002 1 Madzimambo 13 Bible Online

1 Madzimambo 13 - Shona Union Version 2002 bible

1 Madzimambo 13

¹Zvino tarira, mumwe munhu waMwari wakanga arairwa neshoko raJehovha, wakabva kwaJudha, akasvika Bheteri; Jerobhoamu wakanga amire paaritari achipisa zvinonhuwira.

²Iye akadanidzira kuaritari, neshoko raJehovha, akati, “Iwe aritari, aritari, zvanzi naJehovha, Tarirai, imba yaDhavhidhi ichaponerwa mwanakomana, uchanzi Josia; iye uchabaya pamusoro pako vapristi vamatunhu akakwirira, vanopisira zvinonhuwira pamusoro pako, uye vachapisa mapfupa avanhu pamusoro pako.”

³Akavapa chiratidzo nezuva iro, akati, “Ndicho chiratidzo chakataurwa naJehovha, Tarirai, aritari ichapamuka, namadota ari pamusoro payo acharashirwa pasi.”

⁴Zvino mambo wakati achinzwa shoko romunhu waMwari, raakadanidzira kuaritari paBheteri Jerobhoamu akasimudza ruoko rwake paaritari, akatendeka narwo, akati, “Mubatei!” Ipapo ruoko rwake rwaakanga amutendeka narwo rwakawoma, akasagona kurudzosazve.

⁵Aritariwo yakapamuka, namadota akarashirwa pasi paaritari, chiratidzo chakanga chapiwa nomunhu waMwari chikaitika, icho chakanga charairwa naJehovha.

⁶Ipapo mambo akapindura, akati kumunhu waMwari, “Kumbira hako kuna Jehovha Mwari wako andinzwire nyasha, undinyengeterere, kuti ndiporeserwezve ruoko rwangu.” Munhu waMwari akanyengetera kuna Jehovha, mambo akaporeserwazve ruoko rwake, rukaita sakare.

⁷Ipapo mambo akati kumunhu waMwari, “Enda neni kumba kwangu, uzvisimbisepo, ini ndikupewo mubayiro.”

⁸Asi munhu waMwari wakati kuna mambo, “Kunyange mukandiganhurira imba yenyu napakati, handingapindi kwamuri, kunyange kudya zvokudya, kana kunwa pano;

⁹nokuti Jehovha wakandiraira neshoko rake, akati, ‘Usadya zvokudya, kana kunwa mvura, kana kudzoka nenzira yawaenda nayo.’ ”

¹⁰Naizvozvo akadzoka neimwe nzira, haana kudzoka nenzira yaakanga aenda nayo Bheteri.

¹¹Zvino paBheteri pakanga pagere muporofita mutana; mwanakomana wake akandomuudza mabasa ose akaitwa nomunhu waMwari paBheteri pazuva iro; namashoko aakataura kuna mambo, naiwo vakaudzawo baba vavo.

¹²Ipapo baba vavo vakati kwavari, “Waenda nenzira ipiko?” Zvino vana vake vakanga vaona nzira yaendwa nayo nomunhu waMwari wokwaJudha.

¹³Akati kuvanakomana vake, “Ndisungirei chityaro pambongoro;” ivo vakamusungira chityaro pambongoro, akaitasva.

¹⁴Akatevera munhu waMwari, akamuwana agere pasi pomuti womuoki, ndokuti kwaari, “Ndiwe munhu waMwari wakabva kwaJudha here?” Akati, “Ndini.”

¹⁵Ipapo akati kwaari, “Hendei kumba kwangu, undodya zvokudya.”

¹⁶Iye akati, “Handingagoni kudzoka nemi kana kupinda kwamuri, handingadyi zvokudya, kana kunwa mvura nemi pano;

¹⁷nokuti ndakarairwa neshoko raJehovha, akati, ‘Usadya zvokudya, kana kunwa mvurapo kana kudzoka nenzira yawaenda nayo.’ ”

¹⁸Ipapo akati kwaari, “Neniwo ndiri muporofita sewe; zvino mutumwa wakandiudza shoko raJehovha, akati, ‘Dzoka naye kumba kwako, adye zvokudya nokunwa mvura.’ ” Akareva nhema kwaari.

¹⁹Naizvozvo akadzoka naye, akandodya zvokudya mumba make nokunwa mvura.

²⁰Zvino vakati vagere patafura, shoko raJehovha rikasvika kumuporofita wakamudzosa,

²¹akadanidzira kumunhu waMwari, wakanga abva kwaJudha, akati, “Zvanzi naJehovha, ‘Zvausina kuteerera muromo waJehovha, ukasachengeta murayiro wawakarairwa naJehovha Mwari wako,

²²ukadzoka, ukadya zvokudya, ukanwa mvura’ ipapo paakati kwauri, ‘Usadya zvokudya nokunwa mvura, naizvozvo chitunha chako hachingasviki muhwiro hwamadzibaba ako.’ ”

²³Zvino wakati adya zvokudya, nokunwa, akasungirira chityaro pambongoro, iye muporofita waakadzosa.

²⁴Zvino wakati aenda, shumba ikasangana naye munzira, ikamuuraya, chitunha chake chikakandirwa munzira, mbongoro ikamira nacho, uye shumbawo ikamira pachitunha.

²⁵Zvino wonei, vanhu vakapfuura napo, vakaona chitunha chakakandirwa munzira, uye shumba imire pachitunha; vakaenda, vakandozviudza vanhu muguta, makanga mugere muporofita mutana.

²⁶Zvino muporofita, wakamudzosa panzira, wakati achizvinzwa, akati, “Ndiye munhu waMwari usina kuteerera muromo waJehovha; naizvozvo Jehovha wakamukweverera pashumba, ikamubvambura, ikamuuraya, sezvakarehwa neshoko raJehovha raakataura kwaari.”

²⁷Akati kuvanakomana vake, “Ndisungirirei chityaro pambongoro,” vakaisungira chityaro.

²⁸Akaenda, akandowana chitunha chake chakakandirwa munzira, uye mbongoro neshumba zvimire pachitunha; shumba yakanga isina kudya chitunha kana kubvambura mbongoro.

²⁹Ipapo muporofita akasimudza chitunha chomunhu waMwari, akachiisa pamusoro pembongoro, akadzoka nacho; akasvika kuguta romuporofita mutana, akamuchema nokumuviga.

³⁰Akaisa chitunha chake muhwiro hwake; vakamuchema, achiti, “Haiwa, munun’una wangu!”

³¹Zvino wakati amuviga, akataura navanakomana vake, akati, “Kana ndafa, mundivige muhwiro makavigwa munhu waMwari; muise mapfupa angu kurutivi rwamapfupa ake;

³²nokuti izvo zvaakataura, paakadanidzira achirairwa naJehovha, kuaritari paBheteri, nokudzimba dzose dzamatunhu akakwirira, ari pamaguta eSamaria, zvichaitika zvirokwazvo.”

³³Pashure pechinhu ichi Jerobhoamu haana kutendeuka panzira yake yakaipa, asi wakatsaurazve vamwe pakati pavanhu vose, akavaita vapristi pamatunhu akakwirira; Ani naani waaida, waimugadza, akavaita vapristi pamatunhu akakwirira.

³⁴Chinhu ichi chikava chivi paimba yaJerobhoamu, kuti iparadzwe nokupedzwa panyika.