Read Shona Union Version 2002 1 Madzimambo 15 Bible Online

1 Madzimambo 15 - Shona Union Version 2002 bible

1 Madzimambo 15

¹Zvino negore regumi namasere ramambo Jerobhoamu mwanakomana waNebhati, Abhija wakatanga kubata ushe hwaJudha.

²Akabata ushe paJerusaremu makore matatu; zita ramai vake rakanga riri Maaka, mukunda waAbhusaromi.

³Iye akafamba pazvivi zvose zvababa vake, zvavakamutangira kuita; mwoyo wake wakanga usina kururama kwazvo kuna Jehovha Mwari wake, somwoyo waDhavhidhi baba vake.

⁴Kunyange zvakadaro nokuda kwaDhavhidhi, Jehovha Mwari wake akamupa mwenje paJerusaremu, akamumutsira mwanakomana wake shure kwake, asimbise Jerusaremu;

⁵nokuti Dhavhidhi waiita zvakarurama pamberi paJehovha, haana kutsauka pachinhu chimwe chaakamuraira mazuva ose oupenyu hwake, asi pamhaka yaUriya muHiti bedzi.

⁶Kurwa kwakanga kuripo pakati paRehobhoamu naJerobhoamu mazuva ose oupenyu hwake.

⁷Zvino mamwe mabasa aAbhija, nezvose zvaakaita hazvina kunyorwa here mubhuku ramakoronike amadzimambo aJudha? Kurwa kwakanga kuripo pakati paAbhija naJerobhoamu.

⁸Abhija akavata namadzibaba ake, vakamuviga muguta raDhavhidhi; Asa mwanakomana wake akamutevera paushe.

⁹Negore ramakumi maviri raJerobhoamu mambo waIsiraeri, Asa wakatanga kubata ushe paJudha.

¹⁰Akabata ushe paJerusaremu makore makumi mana nerimwe; zita ramai vake rakanga riri Maaka mukunda waAbhusaromi.

¹¹Asa akaita zvakarurama pamberi paJehovha, sezvakaita Dhavhidhi baba vake.

¹²Akabvisa vasodhomi panyika, akabvisawo zvifananidzo zvose zvakaitwa namadzibaba ake.

¹³Akabvisawo Maaka mai vake pauhosi hwavo, nokuti vakanga vaitira matanda okunamata nawo chifananidzo chinonyangadza; Asa akaparadza chifananidzo chavo, akachipisa parukova Kidhironi.

¹⁴Asi matunhu akakwirira haana kubviswa; kunyange zvakadaro mwoyo waAsa wakanga wakarurama kwazvo kuna Jehovha mazuva ake ose.

¹⁵Akaisa mumba maJehovha nhumbi dzakanga dzatsaurwa nababa vake, nenhumbi dzaakanga atsaura iye amene, sirivha, nendarama, nemidziyo.

¹⁶Zvino kurwa kwakanga kuripo pakati paAsa naBhaasha mambo waIsiraeri mazuva avo ose.

¹⁷Bhaasha mambo waIsiraeri akakwira kundorwa naJudha, akavaka Rama, kuti arege kutendera munhu kubuda kana kupinda kuna Asa mambo waJudha.

¹⁸Ipapo Asa akatora sirivha yose nendarama zvakanga zvasara papfuma yeimba yaJehovha, napapfuma yeimba yamambo, akazvipa mumaoko avaranda vake, mambo Asa akazvitumira kuna Bhenihadhadhi mwanakomana waTabhirimoni, mwanakomana waHezioni, mambo weSiria wakanga agere Dhamasiko, akati,

¹⁹“Sungano iripo pakati pangu nemi, pakati pababa vangu nababa venyu; tarirai ndinokutumirai chipo chesirivha nendarama, endai muputse sungano yenyu naBhaasha mambo waIsiraeri, abve kwandiri.”

²⁰Bhenihadhadhi akateerera mambo Asa, akatuma vakuru vehondo dzake kundorwa namaguta aIsiraeri, akakunda Ijoni, neDhani, neAbheribhetimaaka, neKineroti rose, nenyika yose yaNafitari.

²¹Zvino Bhaasha wakati achizvinzwa, akarega kuvaka Rama, akandogara Tiriza.

²²Ipapo mambo Asa akakoka vaJudha vose, hakuna wakadarikwa, vakandotora mabwe eRama, namatanda aro, zvaakanga achivaka nazvo iye Bhaasha; mambo Asa akavaka nazvo Ghebha rokwaBhenjamini neMizipa.

²³Zvino mamwe mabasa ose aAsa, nesimba rake rose, nezvose zvaakaita, namaguta aakavaka, hazvina kunyorwa here mubhuku yamakoronike amadzibaba aJudha? Asi panguva yokukwegura kwake wakanga achinzwa makumbo.

²⁴Asa akavata namadzibaba ake, akavigwa kunamadzibaba ake paguta raDhavhidhi baba vake; Josafati mwanakomana wake, akamutevera paushe.

²⁵Zvino Nadhabhi mwanakomana waJerobhoamu, wakatanga kubata ushe hwaIsiraeri negore rechipiri raAsa mambo waJudha, akabata ushe hwaIsiraeri makore maviri.

²⁶Akaita zvakaipa pamberi paJehovha, akafamba nenzira yababa vake, nomuzvivi zvake zvaakatadzisa Isiraeri nazvo.

²⁷Ipapo Bhaasha mwanakomana waAhija, weimba yaIsakari, akamumukira; Bhaasha akamuuraya paGibhetoni raiva ravaFirisitia; nokuti Nadhabhi navaIsiraeri vose vakanga vakomba Gibhetoni.

²⁸Bhaasha akamuuraya negore retatu raAsa mambo waJudha, akamutevera paushe.

²⁹Zvino wakati achangogara ushe, akauraya vose veimba yaJerobhoamu; haana kusiyira Jerobhoamu mumwe wakanga achafema, kusvikira amuparadza, sezvazvakarehwa naJehovha nomuromo womuranda wake Ahija muShiro;

³⁰nokuda kwezvivi zvaJerobhoamu, zvaakaita iye, nezvaakatadzisa Isiraeri nazvo, nokuda kwokutambudza kwaakatambudza Jehovha Mwari waIsiraeri nako.

³¹Zvino mamwe mabasa aNadhabhi, nezvose zvaakaita, hazvina kunyorwa here mubhuku yamakoronike amadzimambo aIsiraeri?

³²Kurwa kwakanga kuripo nguva dzose pakati paAsa naBhaasha mambo waIsiraeri.

³³Negore rechitatu raAsa mambo waJudha, Bhaasha mwanakomana waAhija, wakatanga kubata ushe hwavaIsiraeri vose paTiriza, akabata makore makumi maviri namana.

³⁴Akaita zvakaipa pamberi paJehovha, akafamba nenzira yaJerobhoamu, nomuzvivi zvake, zvaakatadzisa Isiraeri nazvo.