Read Shona Union Version 2002 1 Madzimambo 17 Bible Online

1 Madzimambo 17 - Shona Union Version 2002 bible

1 Madzimambo 17

¹Zvino Eria muTishibhi, waigara Gireadhi, wakati kuna Ahabhi, “NaJehovha mupenyu, Mwari waIsiraeri, iye wandimire pamberi pake, hapangavi nedova kana mvura makore ano, asi kana ndareva ini.”

²Zvino shoko raJehovha rikasvika kwaari, richiti,

³“Chibva pano, uende kurutivi rwamabvazuva, undovanda parukova Keriti, ruri pamberi paJorodhani.

⁴Unofanira kunwa mvura yorukova, uye ndakaraira makunguo kukupa zvokudya ipapo.”

⁵Naizvozvo akaenda, akaita sezvaakaudzwa naJehovha; wakandogara parukova Keriti ruri pamberi paJorodhani.

⁶Makunguo akamuvigira chingwa nenyama mangwanani, nechingwa nenyama madekwana; akanwa mvura yorukova.

⁷Zvino nguva yakati yapfuura rukova rukapwa, nokuti mvura yakanga isinganayi panyika.

⁸Zvino shoko raJehovha rikasvika kwaari, richiti,

⁹“Simuka, uende Zarefati panyika yeZidhoni, ugarepo; tarira, ndaraira chirikadzi igerepo, kuti ikupe zvokudya.”

¹⁰Naizvozvo akasimuka, akaenda Zarefati; wakati asvika pasuo reguta, akaona chirikadzi yakanga igerepo, ichiunganidza tutsotso; akamudana, akati, “Nditorerewo mvura shomanene mumukombe, ndinwe.”

¹¹Zvino wakati achienda kuzoitora, akamudana, akati, “Dondivigirawo chimedu chechingwa muruoko rwako.”

¹²Iye akati, “NaJehovha Mwari wenyu mupenyu, handina chingwa, asi tsama imwe youpfu mudende, namafuta mashomanene muchinu; tarirai, ndakanga ndichiunganidza tutsotso tuviri, ndichiti ndoenda ndizvigadzirire ini nomwanakomana wangu, tidye, tife hedu.”

¹³Ipapo Eria akati kwaari, “Usatya hako, enda undoita chingwa chiduku, undivigire icho, ugozviitira iwe nomwanakomana wako pashure.

¹⁴“Nokuti zvanzi naJehovha Mwari waIsiraeri, ‘Upfu huri mudende haungaperi, namafuta ari muchinu haangashaikwi, kusvikira pazuva Jehovha raachanaisa naro mvura panyika.’ ”

¹⁵Iye akaenda, akandoita sezvakataura Eria; iye mukadzi, naiye Eria, neimba yake, vakadya mazuva mazhinji.

¹⁶Upfu hwakanga huri mudende hauna kupera, namafuta akanga ari muchinu haana kushaikwa, sezvakanga zvarehwa naJehovha nomuromo waEria.

¹⁷Zvino pashure paizvozvo mwanakomana womukadzi, mwene weimba, akarwara; kurwara kwake kukanyanya kwazvo, kusvikira apererwa nomweya.

¹⁸Mukadzi akati kuna Eria, “Ndineiko nemi, imi munhu waMwari? Makapinda mumba mangu kuti zvivi zvangu zvirangarirwe, uye kuti mwanakomana wangu aurawe here?”

¹⁹Akati kwaari, “Ndipe mwanakomana wako.” Akamutora pachipfuva chomukadzi, akamutakurira kuimba yokumusoro, kwaaigara, akamuradzika panhoo yake,

²⁰akadanidzira kuna Jehovha, akati, “Jehovha Mwari wangu, makaitireiko chirikadzi yandigere nayo chakaipa chakadai, zvamauraya mwanakomana wake?”

²¹Akatsiyama pamusoro pomwana katatu, akadanidzira kuna Jehovha, akati, “Jehovha Mwari wangu, ndinokumbira, mweya womwana uyu ngaudzokerezve kwaari.”

²²Jehovha akanzwa izwi raEria, mweya womwana ukadzokerazve kwaari, akararamazve.

²³Ipapo Eria akatora mwana, akaburuka naye paimba yokumosoro, akamuisa mumba, akamupa mai vake. Eria akati, “Tarira, mwana wako mupenyu.”

²⁴Mukadzi akati kuna Eria, “Zvino ndinoziva kuti muri munhu waMwari, uye kuti shoko raJehovha, riri mumuromo menyu, nderazvokwadi.”