Read Shona Union Version 2002 1 Madzimambo 18 Bible Online

1 Madzimambo 18 - Shona Union Version 2002 bible

1 Madzimambo 18

¹Zvino mazuva mazhinji akati apfuura, shoko raJehovha rikasvika kuna Eria negore rechitatu, richiti, “Enda undozviratidza kuna Ahabhi; ndigotuma mvura panyika.”

²Ipapo Eria akandozviratidza kuna Ahabhi. Zvino nzara yakanga yanyanya kwazvo paSamaria.

³Ahabhi akadana Obhadhiya, iye wakanga ari mutariri weimba yake. (Zvino Obhadhiya wakanga achitya Jehovha kwazvo;

⁴nokuti nenguva iyo Izebheri yaakaparadza nayo navaporofita vaJehovha, Obhadhia wakatora vaporofita vane zana, akavavanza makumi mashanu namakumi mashanuzve mubako, akavapa chingwa nemvura.)

⁵Zvino Ahabhi akati kuna Obhadhiya, “Famba nenyika, kumatsime emvura, nokuhova dzose; zvimwe tingawana bundo, tiraramise mabhiza namahesera, tirege kurashikirwa nezvipfuwo zvose.”

⁶Naizvozvo vakagovana nyika, kuti vafambe nayo; Ahabhi akaenda ari oga kuno rumwe rutivi, Obhadhiya akaendawo ari oga kuno rumwe rutivi.

⁷Zvino Obhadhiya wakati ari panzira, Eria akasangana naye; akamuziva, akawira pasi nechiso chake, akati, “Ndimi here, ishe wangu Eria?”

⁸Iye akamupindura, akati, “Ndini; enda unoudza ishe wako, uti, ‘Tarirai, Eria ari pano.’ ”

⁹Iye akati, “Ndatadzeiko, zvamoda kuisa muranda wenyu mumaoko aAhabhi, andiuraye?

¹⁰NaJehovha Mwari wenyu mupenyu, hapano rudzi kana ushe kwaasina kutuma iye ishe wangu kukutsvakai; kana vakati, ‘Haapo pano, waipikisa ushe uhwo kana rudzi urwo, kuti havana kukuwanai.’

¹¹Zvino moti, ‘Enda undoudza ishe wako,’ uti, ‘Eria ari pano.’

¹²Zvimwe ndichangobva kwamuri, Mweya waJehovha ndokukuisai kwandisingazivi; zvino kana ndikandoudza Ahabhi, akakushayai, uchandiuraya; asi ini muranda wenyu ndinotya Jehovha kubva pauduku hwangu.

¹³Ishe wangu hamuna kuudzwa here zvandakaita panguva iya Izebheri yaakauraya nayo vaporofita vaJehovha kuti ndakavanza vaporofita vaJehovha, vane zana, makumi mashanu namakumi mashanu mubako, ndikavapa zvingwa nemvura?

¹⁴Zvino moti, ‘Chindoudza ishe wako,’ uti, ‘Eria ari pano.’ ” Iye uchandiuraya.

¹⁵Eria akati, “NaJehovha wehondo mupenyu, iye wandimire pamberi pake, ndichazviratidza kwaari nhasi zvirokwazvo.”

¹⁶Naizvozvo Obhadhiya akaenda kuna Ahabhi, akamuudza Ahabhi akandosangana naEria.

¹⁷Zvino Ahabhi wakati achiona Eria, Ahabhi akati kwaari, “Ndiwe here, iwe mutambudzi waIsiraeri?”

¹⁸Iye akati, “Ini handina kutambudza Isiraeri; asi ndiwe neimba yababa vako, nokuti makasiya mirairo yaJehovha, mukatevera vaBhaari.

¹⁹Naizvozvo zvino chituma vanhu uunganidze vaIsiraeri vose pagomo reKarimeri, navaporofita vaBhaari vana mazana mana vanodya patafura yaIzebheri.”

²⁰Naizvozvo Ahabhi akatuma vanhu kuvana vaIsiraeri vose, akaunganidza vaporofita pagomo reKarimeri.

²¹Zvino Eria akaswedera kuvanhu vose, akati, “Mucharamba muchifunga mifungo miviri kusvikira riniko? Kana Jehovha ari Mwari, mumutevere, kana ari Bhaari, mumutevere iye.” Asi vanhu havana kupindura shoko rimwe.

²²Ipapo Eria akati kuvanhu, “Ini, iyeni ndoga, ndini ndasara kuvaporofita vaJehovha, asi vaporofita vaBhaari vanosvika varume vana mazana mana namakumi mashanu.”

²³Naizvozvo ngavatipe nzombe mbiri, ivo vazvitsaurire nzombe imwe, vaiguranye, vaiise pamusoro pehuni, asi varege kuisa moto pasi payo; neniwo ndichagadzira imwe nzombe, ndichiisa pamusoro pehuni, asi ndisingaisi moto pasi payo.

²⁴Zvino imi mudane zita ramwari wenyu, ini ndidanewo zita raJehovha; Mwari unopindura nomoto, iye ngaave Mwari. Vanhu vose vakapindura, vakati, “Zvarehwa zvakanaka.”

²⁵Ipapo Eria akati kuvaporofita vaBhaari, “Chizvitsaurirai nzombe imwe, mutange kuigadzira, nokuti muri vazhinji; mudane zita ramwari wenyu, asi murege kuisa moto pasi payo.”

²⁶Ivo vakatora nzombe yavakanga vapiwa, vakaigadzira, vakadana zita raBhaari kubva mangwanani kusvikira masikati makuru, vachiti, “Bhaari, tinzwei!” Asi kwakanga kusine zwi kana unopindura. Vakapoteredza aritari yakanga yavakwa vachipembera.

²⁷Zvino panguva yamasikati makuru Eria akavaseka, akati, “Danidzirai kwazvo; nokuti mwari, zvimwe ari pakufunga, zvimwe waenda kumwe, zvimwe wafamba rwendo, kana zvimwe uvete hake, anofanira kumutswa.”

²⁸Ipapo vakadanidzira kwazvo, vakazvicheka netsika dzavo neminondo namapfumo, kusvikira ropa richidzutuka kwavari.

²⁹Masikati makuru akati apfuura, vakaporofita kusvikira panguva yokubayira chipo chamadekwana; asi kwakanga kusina zwi kana unopindura, kana wakanga achiteerera.

³⁰Ipapo Eria akati kuvanhu vose, “Swederai kwandiri;” vanhu vose vakaswedera kwaari. Zvino wakagadzira aritari yaJehovha yakanga yaputswa.

³¹Eria akatora mabwe ane gumi namaviri akaenzana namarudzi avana vaJakobho, iye, wakanga audzwa naJehovha, zvichinzi, “Zita rako richanzi Isiraeri.”

³²Akavaka aritari namabwe iwayo nezita raJehovha, akachera goronga rakakomba aritari rakanga rakaenzana napangadzvarwa zviyero zviviri zvezviyo.

³³Akaronga huni, akaguranya nzombe, akaiisa pamusoro pehuni, akati, “Chizadzai zvirongo zvina nemvura, muidire pamusoro pechipiriso chinopiswa, napamusoro pehuni.”

³⁴Akati, “Itai izvozvo rwechipiri,” vakazviita rwechipiri. Akati, “Itai izvozvo rwechitatu;” vakazviita rwechitatu.

³⁵Mvura ikayerera, ikapoteredza aritari; akazadza negorongawo nemvura.

³⁶Nenguva yokubayira chipo chamadekwana, muporofita Eria akaswedera, akati, “Imi Jehovha, Mwari waAbhurahamu, nowaIsaka, nowaIsiraeri, uye kuti ini ndiri muranda wenyu, uye kuti ndakaita izvi zvose ndarairwa nemi.

³⁷Ndinzwei Jehovha, ndinzwei, kuti vanhu ava vazive kuti imi Jehovha ndimi Mwari, uye kuti ndimi makadzosazve mwoyo yavo.”

³⁸Ipapo moto waJehovha wakaburuka, ukapedza chipiriso chinopiswa, nehuni, namabwe, neguruva, ukananzva mvura yakanga iri mugoronga.

³⁹Vanhu vose vakati vachizviona, vakawira pasi nezviso zvavo, vakati, “Jehovha ndiye Mwari, Jehovha ndiye Mwari!”

⁴⁰Eria akati kwavari, “Batai vaporofita vaBhaari, varege kupukunyuka kunyange nomumwe wavo.” Vakavabata. Eria akaburuka navo kurukova Kishoni, akavaurayirapo.

⁴¹Eria akati kuna Ahabhi, “Chirongedzai, mudye, munwe, nokuti kuno kuunga kwemvura zhinji.”

⁴²Naizvozvo Ahabhi akarongedza kundodya nokunwa. Eria akakwira pamusoro pegomo reKarimeri, akagwadamira pasi, akaisa chiso chake pakati pamabvi ake;

⁴³akati kumuranda wake, “Chikwira zvino, utarire kurutivi rwegungwa.” Akakwira akatarira, akati, “Hakuna chinhu.” Akati, “Endazve, kanomwe.”

⁴⁴Zvino panguva yechinomwe akati, “Tarirai, kune gore duku, rinokwira richibva mugungwa, rakafanana nechanza chomunhu.” Akati, “Enda, undoti kuna Ahabhi, ‘Sungai ngoro yenyu, muburuke, kuti murege kudzivirirwa nemvura.’ ”

⁴⁵Zvino nguva duku yakati yapfuura, denga rikasviba namakore nemhepo, mvura zhinji ikanaya. Ahabhi akaenda nengoro, akasvika Jezereri.

⁴⁶Ruoko rwaJehovha rukasimbisa Eria; akazvisunga chiwuno chake, akamhanya pamberi paAhabhi kusvikira pasuo reJezereri.