Read Shona Union Version 2002 1 Madzimambo 22 Bible Online

1 Madzimambo 22 - Shona Union Version 2002 bible

1 Madzimambo 22

¹Zvino vakagara makore matatu kusino kurwa pakati pavaSiria navaIsiraeri.

²Zvino negore rechitatu Jehoshafati mambo waJudha wakaburukira kuna mambo waIsiraeri.

³Ipapo mambo waIsiraeri akati kuvaranda vake, “Munoziva here kuti Ramotigireadhi nderedu? Asi isu tigere hedu tinyerere, tisingaritori kuna mambo weSiria.”

⁴Akati kuna Jehoshafati, “Uchaenda neni kundorwa neRamotigireadhi here?” Jehoshafati akati kuna mambo waIsiraeri, “Ini ndakaita sewe, navanhu vangu savanhu vako, namabhiza angu samabhiza ako.”

⁵Jehoshafati akati kuna mambo waIsiraeri, “Dombobvunza hako shoko raJehovha nhasi.”

⁶Zvino mambo waIsiraeri akaunganidza vaporofita, vanenge varume vaiva namazana mana, akati kwavari, “Ndiende kundorwa neRamotigireadhi here, kana ndirege?” Ivo vakati, “Endai, nokuti Ishe uchariisa mumaoko amambo.”

⁷Asi Jehoshafati akati, “Hakuchina mumwe muporofita waJehovha pano here, timubvunze?”

⁸Mambo waIsiraeri akati kuna Jehoshafati, “Mumwe murume uchiriko, Mikaya mwanakomana waImira, watingabvunza kuda kwaJehovha naye, asi ini ndinomuvenga, nokuti haaporofiti zvakanaka pamusoro pangu, asi zvakaipa.” Jehoshafati akati, “Mambo ngaarege kudaro.”

⁹Zvino mambo waIsiraeri akadana muranda, akati, “Kurumidza undotora Mikaya mwanakomana waImira.”

¹⁰Zvino mambo waIsiraeri naJehoshafati mambo waJudha vakanga vagere mumwe nomumwe pachigaro chake choushe, vakafuka nguo dzavo dzoushe padare pasuo reSamaria; vaporofita vose vakaporofita pamberi pavo.

¹¹Zedhekia mwanakomana waKenaani akazviitira nyanga dzamatare, akati, “Zvanzi naJehovha, ‘Nedzidzi muchatunga vaSiria, kusvikira vapera.’ ”

¹²Navamwe vaporofita vose vakaporofita saizvozvo, vakati, “Endai Ramotigireadhi, muchakunda, nokuti Jehovha uchariisa muruoko rwamambo.”

¹³Zvino nhume yakanga yandodana Mikaya yakataura kwaari, ikati, “Tarirai, mashoko avaporofita anobvumirana achitaura zvakanaka kuna mambo; zvino ndinokumbira kuti shoko renyu rive seshoko romumwe wavo, mutaurewo zvakanaka.”

¹⁴Ipapo Mikaya akati, “NaJehovha mupenyu, izvo zvinorehwa naJehovha kwandiri, ndizvo zvandichataura.”

¹⁵Zvino wakati achisvika kuna mambo, mambo akati kwaari, “Mikaya, tiende kundorwa neRamotigireadhi here, kana tirege?” Akapindura, akati, “Endai henyu, muchakunda, nokuti Jehovha uchariisa muruoko rwamambo.”

¹⁶Mambo akati kwaari, “Ndinofanira kukupikisa kangani here kuti undiudze zvokwadi yoga nezita raJehovha?”

¹⁷Iye akati, “Ndaona vaIsiraeri vose vakapararira pamakomo samakwai asina mufudzi, Jehovha akati, ‘Ava havana tenzi, mumwe nomumwe ngaadzokere kumusha kwake norugare.’ ”

¹⁸Mambo waIsiraeri akati kuna Jehoshafati, “Handina kukuudza here? Kuti haangaporofiti zvakanaka pamusoro pangu, asi zvakaipa?”

¹⁹Mikaya akati, “Zvino chinzwai shoko raJehovha, ‘Ndakaona Jehovha agere pachigaro chake choushe, nehondo dzose dzokudenga dzimire naye kurudyi rwake nokuruboshwe rwake.’ ”

²⁰Ipapo Jehovha akati, “Ndianiko uchandonyengera Ahabhi, aende, andourawa paRamotigireadhi?” Zvino mumwe akati zvokuti, nomumwezve akati zvokuti.

²¹Zvino mweya ukabuda, ukamira pamberi paJehovha, ukati, “Ini ndichandomunyengera.”

²²Jehovha akati kwauri, “Neiko?” Iwo ukati, “Ndichaenda, ndichava mweya wenhema mumiromo yavaporofita vake vose.” Iye akati, “Iwe ndiwe uchamunyengera, uchakundawo; enda hako, undoita saizvozvo.”

²³Naizvozvo zvino, tarirai Jehovha wakaisa mweya wenhema mumiromo yavaporofita venyu ava vose, asi Jehovha wakataura zvakaipa pamusoro penyu.

²⁴Ipapo Zedhekia mwanakomana waKenaani akaswedera, akarova Mikaya padama rake, akati, “Mweya waJehovha wakaenda nepiko uchibva kwandiri kundotaura newe?”

²⁵Mikaya akati, “Uchazviona musi uyo wauchandovanda mukamuri yomukati.”

²⁶Ipapo mambo waIsiraeri akati, “Batai Mikaya, mumuise kuna Amoni mubati weguta, nokuna Joashi mwanakomana wamambo,

²⁷muti, ‘Zvanzi namambo, pinzai munhu uyu mutorongo, mumupe zvokudya zvokutambudzika, nemvura yokutambudzika, kusvikira ndichidzoka norugare.’ ”

²⁸Ipapo Mikaya akati, “Kana mukadzoka norugare, Jehovha haana kutaura neni.” Akati, “Inzwai, imi vanhu, imi mose.”

²⁹Naizvozvo mambo waIsiraeri naJehoshafati mambo waJudha vakaenda Ramotigireadhi.

³⁰Zvino mambo waIsiraeri akati kuna Jehoshafati, “Ini ndichazvishandura, ndigondorwa; asi iwe chifuka nguo dzako dzoushe.” Mambo waIsiraeri akazvishandura, akandorwa.

³¹Zvino mambo weSiria wakanga araira vatariri vengoro dzake, vana makumi matatu navaviri, akati, “Regai kurwa navaduku kana navakuru, asi namambo waIsiraeri oga.”

³²Zvino vatariri vengoro vakati vachiona Jehoshafati, vakati, “Zvirokwazvo ndiye mambo waIsiraeri.” Vakatsaukira kundorwa naye; zvino Jehoshafati akaridza mhere.

³³Ipapo vatariri vengoro vakati vachiona kuti haazi mambo waIsiraeri, vakadzoka pakumutevera.

³⁴Zvino mumwe murume akahwembura uta hwake asingashumbi, hake, akafura mambo waIsiraeri pakati pezvisungo zvenguo dzake dzokurwa nadzo; ipapo mambo akati kumufambisi wengoro yake, “Dzoka, undiise kunze kwehondo, nokuti ndakuvadzwa kwazvo.”

³⁵Kurwa kukanyanya kwazvo nomusi uyo; mambo akatsigirwa mungoro yake pakurwa navaSiria, akafa madekwana; ropa rikabuda pavanga rikayerera mukati mengoro.

³⁶Zvino zuva rakati rovira mhere ikanzwika pahondo yose, ichiti, “Mumwe nomumwe ngaadzokere kuguta rake, mumwe nomumwe kunyika yake.”

³⁷Naizvozvo mambo akafa, akaiswa Samaria, vakaviga mambo paSamaria.

³⁸Vakasuka ngoro padziva reSamaria, imbwa dzikananzva ropa rake; (ndipo paishamba zvifeve); sezvakanga zvarehwa neshoko raJehovha.

³⁹Zvino mamwe mabasa aAhabhi, nezvose zvaakaita, neimba yenyanga dzenzou yaakavaka, namaguta ose aakavaka, hazvina kunyorwa here mubhuku yamakoronike amadzimambo aIsiraeri?

⁴⁰Naizvozvo Ahabhi akavata namadzibaba ake, Ahazia mwanakomana wake akamutevera paushe.

⁴¹Zvino Jehoshafati mwanakomana waAsa, wakatanga kubata ushe hwaJudha negore rechina raAhabhi mambo waIsiraeri.

⁴²Jehoshafati wakanga ava namakore makumi matatu namashanu pakutanga kwake kubata ushe; akabata makore makumi maviri namashanu paJerusaremu. Zita ramai vake rakanga riri Azubha, mukunda waShirihi.

⁴³Akafamba panzira dzose dzababa vake Asa; haana kutsauka padziri, asi wakaita zvakarurama pamberi paJehovha; kunyange zvakadaro matunhu akakwirira haana kubviswa, vanhu vakaramba vachingobayira nokupisira zvinonhuwira pamatunhu akakwirira.

⁴⁴Jehoshafati akayanana namambo waIsiraeri.

⁴⁵Zvino mamwe mabasa aJehoshafati, nesimba rakaonekwa kwaari, nokurwa kwake, hazvina kunyorwa here mubhuku yamakoronike amadzimambo aJudha?

⁴⁶Vasodhomiwo vakanga vasiyiwa pamazuva aAsa baba vake, akavabvisawo panyika.

⁴⁷Asi paEdhomu pakanga pasina mambo mumwe wakanga achibata panzvimbo yamambo.

⁴⁸Jehoshafati akavaka zvikepe zveTarishishi kuenda Ofiri kuzotora ndarama; asi hazvina kuenda, nokuti zvikepe zvakaputsika paEzionigebheri.

⁴⁹Zvino Ahazia mwanakomana waAhabhi akati kuna Jehoshafati, “Varanda vangu ngavaende navaranda vako nezvikepe.” Asi Jehoshafati wakaramba.

⁵⁰Jehoshafati akavata namadzibaba ake, akavigwa kuna madzibaba ake paguta raDhavhidhi baba vake, Jehorami mwanakomana wake akamutevera paushe.

⁵¹Ahazia mwanakomana waAhabhi, akatanga kubata ushe hwaIsiraeri paSamaria pagore regumi namanomwe raJehoshafati mambo waJudha, akabata ushe hwaIsiraeri makore maviri.

⁵²Akaita zvakaipa pamberi paJehovha, akafamba nenzira yababa vake, uye nenzira yamai vake, uye nenzira yaJerobhoamu mwanakomana waNebhati, wakatadzisa Isiraeri.

⁵³Nokuti wakashumira Bhaari, akanamata kwaari, akatsamwisa Jehovha Mwari waIsiraeri, sezvakaita baba vake pazvose.