Read Shona Union Version 2002 1 Madzimambo 4 Bible Online

1 Madzimambo 4 - Shona Union Version 2002 bible

1 Madzimambo 4

¹Zvino mambo Soromoni wakanga ari mambo wavaIsiraeri vose.

²Ndiwo machinda aiva nawo: Azaria mwanakomana waZadhoki waiva mupristi;

³Erihorefi naAhija, vanakomana vaShisha, vaiva vanyori; Jehoshafati mwanakomana waAhirudhi waiva sahwira.

⁴Bhenaya mwanakomana waJehoyadha, waiva mukuru wehondo, Zadhoki naAbhiatari vaiva vapristi;

⁵Azaria mwanakomana waNatani, waiva mukuru wavatariri; Zabhudhi mwanakomana waNatani waiva mupristi, shamwari yamambo.

⁶Abhishari waiva mutariri weimba; Adhoniramu mwanakomana waAbhidha, waiva mutariri wechibharo.

⁷Soromoni waiva navatariri vane gumi navaviri vairaira vaIsiraeri vose, vaitsvakira mambo neimba yake zvokudya; mumwe nomumwe waifanira kutsvaka zvokudya zvomwedzi mumwe gore rimwe nerimwe.

⁸Ndiwo mazita avo: Bhehuri, munyika yamakomo yaEfuremu;

⁹naBhenedhekeri paMakazi, napaSharibhimi, neBhetishemeshi, neEronibhetihananai;

¹⁰naBhenihesedhi paArubhoti; iye wakanga ane Shoko, nenyika yose yeHeferi;

¹¹naBheniabhinadhabhi panyika yose yeDhori; mukadzi wake wakanga ari Tafati, mukunda waSoromoni;

¹²naBhaana mwanakomana waAhirudhi, paTaanaki neMegidho, nenyika yose yeBhetisheani, iri parutivi rweZaretani, pazasi peJezereri, kubva paBhetisheani kusvikira paAbherimehora seri kweJokimeami;

¹³naBhenigebheri paRamotigireadhi; iye wakanga ane misha yaJairi, mwanakomana waManase, yaiva paGireadhi; iye wakanga ane nyika yeArigobhi, iri paBhashani, maguta makumi matanhatu aiva namasvingo namazariro endarira;

¹⁴naAhinadhabhi mwanakomana waIdho, paMahanaimi;

¹⁵naAhimaazi paNafitari; iye wakanga awanawo Bhasemati mukunda waSoromoni;

¹⁶naBhaana mwanakomana waHushai, paAsheri neBhearoti;

¹⁷naJosafati mwanakomana waParua, paIsakari;

¹⁸naShimei mwanakomana waEra, paBhenjamini;

¹⁹naGebheri mwanakomana waUri, waiva panyika yeGireadhi, nyika yaSihoni, mambo wavana vaAmori neyaOgi, mambo weBashani; iye wakanga ari mutariri mumwe woga panyika iyo.

²⁰VaJudha navaIsiraeri vakanga vari vazhinji, vakanga vakawanda sejecha pagungwa, vakadya, vakanwa, vakafara.

²¹Zvino Soromoni wakabata ushe hwose, kubva paRwizi kusvikira kunyika yavaFirisitia, nokusvikira kumuganhu weIjipiti; vanhu vakauya nezvipo, vakashumira Soromoni mazuva ose oupenyu hwake.

²²Zvokudya zvaSoromoni zvezuva rimwe zvaiva zviyero zvina makumi matatu zvoupfu hwakatsetseka nezviyero zvina makumi matanhatu zvoupfu;

²³nenzombe dzina makumi maviri dzokumafuro, namakwai ane zana, nenondo, nemhara, nemhembwe, neshiri dzakakodzwa.

²⁴Nokuti wakabata ushe panyika yose nechokuno kwoRwizi, kubva paTifisa kusvikira paGaza, namadzimambo ose aiva nechokuno kwoRwizi; akava norugare kunhivi dzose dzakanga dzakamupoteredza.

²⁵VaJudha navaIsiraeri vakanga vagere zvakanaka, mumwe nomumwe pasi pomudzambiringa wake napasi pomuwonde wake, kubva paDhani kusvikira paBheerishebha, mazuva ose aSoromoni.

²⁶Soromoni wakanga ane zvidyiro zvine zviuru zvina makumi mana zvamabhiza engoro dzake, navatasvi vane zviuru zvine gumi nezviviri.

²⁷Vatariri ava vaitsvakira mambo Soromoni zvokudya, navose vaidya patafura yamambo Soromoni, mumwe nomumwe nomwedzi wake; havana kushaisa chinhu chimwe.

²⁸Nebhari nouswa hwamabhiza namabhiza aimhanyisa vakauya nazvo panzvimbo yakafanira, mumwe nomumwe sezvaakanga arairwa.

²⁹Mwari akapa Soromoni kungwara nokunzwisisa kukuru, nomwoyo wakaziva zvakanaka, zvakafanana nejecha riri pamhenderekedzo yegungwa.

³⁰Kungwara kwaSoromoni kwakapfuura kungwara kwavana vamabvazuva, nokungwara kwose kwavaIjipiti.

³¹Nokuti wakapfuura vanhu vose nokungwara; wakakunda Etani muEzirahi, naHemani, naKarikori, naDharidha, vana vaMahori; mukurumbira wake ukasvika kundudzi dzose dzakanga dzakavapoteredza.

³²Wakataurawo shumo dzine zviuru zvitatu, uye nziyo dzake dzakasvika chiuru chimwe neshanu.

³³Akataura zvemiti, kubva pamisidhari iri paRebhanoni kusvikira pamuhisopi unomera parusvingo; akataurawo zvemhuka, neshiri, nezvinokambaira, nehove.

³⁴Vanhu vamarudzi ose vakauya kuzonzwa kungwara kwaSoromoni, vakabva kumadzimambo ose enyika, vakanga vanzwa zvokungwara kwake.