Read Shona Union Version 2002 2 Madzimambo 10 Bible Online

2 Madzimambo 10 - Shona Union Version 2002 bible

2 Madzimambo 10

¹Zvino Ahabhi wakanga ana vanakomana vana makumi manomwe paSamaria. Jehu akanyora nwadhi, akadzitumira Samaria kuvabati veJezereri, ivo vakuru, nokuvareri vavana vaAhabhi, akati,

²“Zvino kana nwadhi iyi ichisvika kwamuri, vanakomana vatenzi wangu zvavariko kwamuri, nengoro namabhiza zviriko kwamuri, neguta rakakombwa norusvingo, nenhumbi dzokurwa nadzo;

³chizvitsaurirai mwanakomana watenzi wenyu wakaisvonaka wakakwana kukunda vamwe, mumugadze pachigaro choushe chababa vake, murwire imba yatenzi wenyu.”

⁴Asi ivo vakanga vachitya kwazvo, vakati, “Madzimambo maviri akanga asingagoni kumukunda, zvino isu tichamukunda seiko?”

⁵Zvino mutariri weimba nomutariri weguta, navakuru, navareri vavana vakatuma shoko kuna Jehu, vachiti, “Tiri varanda venyu, tichaita zvose zvamunotiraira; hatingagadzi mumwe mambo; itai henyu sezvamunoda.”

⁶Ipapo wakanyora nwadhi rwechipiri kwavari, akati, “Kana mukanzwana neni, kana mukaterera izwi rangu, uyai kwandiri Jezereri mangwana nenguva ino nemisoro yavarume, ivo vanakomana vatenzi wenyu.” Zvino vanakomana vamambo, ivo vanhu vana makumi manomwe, vaiva kuvakuru veguta, vaivarera.

⁷Zvino nwadhi iyo yakati ichisvika kwavari, vakabata vanakomana vamambo, vakavauraya, ivo vanhu vana makumi manomwe, vakaisa misoro yavo mumatengu, ndokuitumira kwaari Jezereri.

⁸Nhume ikasvika, ikamuudza, ikati, “Vauya nemisoro yavanakomana vamambo.” Iye akati, “Itai mirwi miviri nayo, muiise pavanopinda napo pasuo, kusvikira mangwana.”

⁹Fume mangwana akabuda, akandomirapo, akati kuvanhu vose, “Imi hamune mhosva henyu; tarirai, ndini ndamukira tenzi wangu, ndikamuuraya; asi ndianiko auraya ava vose?

¹⁰Zvino muzive kuti hakuna shoko rimwe raJehovha richawira pasi, rakataurwa naJehovha pamusoro peimba yaAhabhi; nokuti Jehovha wakaita zvaakataura nomuranda wake Eria.”

¹¹Naizvozvo Jehu akauraya vose vakanga vasara veimba yaAhabhi paJezereri, navanhu vake vakuru vose, neshamwari dzake, navapristi vake, kusvikira asina kumusiyira nomumwe.

¹²Zvino akasimuka, akabva, akaenda Samaria. Wakati asvika paimba yavafudzi panzira, pavaiveura makwai,

¹³Jehu akasangana navanun'una vaAhazi mambo waJudha, akati, “Ndimi aniko?” Ivo vakapindura, vakati, “Tiri vanun'una vaAhazia, toburuka kundokwazisa vana vamambo navana vavahosi.”

¹⁴Iye akati, “Vabatei vari vapenyu.” Vakavabata vari vapenyu, vakavauraya padziva reimba pavaiveura makwai, varume vaiva vana makumi mana navaviri; haana kusiya mumwe wavo.

¹⁵Zvino wakati abvapo, akasangana naJehonadhabhi mwanakomana waRekabhu, wanga achiuya kuzosangana naye; akamukwazisa, akati kwaari, “Mwoyo wako wakarurama here, sokururama kwomwoyo wangu kwauri?” Jehonadhabhi akapindura, akati, “Wakarurama hawo. Kana zvakadaro, ndibate ruoko rwangu.” Iye akabata ruoko rwake, ndokumukwidza mungoro maakanga ari.

¹⁶Akati, “Hendei, undoona kushingaira kwandinoshingairira Jehovha nako.” Naizvozvo vakamufambisa mungoro yake.

¹⁷Wakati asvika Samaria, akauraya vose vakanga vasara vaAhabhi muSamaria, kusvikira amuparadza, neshoko raJehovha rakanga rarehwa naEria.

¹⁸Ipapo Jehu akaunganidza vanhu vose, akati kwavari, “Ahabhi wakashumira Bhaari zvishoma, asi Jehu uchamushumira kwazvo.

¹⁹Naizvozvo zvino chidanai vaporofita vose vaBhaari, navose vanonamata kwaari, navapristi vake vose, vauye kwandiri; ngakurege kushaikwa kunyange nomumwe; nokuti ndinoda kubayira Bhaari chibayiro chikuru; Ani naani unoshaikwa haangararami.” Asi Jehu wakaita izvozvo namano, achida kuuraya vanamati vaBhaari.

²⁰Zvino Jehu akati, “Tsaurirai Bhaari zuva romutambo mukuru.” Vakaparidza izvozvo.

²¹Zvino Jehu akatuma nhume pakati peIsiraeri pose, vose vanamati vaBhaari vakauya; hakuna munhu wakasara, akasauya. Vakapinda mumba maBhaari, imba yaBhaari ikazara, kusvika kumadziro nokumadziro.

²²Akati kumutariri wenguo, “Vigira vanamati vaBhaari vose nguo.” Iye akavavigira nguo.

²³Ipapo Jehu akapinda mumba maBhaari, anaJehonadhabhi mwanakomana waRekabhi, akati kuvanamati vaBhaari, “Tsvakai, mutarire kwazvo kuti pano pakati penyu parege kuva nomuranda mumwe waJehovha, asi vanamati vaBhaari bedzi.”

²⁴Vakapinda kundobayira zvibayiro nezvipiriso zvinopiswa. Zvino Jehu wakanga araira varume vana makumi masere panze, achiti, “Kana mumwe wavarume vandinoisa pamaoko enyu akapukunyuka, munhu unomurega akapukunyuka, uchamufira.”

²⁵Zvino wakati apedza kubayira chipiriso chinopiswa Jehu akati kuvarindi nokuvakuru, “Pindai, muvauraye; musatendera mumwe kubuda.” Ivo vakavauraya neminondo inopinza; varindi navakuru vakavarashira kunze, vakaenda kuguta reimba yaBhaari.

²⁶Ipapo vakabudisa mbiru dzaiva mumba maBhaari, vakadzipisa.

²⁷Vakaputsawo mbiru yaBhaari, vakaputsawo imba yaBhaari, vakaiita imba yembudzi kusvikira nhasi.

²⁸Naizvozvo Jehu wakaparadza Bhaari pakati peIsiraeri.

²⁹Asi Jehu haana kurega kutevera zvivi zvaJerobhoamu mwanakomana waNebhati, zvaakatadzisa Isiraeri nazvo, zvemhuru dzendarama dzaiva paBhetieri, nedzaiva paDhani.

³⁰Zvino Jehovha akati kuna Jehu, “Zvawakaita zvakanaka ukaita zvakarurama pamberi pangu, ukaitira imba yaAhabhi zvose zvakanga zviri mumwoyo mangu, zvino vana vako vorudzi rwechina vachagara pachigaro choushe hwaIsiraeri.”

³¹Asi Jehu haana kurangarira kufamba nomwoyo wose nomurayiro waJehovha Mwari waIsiraeri; haana kurega zvivi zvaJerobhoamu zvaakatadzisa Isiraeri nazvo.

³²Pamazuva iwayo Jehovha wakatanga kutapudza Isiraeri; Hazaeri akavakunda panyika yose yeIsiraeri;

³³kubva kuna Jorodhani zvichienda mabvazuva, nenyika yose yaGireadhi, neyavaGadhi, neyavaRubheni, neyavaManase, kubva paAroeri pamupata weArinoni, ndiro Gireadhi neBhashani.

³⁴Zvino mamwe mabasa aJehu, nezvose zvaakaita, nesimba rake rose, hazvina kunyorwa here mubhuku yamakoronike amadzimambo aIsiraeri?

³⁵Jehu akavata namadzibaba ake, vakamuviga paSamaria, Jehoahazi mwanakomana wake akamutevera paushe.

³⁶Nguva yakabata Jehu ushe hwaIsiraeri paSamaria aiva makore ana makumi maviri namasere.