Read Shona Union Version 2002 2 Madzimambo 19 Bible Online

2 Madzimambo 19 - Shona Union Version 2002 bible

2 Madzimambo 19

¹Zvino mambo Hezekia wakati achizvinzwa, akabvarura nguo dzake, akafuka magumbu, akapinda mumba maJehovha.

²Akatuma Eriakimu waitarira imba, naShebhana munyori, navakuru vavapristi, vakafuka magumbu, kunomuporofita Isaya mwanakomana waAmozi.

³Vakati kwaari, “Zvanzi naHezekia, ‘Nhasi izuva rokutambudzika, nerokutukwa, nerokuzvidzwa; nokuti vana vakasvika pakuzvarwa, asi hakune simba rokuzvara naro.

⁴Zvimwe Jehovha Mwari wenyu uchanzwa mashoko ose omukuru wavatariri, wakatumwa namambo weAsiria tenzi wake, kuzvidza Mwari mupenyu, agovatuka pamusoro pamashoko akanzwa Jehovha Mwari wenyu; naizvozvo nyengetererai vakasara.’ ”

⁵Ipapo varanda vamambo Hezekia vakasvika kuna Isaya.

⁶Isaya akati kwavari, “Udzai tenzi wenyu, muti, ‘Zvanzi naJehovha, usatya hako mashoko awakanzwa, andakamhurwa nawo navaranda vamambo weAsiria.

⁷Tarira, ndichaisa mweya wokutya mukati make, uchanzwa guhu, ndokudzokera kunyika yake; ndichamuurayisa nomunondo munyika yake.’ ”

⁸Naizvozvo mukuru wavatariri wakadzoka, akawana mambo weAsiria achirwa neRibhina, nokuti wakanga anzwa kuti wabva paRakishi.

⁹Zvino wakati achinzwa pamusoro paTirihaka mambo weItiopia, zvichinzi, “Tarirai, wouya kuzorwa nemi, akatumazve nhume kuna Hezekia, achiti,

¹⁰‘Endai mundoudza Hezekia mambo waJudha,’ muti, ‘Mwari wako, waunovimba naye, ngaarege kukunyengera,’ achiti, ‘Jerusaremu haringaiswi muruoko rwamambo weAsiria.’

¹¹“Tarira, wakanzwa zvakaitirwa nyika dzose namadzimambo eAsiria, kuti vakadziparadza chose; zvino iwe ucharwirwa here?

¹²Ko vamwari vedzimwe ndudzi vakadzirwira here, idzo dzakaparadzwa namadzibaba angu, vanaGozani, naHarani, naRezefi, navana vaEdheni, vaiva paTerasari?

¹³Mambo weHamati uripiko, namambo weAripadhi, namambo weguta reSefarivhaimi, neHena, neIvha?”

¹⁴Hezekia akagamuchira n’gwadhi pamaoko enhume, akairava; Hezekia akakwira kumba kwaJehovha akaipetenura pamberi paJehovha.

¹⁵Ipapo Hezekia akanyengetera pamberi paJehovha, akati, “Haiwa! Jehovha weIsiraeri, iye ugere pamusoro pamakerubhi! Ndimi Mwari, imi moga, woushe hwose hwenyika, ndimi makaita kudenga napasi.

¹⁶Rerekerai nzeve yenyu, Jehovha, munzwe; svinudzai meso enyu, Jehovha, muwone; inzwai mashoko aSanheribhi, aakatuma kuzozvidza Mwari mupenyu.

¹⁷Zvirokwazvo, Jehovha, madzimambo eAsiria akaparadza ndudzi nenyika dzadzo,

¹⁸akakandira vamwari vadzo mumoto; nokuti vakanga vasi vamwari, asi rakanga riri basa ramaoko avanhu, ari matanda namabwe; naizvozvo vakavaparadza.

¹⁹Zvino, Jehovha Mwari wedu, chitiponesai henyu paruoko rwake, kuti ushe hwose hwenyika huzive kuti ndimi Jehovha Mwari, imi moga.”

²⁰Ipapo Isaya mwanakomana waAmozi, wakatuma shoko kuna Hezekia, akati, “Zvanzi naJehovha Mwari weIsiraeri, ‘Zvawanyengetera kwandiri pamusoro paSanheribhi mambo weAsiria, ndakunzwa.’

²¹“Heri shoko rakataurwa naJehovha pamusoro pake, Mhandara, mukunda weZioni, wakakushora nokukuseka; mukunda weJerusaremu wakakudzungudzira musoro wake.

²²Ndianiko waakatuka nokumhura? Wakazvikudza kuna aniko nezwi rako, meso ako akatarira aniko kudenga? NdiMutsvene weIsiraeri!

²³Wakatuka Jehovha nenhume dzako, ukati, ‘Ndakakwira kumakomo marefu nengoro dzangu zhinji, kunzvimbo dzomukati dzeRebhanoni; ndichatema misidhari mirefu iripo, nemisipiresi yakatsaurwa iripo, ndichapinda kusvikira paimba yake yomukati, kudondo rake rinobereka zvakanaka.

²⁴Ndakateka ndikanwa mvura yedzimwe nyika, ndichapisa nzizi dzose dzeIjipiti nokutsika kwetsoka dzangu.

²⁵Hauna kunzwa here kuti ndakazviita kare, kuti ndakazviraira nenguva dzokutanga-tanga? Zvino ndaraira zviitike, kuti iwe uve muparadzi wamaguta akakombwa namasvingo, ave matongo.’

²⁶“Naizvozvo vageremo vakanga vane simba duku, vakavhunduswa nokunyadzwa; vakafanana nouswa hwesango, nomuriwo mutema, nouswa huri pamusoro peimba, nezviyo zvakatsva zvichigere kukura.

²⁷Asi ndinoziva kugara kwako pasi, nokubuda kwako, nokupinda kwako, uye hasha dzako kwandiri.

²⁸“Nokuda kwehasha dzako kwandiri, uye nokuti ndakanzwa kuzvikudza kwako, ndichaisa rwauro rwangu mumhino dzako, netomu rangu mumiromo yako, ndikudzosere nenzira yawakauya nayo.

²⁹Ichi ndicho chichava chiratidzo kwauri, nhaka muchadya zvinogomera zvoga, negore rechipiri muchadya zvinomerazve kwazviri; asi negore rechitatu munofanira kudyara, nokucheka, nokusima minda yemidzambiringa, mudye michero yayo.

³⁰“Zvino vakasara, vakapukunyuka veimba yaJudha, vachaitazve midzi pasi, nokubereka michero kumusoro.

³¹“Nokuti vakasara vachabuda paJerusaremu, navakapukunyuka pagomo reZioni; kushingaira kwaJehovha kuchazviita.

³²“Naizvozvo zvanzi naJehovha pamusoro pamambo weAsiria, ‘Haangapindi muguta rino, kana kuposhera museve imomo, kana kusvika pamberi paro nenhoo, kana kututira gomo revhu pariri.’

³³Zvanzi naJehovha, ‘Nenzira yaakauya nayo, uchadzokazve nayo; haangapindi muguta rino.

³⁴Nokuti ndichadzivira guta rino, ndirirwire nokuda kwangu, uye nokuda kwomuranda wangu Dhavhidhi.’ ”

³⁵Zvino nousiku uhwo mutumwa waJehovha wakabuda, akauraya vanhu vane zviuru zvine zana namakumi masere nezvishanu pamisasa yavaAsiria; zvino vanhu vakati vachimuka mangwanani, vakawana zvava zvitunha zvose.

³⁶Naizvozvo Sanheribhi mambo weAsiria akabva, akaenda, akadzokera kwakare, akandogara Ninivhe.

³⁷Zvino wakati achinamata mumba maNisiroki mwari wake, Adhiramereki naSharezeri vakamuuraya nomunondo, ivo vakatizira kunyika yeArarati. Esarihadhoni akamutevera paushe.