Read Shona Union Version 2002 2 Madzimambo 20 Bible Online

2 Madzimambo 20 - Shona Union Version 2002 bible

2 Madzimambo 20

¹Zvino namazuva iwayo Hezekia akarwara, kusvikira pakufa. Muporofita Isaya mwanakomana waAmozi akasvika kwaari, akati kwaari, “Zvanzi naJehovha, ‘Chiraira nhaka yako, nokuti uchafa, haungararami.’ ”

²Ipapo akatendeukira kumadziro, akanyengetera kuna Jehovha, akati,

³“Dorangarirai henyu, Jehovha, kuti ndakafamba pamberi penyu nezvokwadi nomwoyo wose, ndikaita zvakanaka pamberi penyu.” Hezekia akachema kwazvo.

⁴Zvino Isaya wakanga achigere kubuda paruvazhe rwapakati, shoko raJehovha rikauya kwaari, richiti,

⁵“Dzokazve, undoti kuna Hezekia, mutungamiriri wavanhu vangu, ‘Zvanzi naJehovha Mwari waDhavhidhi baba vako, ndanzwa kunyengetera kwako, ndaona misodzi yako; zvino tarira, ndichakuporesa; nezuva rechitatu uchakwira kuimba yaJehovha.’

⁶“Ndichawedzera pamazuva ako makore ane gumi namashanu; ndichakurwira iwe neguta rino paruoko rwamambo weAsiria, ndichadzivira guta rino nokuda kwangu, uye nokuda kwaDhavhidhi muranda wangu.”

⁷Ipapo Isaya akati, “Uyai nebundu ramawonde.” Ivo vakauya naro, vakariisa pamota, akapora.

⁸Zvino Hezekia akati kuna Isaya, “Chiratidzo chichava cheiko kuti Jehovha uchandiporesa, ndikwire kumba kwaJehovha nezuva rechitatu here?”

⁹Isaya akati, “Ichi chichava chiratidzo chaJehovha kwauri, kuti Jehovha uchaita sezvaakataura. Unoda kuti mumvuri upfuurire mberi mitaro inegumi, kana udzoke mitaro inegumi here?”

¹⁰Hezekia akapindura, akati, “Zvakareruka kuti mumvuri upfuurire mberi mitaro inegumi; kwete, mumvuri ngaudzoke mitaro inegumi.”

¹¹Ipapo muporofita akadana kuna Jehovha, akadzosera mumvuri shure mitaro inegumi pachikiratidzo chenguva chaAhazi.

¹²Zvino nenguva iyo Bherodhakibharadhani mwanakomana waBharadhani, mambo weBhabhironi, akatuma nwadhi nechipo kuna Hezekia; nokuti wakanga anzwa kuti Hezekia wairwara.

¹³Hezekia akavanzwa, akavaratidza imba yose yakanga ine zvinokosha zvake, sirivha, nendarama, nezvinonhuwira, namafuta anokosha, neimba yaiva nenhumbi dzake dzokurwa nadzo, nezvose zvakanga zviri papfuma yake; kwakanga kusisina chinhu mumba make, kana muushe hwake hwose, chavasina kuratidzwa naHezekia.

¹⁴Zvino muporofita Isaya akasvika kuna mambo Hezekia, akati kwaari, “Ko varume ava vakati kudini? Vasvika kwauri vachibvepiko?” Hezekia akati, “Vabva kunyika iri kure, Bhabhironi.”

¹⁵Akati, “Vakawonei mumba mako?” Hezekia akapindura, akati, “Vakaona zvose zviri mumba mangu, hakune chinhu pakati pepfuma yangu chandisina kuvaratidza.”

¹⁶Ipapo Isaya akati kuna Hezekia, “Inzwa shoko raJehovha.

¹⁷‘Tarira, mazuva achasvika, nenguva iyo zvose zviri mumba mako nezvose zvakaunganidzwa namadzibaba ako kusvikira zuva ranhasi zvichaiswa Bhabhironi; hakuna chinhu chichasiyiwa, ndizvo zvinotaura Jehovha.

¹⁸Vamwe vavanakomana vako, vachabva kwauri, vauchabereka, vachatapwa; vachava varanda mumba mamambo weBhabhironi.’ ”

¹⁹Ipapo Hezekia akati kuna Isaya, “Shoko raJehovha, ramataura, rakanaka haro.” Akatiwo, “Ko handizvo here, kana rugare nezvokwadi zviripo hazvo pamazuva angu?”

²⁰Zvino mamwe mabasa aHezekia, nesimba rake, nokuita kwake dziva nomugero, nokusvitsa kwake mvura muguta, hazvina kunyorwa here mubhuku yamakoronike amadzimambo aJudha?

²¹Hezekia akavata namadzibaba ake, Manase mwanakomana wake akamutevera paushe.