Read Shona Union Version 2002 2 Madzimambo 4 Bible Online

2 Madzimambo 4 - Shona Union Version 2002 bible

2 Madzimambo 4

¹Zvino mumwe mukadzi wavakadzi vavanakomana vavaporofita wakachema kuna Erisha, akati, “Muranda wenyu, murume wangu, wafa; munoziva kuti muranda wenyu wakanga achitya Jehovha; zvino uyo, waakanga atora chikwerete kwaari, wauya kuzotora vana vangu vaviri kuzova varanda vake.”

²Erisha akati kwaari, “Ndingakubatsira seiko? Ndiudze. Uneiko mumba mako?” Iye akati, “Murandakadzi wenyu haane chinhu mumba, asi hari ina mafuta.”

³Ipapo akati, “Enda undokwereta kuna vose vaugere navo midziyo isina chiro; usakwereta mishoma.

⁴“Zvino upinde, iwe navana vako, upfige mukova, udire mumidziyo iyo yose, uchigadzika yose yazara kurutivi.”

⁵Naizvozvo akabva kwaari, akapfiga mukova, iye navana vake vari mukati; ivo vakamusvitsa midziyo, akadira.

⁶Midziyo yakati yazara, akati kumwanakomana wake, “Ndipezve mumwe mudziyo.” Iye akati kwaari, “Hapachina mumwe mudziyo; mafuta akagumawo.”

⁷Ipapo akandoudza munhu waMwari, iye akati, “Chienda undotengesa mafuta, uripe chikwerete chako, urarame nezvakasara, iwe navanakomana vako.”

⁸Zvino mumwe musi Erisha akapfuura napaShunemi, pakanga pagere mukadzi wakakurumbira, iye akamugombedzera kudya zvokudya. Zvino nguva dzose kana achipfuura napo, waitsaukirako kuzodya zvokudya.

⁹Akati kumurume wake, “Tarirai zvino, ndinoona kuti uyu murume, unosipfuura nokwatiri, munhu mutsvene waMwari.

¹⁰Ngativake kamuri duku pamusoro porusvingo, timuisiremo mubhedha, netafura, nechigaro, nechigadziko chomwenje; zvino kana achinge achiuya kwatiri, agotsaukiramo.”

¹¹Zvino mumwe musi akasvikapo, akatsaukira kukamuri iyo duku, akandovatamo.

¹²Akati kuna Gehazi muranda wake, “Dana mukadzi uyu muShunemi.” Wakati amudana, iye akamira pamberi pake.

¹³Akati kwaari, “Chitaura kwaari zvino, uti ‘Tarirai, makatichengeta zvikuru kwazvo, zvino tingakuitireiwo? Munoda kuti tikureverei kuna mambo, kana kumukuru wehondo here?’ ” Iye akapindura, akati, “Ndigere hangu zvakanaka pakati pavanhu vangu.”

¹⁴Akati, “Zvino tingamuitireiko?” Gehazi akapindura, akati, “Zvirokwazvo haana mwanakomana, nomurume wake wakwegura.”

¹⁵Iye akati, “Mudane.” Wakati amudana, iye akamira pamukova.

¹⁶Akati, “Nenguva ino kana gore rapera, uchafungatira mwana.” Iye akati, “Kwete, ishe wangu, munhu waMwari, regai kureva nhema kumurandakadzi wenyu.”

¹⁷Mukadzi akava nemimba, akapona mwanakomana nenguva iyo pakupera kwegore, sezvakanga zvataura Erisha kwaari.

¹⁸Zvino mwana wakati akura, akaenda mumwe musi kuna baba vake kuvakohwi.

¹⁹Akati kuna baba vake, “Musoro wangu, musoro wangu!” Ivo vakati kumuranda, “Mubereke uende naye kuna mai vake.”

²⁰Iye akamutora, akamuisa kuna mai vake, akagara pamabvi avo kusvikira masikati makuru, akafa.

²¹Ivo vakakwira, vakandomuradzika pamubhedha womunhu waMwari, vakamupfigiramo, vakabuda.

²²Akadana murume wake, akati, “Nditumirewo mumwe muranda nembongoro imwe, ndimhanyire kumunhu waMwari, ndigodzokazve.”

²³Iye akati, “Unoda kuendereiko kwaari nhasi? Hakuzi kugara kwomwedzi, kana Sabata.” Iye akati, “Hazvine mhosva.”

²⁴Zvino akaisa chityaro pambongoro, akati kumuranda wake, “Uifambise, ipfuurire mberi; rega kundinonotsa pakufamba, asi kana ndikakuudza.”

²⁵Naizvozvo akaenda, akasvika kumunhu waMwari pagomo reKarimeri. Munhu waMwari wakati achimuona achiri kure, akati kuna Gehazi muranda wake, “Tarira hoyo mukadzi muShunemi.

²⁶Mhanya hako zvino undosangana naye, uti kwaari, ‘Makafara here? Murume wenyu wakafara here? Nomwana wakafara here?’ ” Iye akapindura, akati, “Haiwa, takafara hedu!”

²⁷Zvino wakati asvika kumunhu waMwari pagomo, akabata tsoka dzake. Gehazi akaswedera achida kumusundira kure; asi munhu waMwari akati, “Murege hake, nokuti mweya wake une shungu mukati make. Asi Jehovha wakandivanzira izvozvo, haana kundiudza.”

²⁸Ipapo iye akati, “Ko ndakakumbira mwanakomana kuna ishe wangu here? Ko handina kuti, regai kundinyengedzera here?”

²⁹Ipapo akati kuna Gehazi, “Chizvisunga chiuno, uende; kana ukasangana nomunhu, rega kumukwazisa; kana mumwe akakukwazisa, usamudavira; ugondoisa tsvimbo yangu pamusoro pechiso chomwana.”

³⁰Zvino mai vomwana vakati, “NaJehovha mupenyu, uye nomweya wenyu mupenyu, handingakusiyiyi.” Akasimuka, akamutevera.

³¹Gehazi akavatungamirira, akandoisa tsvimbo pachiso chomwana, asi kwakanga kusino kutaura kana kunzwa. Naizvozvo akadzoka kuzosangana naye, akati kwaari, “Mwana haana kupepuka.”

³²Erisha wakati apinda mumba akawana mwana akafa, akaradzikwa pamubhedha wake.

³³Naizvozvo akapinda, akapfiga mukova, iye ari mukati nomwana, ivo vaviri, akanyengetera kuna Jehovha.

³⁴Akakwira, akatsivama pamusoro pomwana, akaisa muromo wake pamuromo wake, nameso ake pameso ake, namaoko ake pamaoko ake; akatsivama pamusoro pake, nyama yomwana ikadziya.

³⁵Zvino akadzoka, akafamba-famba mumba kamwe, akakwirazve, akatsivama pamusoro pake; mwana akahotsira kanomwe, mwana ndokusvinudza meso ake.

³⁶Ipapo akadana Gehazi, akati, “Dana mukadzi muShunemi.” Akamudana. Iye wakati apinda kwaari, Erisha akati, “Simudza mwanakomana wako.”

³⁷Zvino iye akapinda, akazviwisira patsoka dzake, akakotamira pasi; akasimudza mwanakomana wake, akabuda.

³⁸Zvino Erisha akaendazve Girigari; nzara yakanga iripo panyika; vanakomana vavaporofita vakanga vagere pamberi pake, akati kumuranda wake, “Gadza hari huru, ubikire vanakomana vavaporofita zvokudya.”

³⁹Zvino mumwe akaenda kusango kundotanha miriwo, akawana muti unotanda, akatanhapo magaka, akazadza nguo yake nawo, akasvika akaachekera muhari yezvokudya, nokuti vakanga vasingaazivi.

⁴⁰Zvino vakapakurira vanhu kuti vadye. Ivo vakati vodya zvokudya, vakadanidzira, vakati, “Munhu waMwari, rufu ruri muhari.” Vakasagona kuzvidya.

⁴¹Asi iye akati, “Uyai noupfu.” Akahudira muhari, akati, “Chipakurai henyu, vanhu vadye.” Zvino kwakanga kusine chinhu chakaipa muhari.

⁴²Zvino mumwe murume wakasvika, achibva Bhaarisharisha, akavigira munhu waMwari zvokudya zvezvitsva, zvingwa zvebhari zvina makumi maviri, nehura itsva dzezviyo muhomwe yake. Akati, “Ipai vanhu, vadye.”

⁴³Muranda wake akati, “Ndingaisa izvi pamberi pavanhu vane zana seiko?” Asi iye akati, “Ipai vanhu, vadye, nokuti zvanzi naJehovha, ‘Vachadya, vakasiya zvimwe.’ ”

⁴⁴Naizvozvo akazviisa pamberi pavo, vakadya, vakasiya zvimwe, sezvakataura shoko raJehovha.