Read Shona Union Version 2002 2 Madzimambo 6 Bible Online

2 Madzimambo 6 - Shona Union Version 2002 bible

2 Madzimambo 6

¹Zvino vanakomana vavaporofita vakati kuna Erisha, “Tarirai zvino, apa patigere pamberi penyu pakamanikana, hapatiringani.

²Titenderei henyu tiende kwaJorodhani, mumwe nomumwe atore danda’po, tizvivakirepo paatingagara.” Iye akapindura, akati, “Endai henyu.”

³Zvino mumwe akati, “Tinokumbira kuti imi mutende kuendawo navaranda venyu.” Akapindura akati, “Ndichaenda.”

⁴Naizvozvo akaenda navo. Vakati vasvika kwaJorodhani, vakatema matanda.

⁵Asi mumwe wakati achitema danda, demo ndokuwira mumvura; akadanidzira, achiti, “Haiwa! Tenzi wangu! Nokuti rakanga rakumbirwa.”

⁶Munhu waMwari akati, “Yawirepiko?” Akamuratidza payakanga yawira. Erisha akatema rutanda, akarukandirako, akapapamadza demo.

⁷Akati, “Chiritora hako.” Iye akatambanudza ruoko rwake, akaritora.

⁸Zvino mambo weSiria wakarwa navaIsiraeri; akarangana navaranda vake, akati, “Matende angu anofanira kudzikwa pokuti nopokuti.”

⁹Zvino munhu waMwari ndokutuma shoko kuna mambo weIsiraeri, akati, “Chenjerai, murege kupfuura nopokuti, nokuti vaSiria voburukira ipapo.”

¹⁰Ipapo mambo weIsiraeri akatuma vanhu ikoko kwaakaudzwa nokunyeverwa nomunhu waMwari, akazvingwarirapo asingadaro kamwe nakaviri bedzi.

¹¹Naizvozvo mwoyo wamambo weSiria akanyaniswe kwazvo pamusoro pechinhu ichi; akadana varanda vake, akati kwavari, “Hamungandiratidzi here, kuti ndianiko pakati patiri unonzwana namambo weIsiraeri?”

¹²Mumwe wavaranda vake akati, “Kwete, ishe wangu mambo, asi Erisha muporofita, ari pakati peIsiraeri, ndiye unoudza mambo weIsiraeri mashoko amunotaura muimba yenyu yomukati.”

¹³Akati, “Endai mundotarira kwaari, nditume vanhu kuzomutora.” Akaudzwa, zvichinzi, “Uri paDhotani.”

¹⁴Naizvozvo akatumirako mabhiza, nengoro, nehondo huru; vakafamba usiku, vakakomba guta.

¹⁵Zvino muranda womunhu waMwari wakati amuka mangwanani, akabuda, ndokuona hondo namabhiza nengoro zvakakomba guta. Muranda wake akati kwaari, “Haiwa! Tenzi wangu, tichadiniko?”

¹⁶Iye akapindura, akati, “Usatya hako, nokuti vari kwatiri vanopfuura vari kwavari pakuwanda.”

¹⁷Zvino Erisha akanyengetera, akati, “Jehovha, svinudzai henyu meso ake, awone.” Ipapo Jehovha akasvinudza meso ejaya, akaona gomo rizere namabhiza, nengoro dzomoto zvakanga zvakakomba Erisha.

¹⁸Zvino vakati vachiburukira kwaari, Erisha akanyengetera kuna Jehovha, akati, “Dorovai vanhu ava noupofu.” Jehovha akavarova noupofu, sezvakanga zvarehwa naErisha.

¹⁹Erisha akati kwavari, “Haizi iyo nzira, uye guta iri harizi iro; nditeverei ini, ndikuisei kumunhu wamunotsvaka.” Akaenda navo Samaria.

²⁰Vakati vasvika Samaria, Erisha akati, “Jehovha, svinudzai meso avanhu ava, vawone.” Jehovha akasvinudza meso avo, vakaona kuti vava mukati meSamaria.

²¹Zvino mambo weIsiraeri wakati achivaona, akati kuna Erisha, “Baba vangu, ndovauraya here? Ndovauraya here?”

²²Iye akapindura, akati, “Usavauraya; ko ungavauraya vawakatapa nomunondo wako nouta hwako here? Gadzika chingwa nemvura pamberi pavo, vadye, vanwe, vaende kuna tenzi wavo.”

²³Iye akavagadzirira zvokudya zvizhinji; zvino vakati vadya nokunwa, akavaendisa, vakadzokera kuna tenzi wavo. Zvino hondo dzavaSiria hadzina kuzopindazve munyika yeIsiraeri.

²⁴Shure kwaizvozvo, Bhenihadhadhi mambo weSiria akaunganidza hondo yake yose, akandokomba Samaria.

²⁵Nzara huru ikavapo paSamaria; nokuti vakarikomba kusvikira musoro wembongoro uchitengeswa namashekeri esirivha ana makumi masere, nechitswanda chiduku chamatoto enjiva chichitengeswa namashekeri esirivha mashanu.

²⁶Zvino mambo weIsiraeri wakati achipfuura napamusoro porusvingo, mumwe mukadzi akadanidzira kwaari, akati, “Ndibatsireiwo ishe wangu mambo!”

²⁷Iye akati, “Kana Jehovha asingakubatsiri, ini ndingakubatsira neiko? Nezvinobva paburiro kana pachisviniro chewaini kanhi?”

²⁸Mambo akati kwaari, “Chiiko chinokunetsa?” Akapindura, akati, “Mukadzi uyu wakati kwandiri, ‘Uya nomwanakomana wako, timudye nhasi, mangwana tigodya mwanakomana wangu.’

²⁹Naizvozvo takabika mwanakomana wangu, tikamudya; fume mangwana ndikati kwaari, ‘Uya nomwanakomana wako, timudye, iye ndokuvanza mwanakomana wake.’ ”

³⁰Ipapo mambo wakati achinzwa mashoko omukadzi, akabvarura nguo dzake; (zvino wakanga achifamba naparusvingo;) vanhu vakatarira, vakaona kuti wakafuka magumbu mukati pamuviri wake.

³¹Ipapo akati, “Mwari ngaandirove, arambe achidaro, kana musoro waErisha mwanakomana waShafati ukaramba uri pamusoro pake nhasi.”

³²Asi Erisha wakanga agere mumba make, vakuru vagerewo naye; mambo akatuma munhu kuzomutungamirira; asi nhume ichigere kusvika kwaari, akati kuvakuru, “Munoona here kuti mwana uyu womuurayi watuma munhu kuzobvisa musoro wangu? Tarirai, kana nhume ichisvika, mupfige mukova, mumutsigirire mukova; kutsika kwetsoka dzatenzi wake hakunzwiki shure kwake here?”

³³Zvino wakati achitaurirana navo, nhume ikaburukira kwaari; iye akati, “Tarirai, chakaipa ichi chinobva kuna Jehovha; ndichamirireiko Jehovha?”