Read Shona Union Version 2002 2 Madzimambo 8 Bible Online

2 Madzimambo 8 - Shona Union Version 2002 bible

2 Madzimambo 8

¹Zvino Erisha wakataura nomukadzi uya waakanga amutsira mwanakomana wake, akati, “Simuka uende, iwe neimba yako, undogara kwaunogona kugara hako; nokuti Jehovha wakaraira nzara; ichava panyika makore manomwe.”

²Zvino mukadzi akasimuka, akaita sezvaakaudzwa nomunhu waMwari, akaenda neveimba yake, akandogara panyika yavaFirisitia makore manomwe.

³Zvino makore iwayo akati apera, mukadzi ndokudzoka kunyika yavaFirisitia; akaenda kuna mambo kundochema pamusoro peimba yake nomunda wake.

⁴Zvino mambo wakanga achitaurirana naGehazi muranda womunhu waMwari, mambo akati, “Dondirondedzerawo zvinhu zvose zvikuru, zvakaitwa naErisha.”

⁵Zvino wakati achaudza mambo kuti wakamutsa wakafa, iye mukadzi wakanga amutsirwa mwanakomana wake, akachema kuna mambo pamusoro peimba yake nomunda wake. Ipapo Gehazi akati, “Ishe wangu mambo, ndiyeyu mukadzi, noyuyu ndiye mwanakomana wake, wakamutswa naErisha.”

⁶Mambo wakati abvunza mukadzi, iye akamuudza. Naizvozvo mambo wakaraira mumwe mukuru pamusoro pake, akati, “Mudzosere zvose zvaiva zvake, nemichero yomunda, kubva pazuva raakabva naro panyika kusvikira zvino.”

⁷Zvino Erisha wakasvika Dhamasiko; Bhenihadhadhi mambo weSiria wakanga achirwara, akaudzwa, zvichinzi, “Munhu waMwari wasvika pano.”

⁸Ipapo mambo akati kuna Hazaeri, “Tora chipo muruoko rwako, undosangana nomunhu waMwari, ubvunze Jehovha naye, uti, ‘Ndichapora pakurwara uku here?’ ”

⁹Naizvozvo Hazaeri akandosangana naye, akaenda nechipo chezvose zvakanga zvakanaka paDhamasiko, mutoro wakaringana makamera ana makumi mana, akasvika akamira pamberi pake, akati, “Mwanakomana wenyu Bhenihadhadhi mambo weSiria, wakandituma kwamuri, achiti, ‘Ndichapora here pakurwara uku?’ ”

¹⁰Erisha akati kwaari, “Enda, undoti kwaari, ‘Zvirokwazvo haangapori; asi Jehovha wakandiratidza kuti zvirokwazvo iye uchafa.’ ”

¹¹Akaramba akamunanganidza kusvikira anyara; munhu waMwari akachema.

¹²Ipapo Hazaeri akati, “Munochemeiko, ishe wangu?” Akapindura, akati, “Nokuti ndinoziva zvakaipa zvauchaitira vana veIsiraeri; uchapisa nhare dzavo, uchauraya majaya avo nomunondo, uchapwanya pwere dzavo, uchatumbura vakadzi vavo vane mimba.”

¹³Hazaeri akati, “Ko muranda wenyu chinyiko, iyo imbwa hayo, kuti ndiite chinhu ichi chikuru chakadai?” Erisha akapindura, akati, “Jehovha wakandizivisa, kuti iwe uchava mambo weSiria.”

¹⁴Ipapo akabva kuna Erisha, akaenda kuna tenzi wake; iye akati kwaari, “Erisha wati kudiniko kwauri?” Akapindura, akati, “Wakandiudza kuti zvirokwazvo muchapora henyu.”

¹⁵Zvino fume mangwana akatora jira, akarinyika mumvura, ndokumufumbira chiso, naizvozvo akafa; Hazaeri akamutevera paushe.

¹⁶Zvino negore rechishanu raJoramu mwanakomana waAhabhi, mambo weIsiraeri, Jehoshafati ari mambo waJudha, Jehoramu mwanakomana waJehoshafati mambo waJudha, akatanga kubata ushe.

¹⁷Iye akatanga kubata ushe ava namakore makumi matatu namaviri; akabata ushe paJerusaremu makore masere.

¹⁸Akafamba nenzira yamadzimambo aIsiraeri, sezvakaita imba yaAhabhi; nokuti mukunda waAhabhi waiva mukadzi wake; akaita zvakaipa pamberi paJehovha.

¹⁹Kunyange zvakadaro Jehovha wakanga asingadi kuparadza Judha, nokuda kwaDhavhidhi muranda wake, nokuti wakanga amupikira, kuti uchamupa mwenje wavana vake nguva dzose.

²⁰Zvino namazuva ake vaEdhomu vakamukira vaJudha, vakazvigadzira mambo.

²¹Ipapo Joramu akaenda Zairi, ane ngoro dzake dzose; akamuka usiku, akaparadza vaEdhomu vakanga vakamukomba navakuru vengoro; vanhu vakatizira kumatende avo.

²²Naizvozvo vaEdhomu vakamukira vaJudha, kusvikira zuva ranhasi. Ipapo Ribhina akavamukirawo nenguva iyo.

²³Mamwe mabasa aJoramu, nezvose zvaakaita, hazvina kunyorwa here mubhuku yaMakoronike amadzimambo aJudha?

²⁴Joramu akavata namadzibaba ake, akavigwa kuna madzibaba ake muguta raDhavhidhi; Ahazia mwanakomana wake akamutevera paushe.

²⁵Negore regumi namaviri raJoramu mwanakomana waAhabhi mambo waIsiraeri, Ahazia mwanakomana waJehoramu mambo waJudha, akatanga kubata ushe.

²⁶Ahazia wakanga ana makore ana makumi maviri namaviri pakutanga kwake kubata ushe; akabata ushe paJerusaremu gore rimwe. Zita ramai vake rakanga riri Ataria, mukunda waOmiri mambo weIsiraeri.

²⁷Iye wakafamba nenzira yeimba yaAhabhi, akaita zvakaipa pamberi paJehovha, sezvakaitwa neimba yaAhabhi; nokuti wakanga ari mukuwasha weimba yaAhabhi.

²⁸Akaenda naJoramu mwanakomana waAhabhi kundorwa naHazaeri mambo weSiria paRamotigireadhi; vaSiria vakakuvadza Joramu.

²⁹Mambo Joramu akadzokera Jezereri kuti arapwe mavanga ake aakatemwa navaSiria paRama, nguva yaakarwa naHazaeri mambo weSiria. Ipapo Ahazia mwanakomana waJehoramu mambo waJudha akaenda kundoona Joramu mwanakomana waAhabhi paJezereri, nokuti wakanga achirwara.