Read Shona Union Version 2002 1 Makoronike 12 Bible Online

1 Makoronike 12 - Shona Union Version 2002 bible

1 Makoronike 12

¹Ava ndivo vakaenda kuna Dhavhidhi paZikiragi, achakavanda nokuda kwaSauro mwanakomana waKishi; ivo vaiva mhare, vaimubatsira pakurwa.

²Vakanga vakabata uta, uye vaigona kuposha mabwe, nemiseve nouta noruoko rworudyi kana rworuboshwewo; dzaiva hama dzaSauro vokwaBhanjamini.

³Mukuru akanga ari Ahiezeri, tevere Joashi, vanakomana vaShemaa muGibheati; naJezieri, naPereti, vanakomana vaAzimavheti; naBheraka, naJehu muAnatoti;

⁴naIshimaya muGibheoni, mhare pakati pavana makumi matatu, wairaira vana makumi matatu; naJeremiya, naJahazieri, naJohanani, naJozabhadhi muGedherati;

⁵naEruzai, naJerimoti, naBheriya, naShemaria, naShefatia muHarufi;

⁶naErikana, naIshiya, naAzareri, naJoezeri, naJoshobheami, vaKora;

⁷naJoera, naZebhedhia vanakomana vaJehorami muGedhori.

⁸Vamwe vavaGadhi vakazvitsaurawo, vakaenda kuna Dhavhidhi kunhare kurenje, varume vane simba noumhare, varume vakanga vadzidza kurwa, vakanga vachigona kubata nhoo nepfumo; zviso zvavo zvakanga zvakaita sezveshumba, uye vaimhanya semharapara pamakomo;

⁹Ezeri akanga ari mukuru, wechipiri Obhadhiya, wechitatu Eriabhi;

¹⁰wechina Misimana, weshanu Jeremiya;

¹¹wetanhatu Atai, wechinomwe Erieri;

¹²worusere Johanani, wepfumbamwe Erizabhadhi;

¹³wegumi Jeremiya; wegumi nomumwe Makibhanai.

¹⁴Ndivo kuvana vaGadhi vaiva vakuru vehondo; muduku kwavari akanga akaenzana navane zana, nomukuru navane chiuru chezana.

¹⁵Ndivo vakayambuka Jorodhani pamwedzi wokutanga, panguva yarwakafashamira kunhivi dzarwo dzose; vakadzinga vose vakanga vagere pamipata, kumabvazuva nokumavirira.

¹⁶Navamwe vana vaBhenjamini navaJudha vakaendawo kuna Dhavhidhi munhare.

¹⁷Dhavhidhi akabuda akasangana navo, akapindura, akati kwavari, “Kana mauya kwandiri norugare kuzondibatsira, mwoyo wangu uchava nemi; asi kana mauya kuzondinyengera, kundiisa kuvadzivisi vangu, kunyange ndisine zvakaipa pamaoko angu, Mwari wamadzibaba edu ngaazvione, akutukei pamusoro pazvo.”

¹⁸Ipapo mweya wakauya pamusuro paAmasai aiva mukuru wavana makumi matatu, akati, “Tiri vanhu venyu, Dhavhidhi, tiri kurutivi rwenyu, mwanakomana waJese! Rugare, rugare ngaruve nemi, rugare ngaruve navabatsiri venyu; nokuti Mwari wenyu anokubatsirai.” Ipapo Dhavhidhi akavagamuchira, akavaita vakuru veboka.

¹⁹KwaManasewo vakabva vamwe, vakaenda kuna Dhavhidhi, nguva yaakaenda navaFirisitia kundorwa naSauro, asi havana kuvabatsira; nokuti madzishe avaFirisitia akarangana, akamudzosa, achiti, “Achatinyengera, achienda kunatenzi wake Sauro, misoro yedu ikava panjodzi.”

²⁰Zvino wakati achienda Zikiragi, vamwe vaManase vakabva, vakasvika kwaari, vaiti, Adhana, naJozabhadhi, naJedhiaeri, naMikaeri, naJozabhadhi, naErihu, naZiretai, vakanga vari vakuru vechiuru chamazana pakati paManase.

²¹Vakabatsira Dhavhidhi pakurwa neboka ramakororo; nokuti vose vakanga vari varume vane simba noumhare, navakuru pahondo.

²²Zuva rimwe nerimwe vakasvika kuna Dhavhidhi kuzomubatsira, kusvikira yava hondo huru, sehondo yaMwari.

²³Ndiko kuwanda kwavakuru vakashongera kurwa, vakaenda kuna Dhavhidhi paHebhuroni, kuzodzosera ushe hwaSauro kwaari, sezvakarehwa naJehovha.

²⁴Vana vaJudha, vakanga vakashonga nhoo nepfumo, vaiva nezviuru zvitanhatu namazana masere, vakanga vakashongera kurwa.

²⁵Kuvana vaSimeoni varume vane simba noumhare pakurwa vaiva nezviuru zvinomwe nezana rimwe.

²⁶Kuvana vaRevhi vaiva nezviuru zvina namazana matanhatu.

²⁷Jehoyadha aiva mutungamiriri weimba yaAroni; vakanga vanaye vaiva nezviuru zvitatu namazana manomwe;

²⁸naZadhoki, jaya raiva nesimba noumhare, naveimba yababa vake, vakuru vana makumi maviri navaviri.

²⁹Kuvana vaBhenjamini, hama dzaSauro, zviuru zvitatu; nokuti kusvikira panguva iyo vazhinji vavo vakaramba vakanamatira imba yaSauro.

³⁰Kuvana vaEfuraimu zviuru zvina makumi maviri namazana masere, varume vane simba noumhare, vakanga vane mbiri padzimba dzamadzibaba avo.

³¹Kuhafu yorudzi rwaManase, zviuru zvine gumi nezvisere, vakanga vakanyorwa mazita avo, vakasvika kuzoita Dhavhidhi mambo.

³²Kuvana vaIsakari, varume vaiziva nguva zvakanaka, uye kuti vaIsiraeri vanofanira kuitei, vakuru vavo vaiva mazana maviri; hama dzavo dzose dzairairwa navo.

³³KuvaZebhuruni, avo vaigona kufamba namapoka, nokugona kurongedza hondo, vakabata nhumbi dzose dzokurwa nadzo, vaiva nezviuru zvina makumi mashanu; vaigona kurwa vasine mwoyo miviri.

³⁴KuvaNafutari vakuru vane chiuru chimwe, uye vamwe vakanga vakabata nhoo nepfumo vaiva navo, zviuru zvina makumi matatu nezvinomwe.

³⁵KuvaDhani vaigona kurongedza hondo, zviuru zvina makumi maviri nezvisere namazana matanhatu.

³⁶KuvaAsheri, avo vaigona kufamba namapoka, nokugona kurongedza hondo, zviuru zvina makumi mana.

³⁷Uye mhiri kwaJorodhani, kuvaRubheni navaGadhi nehafu yorudzi rwaManase, avo vaiva nenhumbi dzose dzokurwa nadzo, zviuru zvina makumi maviri.

³⁸Ava vose, varume vehondo, vaigona kurongedza hondo, vakasvika paHebhuroni nemwoyo yakarurama kwazvo, kuzoita Dhavhidhi mambo wavaIsiraeri vose; navaIsiraeri vamwe vose vakanga vano mwoyo mumwe kuita Dhavhidhi mambo.

³⁹Vakagarapo naDhavhidhi mazuva matatu, vakadya nokunwa, nokuti hama dzavo dzakanga dzavagadzirira.

⁴⁰Uye vamwe vakanga vagere pedyo navo kusvikira kwaIsakari naZebhuruni naNafutari, vakauya nezvokudya zvakatakurwa nembongoro, namakamera, namahesera, nenzombe, zviri zvokudya zvoupfu, namapundu amaonde, anamasumbu amadzambiringa akaoma, newaini, namafuta, nenzombe, namakwai mazhinji; nokuti mufaro wakanga uripo pakati paIsiraeri.