Read Shona Union Version 2002 1 Makoronike 16 Bible Online

1 Makoronike 16 - Shona Union Version 2002 bible

1 Makoronike 16

¹Vakapinza areka yaMwari, vakaiisa pakati petende rayakanga yadzikirwa naDhavhidhi; vakabayira pamberi paMwari zvipiriso zvinopiswa nezvipiriso zvokuyananisa.

²Zvino Dhavhidhi akati apedza kubayira zvipiriso zvinopiswa nezvipiriso zvokuyananisa, akaropafadza vanhu nezita raJehovha.

³Akapa mumwe nomumwe wavaIsiraeri, murume nomukadzi, mumwe nomumwe bundu rechingwa, nenhindi yenyama, nebundu ramadzambiringa.

⁴Akagadza vamwe vaRevhi, kuti vashumire pamberi peareka yaJehovha, nokurumbidza, nokuvonga, nokukudza Jehovha Mwari waIsiraeri;

⁵mukuru waiva Asafi, tevere Zekariya, naJeyieri, naShemiramoti, naJehieri, naMatitia, naEriabhi, naBhenaya, naObhedhiEdhomu, naJeyieri, vane mitengerengwa nembira; Asafi airidza kwazvo makandira.

⁶Bhenaya naJahazieri ndivo vairidza hwamanda nguva dzose pamberi peareka yesungano yaMwari.

⁷Zvino nezuva iro Dhavhidhi akatanga kuraira kuti vavonge Jehovha nomuromo waAsafi nehama dzake:

⁸Vongai Jehovha, mudane zita rake; Zivisai zvaakaita pakati pendudzi dzavanhu.

⁹Muimbirei, mumuimbire nziyo dzokukudza; Rondedzerai mabasa ake ose anoshamisa.

¹⁰Zvirumbidzei muzita rake dzvene; Mwoyo yavanotsvaka Jehovha ngaifare kwazvo.

¹¹Tsvakai Jehovha nesimba rake; Tsvakai chiso chake nguva dzose.

¹²Rangarirai mabasa ake anoshamisa, aakaita; Zvishamiso zvake, nezvaakatonga nomuromo wake.

¹³Imi vana vaIsiraeri, muranda wake, Imi vana vaJakobho vasanangurwa vake.

¹⁴Ndiye Jehovha Mwari wedu, Zvaakatonga zviri pasi pose.

¹⁵Rangarirai sungano yake nokusingaperi, Iro shoko raakaraira kumarudzi ane chiuru;

¹⁶Iyo sungano yaakaita naAbhurahamu, Nemhiko yake kuna Isaka;

¹⁷Akazvisimbisira Jakobho, kuti ave mutemo, Kuna Isiraeri kuti ive sungano isingaperi;

¹⁸Achiti, “Ndichakupa iwe nyika yeKenani, Uve mugove wenhaka yenyu;”

¹⁹Panguva imi muchiri varume vashoma pakuverengwa, Zvirokwazvo vashoma kwazvo, navatorwa mairi.

²⁰Vakafamba-famba vachibva kuno rumwe rudzi vachienda kuno rumwe, Nokubva kunoumwe ushe vachienda kunavamwe vanhu.

²¹Haana kutendera munhu kuvaitira zvakaipa; Zvirokwazvo wakatuka madzimambo nokuda kwavo;

²²Achiti, “Musagunzva vazodzwa vangu, Navaporofita vangu musavaitira chakaipa.”

²³Imbirai Jehovha, pasi pose; Paridzirai kuponesa kwake zuva rimwe nerimwe,

²⁴dudzirai kubwinya kwake pakati pavahedheni, Namabasa ake anoshamisa pakati pendudzi dzose.

²⁵Nokuti Jehovha mukuru, anofanira kurumbidzwa kwazvo; Iye anofanira kutyiwa kupfuura vamwari vose.

²⁶Nokuti vamwari vose vendudzi zvifananidzo hazvo; Asi Jehovha ndiye akaita kudenga-denga.

²⁷Kukudzwa noumambo zviri pamberi pake; Simba nomufaro zviri panzvimbo yake;

²⁸Ipai Jehovha, imi ndudzi dzavanhu, Ipai Jehovha kukudzwa nesimba.

²⁹Ipai Jehovha kukudzwa kunofanira zita rake; Uyai nechipiriso, uyai pamberi pake; Namatai kuna Jehovha mune nguo tsvene.

³⁰Dedera pamberi pake, nyika yose Nyikawo yakasimbiswa kuti irege kuzununguswa.

³¹Kudenga-denga ngakufare, napasi ngapafarisise; Pakati pendudzi ngavati, “Jehovha anobata ushe.”

³²Gungwa ngaritinhire, nokuzara kwaro; Sango ngarifarisise kwazvo, nezvose zviri mariri;

³³Nguva iyo miti yedondo ichaimba nomufaro pamberi paJehovha; Nokuti anouya kuzotonga pasi.

³⁴Vongai Jehovha; nokuti akanaka; Nokuti nyasha dzake dzinogara nokusingaperi.

³⁵Muti, “Tiponesei, Mwari woruponeso rwedu, Mutiunganidze pamwechete, mutirwire pandudzi, Kuti tivonge zita renyu dzvene, Tifarisise pakukurumbidzai.”

³⁶Jehovha Mwari waIsiraeri ngaakudzwe, Kubva pakusingaperi kusvikira pakusingaperi. Vanhu vose vakati, “Ameni,” vakarumbidza Jehovha.

³⁷Zvino akasiyapo pamberi peareka yesungano yaJehovha Asafi nehama dzake, kuti vashumire pamberi peareka nguva dzose, sezvakafanira zuva rimwe nerimwe;

³⁸naObhedhiEdhomu nehama dzavo, makumi matanhatu navasere; naObhedhiEdhomuwo mwanakomana waJedhutuni, naHosa, kuti vave vatariri vemikova;

³⁹nomupristi Zadhoki, nehama dzake vapristi, pamberi petabhenakeri yaJehovha padunhu rakakwirira rakanga riri paGibheoni;

⁴⁰kuti vabayire Jehovha zvipiriso zvinopiswa, nguva dzose, mangwanani namadeko, paaritari yezvipiriso zvinopiswa, sezvakanyorwa zvose mumurayiro waJehovha, waakaraira Isiraeri;

⁴¹uye pamwechete navo Hemani naJedhutuni navamwe vakatsaurwa, vakanga varehwa mazita avo, kuti vavonge Jehovha; nokuti nyasha dzake dzinogara nokusingaperi;

⁴²uye pamwechete navo Hemani naJedhutuni vane hwamanda namakandira, zvaifanira kuridzwa navaridzi, uye zvokuridzira nziyo dzaMwari; uye vanakomana vaJedhutuni kuti vatarire suo.

⁴³Vanhu vose vakaenda mumwe nomumwe kumba kwake; Dhavhidhi akadzoka kuzoropafadza imba yake.