Read Shona Union Version 2002 1 Makoronike 17 Bible Online

1 Makoronike 17 - Shona Union Version 2002 bible

1 Makoronike 17

¹Zvino Dhavhidhi akati agere mumba make, Dhavhidhi akati kumuporofita Natani, “Tarira, ini ndigere muimba yomusidhari, asi areka yesungano yaJehovha igere pasi petende.”

²Natani akati kuna Dhavhidhi, “Itai henyu zvose zviri mumwoyo mwenyu, nokuti Mwari anemi.”

³Zvino nousiku uhwo shoko raMwari rakasvika kuna Natani, richiti,

⁴“Enda unoudza Dhavhidhi muranda wangu, uti, ‘Iwe haungandivakiri imba mandingagara;

⁵nokuti handina kugara mumba kubva pazuva randakandotora vaIsiraeri, kusvikira zuva ranhasi; asi ndakabva patende rimwe ndichienda kune rimwe, napatabhenakeri imwe ndichienda kune imwe.

⁶Pose pandakafamba navaIsiraeri vose, ndakatongotaura here shoko rimwe kune mumwe wavatongi vaIsiraeri vose, vandakaraira kufudza vanhu vangu,’ ndichiti ‘Makaregereiko kundivakira imba yomusidhari?’ ”

⁷Naizvozvo zvino, unofanira kuti kumuranda wangu Dhavhidhi, “Zvanzi naJehovha wehondo, ‘Ndakakutora kumafuro, kwawakanga uchifudza makwai, kuti uve mubati wavanhu vangu vaIsiraeri;

⁸ndikava newe pose pawakafamba, ndikaparadza vavengi vako vose pamberi pako; ndichakuitira zita ringafanana namazita avakuru vari panyika.

⁹Ndichagadzirira vanhu vangu vaIsiraeri nzvimbo, ndichavasima, vagare panzvimbo yavo, varege kubviswazve; navakaipa havangavaparadzizve sapakutanga,

¹⁰nokubva pazuva randakaraira vatongi kuti vabate vanhu vangu vaIsiraeri; uye ndichakunda vavengi vako vose. Uye ndinokuudza kuti Jehovha achakumisira imba.’

¹¹“Zvino kana nguva yako yasvika, yaunofanira kuenda nayo kunamadzibaba ako, ndichamutsa mumwe worudzi rwako ruchakutevera, uchava mumwe wavanakomana vako; ndichasimbisa ushe hwake.

¹²“Iye achandivakira imba, neni ndichasimbisa chigaro chake choushe nokusingaperi.

¹³Ini ndichava baba vake, naiye achava mwanakomana wangu; handingabvisi nyasha dzangu kwaari, sezvandakadzibvisa kuna iye wakakutangira;

¹⁴asi ndichamugarisa mumba mangu nomuushe hwangu nokusingaperi; chigaro chake choushe chichasimbiswa nokusingaperi.”

¹⁵Natani akaudza Dhavhidhi mashoko awa ose, nezvose zvaakaratidzwa.

¹⁶Ipapo mambo Dhavhidhi akapinda, akagara pamberi paJehovha, akati, “Jehovha Mwari, ndini aniko, neimba yangu chinyiko, zvamakandisvitsa kusvikira pano?

¹⁷“Asi chinhu ichi chakanga chiri chiduku pamberi penyu, Mwari, asi makataura pamusoro peimba yomuranda wenyu kusvikira panguva huru inozouya, mukandiitira sezvinoitirwa munhu anokudzwa kwazvo, Jehovha Mwari.

¹⁸Dhavhidhi angareveikozve kwamuri pamusoro pokukudzwa kwomuranda wenyu? Nokuti munoziva muranda wenyu.

¹⁹Jehovha makaita izvi zvikuru zvose nokuda kwomuranda wenyu, uye nokuda kwomwoyo wenyu, kuti muzivise zvinhu izvi zvose zvikuru.

²⁰Jehovha, hakuna mumwe akafanana nemi, hakuna mumwe Mwari asi imi moga, sezvatakanzwa zvose nenzeve dzedu.

²¹Rumwe rudzi ruripiko panyika rwakafanana navanhu venyu vaIsiraeri, vakandodzikinurwa naMwari, vave vanhu vake, kuti imi mukurumbire nezvinhu zvikuru nezvinotyisa, zvamakadzinga ndudzi pamberi pavanhu venyu, vamakadzikinura paIjipiti?

²²Nokuti vanhu venyu vaIsiraeri makavaita vanhu venyu paruzima nokusingaperi; imi Jehovha mukava Mwari wavo.

²³“Zvino Jehovha shoko ramakataura pamusoro pomuranda wenyu napamusoro peimba yake ngarisimbiswe nokusingaperi, muite sezvamakataura.

²⁴Uye zita renyu ngarisimbiswe nokukudzwa nokusingaperi, zvichinzi, ‘Jehovha wehondo ndiye Mwari waIsiraeri; ndiye Mwari kuna Isiraeri;’ imba yaDhavhidhi muranda wenyu ichamiswa pamberi penyu.

²⁵Nokuti imi, Mwari wangu, makazivisa muranda wenyu kuti muchamumisira imba; saka muranda wenyu akatsunga kunyengetera pamberi penyu.

²⁶Zvino Jehovha, ndimi Mwari, makapikira muranda wenyu chinhu ichi;

²⁷zvino makafara nazvo kuropafadza imba yomuranda wenyu, kuti irambe iripo pamberi penyu nokusingaperi; nokuti imi Jehovha makairopafadza zvino icharopafadzwa nokusingaperi.”