Read Shona Union Version 2002 2 Makoronike 11 Bible Online

2 Makoronike 11 - Shona Union Version 2002 bible

2 Makoronike 11

¹Zvino Rehobhoamu akati achisvika Jerusaremu, akaunganidza veimba yaJudha naBhenjamini, varume vakatsaurwa vaiva nezviuru zvine zana namakumi masere, vaigona kurwa, kuti varwe navaIsiraeri, kuti vadzosere ushezve kuna Rehobhoamu.

²Asi shoko raJehovha rakasvika kuna Shemaya munhu waMwari, richiti,

³“Taura naRehobhoamu mwanakomana waSoromoni, mambo waJudha, navaIsiraeri vose paJudha naBhenjamini, uti,

⁴zvanzi naJehovha, ‘Hamufaniri kukwira kundorwa nehama dzenyu; mumwe nomumwe ngaadzokere kumba kwake, nokuti chinhu ichi chinobva kwandiri.’ ” Naizvozvo vakateerera mashoko aJehovha, vakadzoka pakundorwa naJerobhoami.

⁵Rehobhoamu akagara Jerusaremu, akavaka maguta enhare paJudha.

⁶Akavaka Bheterehemu, neEtami, neTekoa,

⁷neBhetizuri, neSoko, neAdhuramu,

⁸neGati, neMaresha, neZifi,

⁹neAdhoraimi, neRakishi, neAzeka,

¹⁰neZora, neAijaroni, neHebhuroni, akanga ari maguta akakombwa paJudha neBhenjamini.

¹¹Akasimbisa nhare, akaisamo vakuru, nezvokudya zvakaunganidzwamo, namafuta, newaini.

¹²Muguta rimwe nerimwe akaisa nhoo namapfumo, akaasimbisa kwazvo kwazvo. Judha naBenjamini vakanga vari vake.

¹³Navapristi navaRevhi, vaiva pakati paIsiraeri yose, vakaungana kwaari, vachibva panyika yavo yose.

¹⁴Nokuti vaRevhi vakabva pamafuro avo nepfuma yavo, vakaenda kwaJudha neJerusaremu; nokuti Jerobhoami navanakomana vake vakavadzinga, kuti varege kubata basa roupristi pamberi paJehovha.

¹⁵Iye akazvitsaurira vapristi vapamatunhu akakwirira, navezvifananidzo zvenhongo dzembudzi, navemhuru dzaakaita.

¹⁶Zvino vose pakati pamarudzi ose avaIsiraeri, vakanga vachitsvaka Jehovha nomwoyo wose, vakavatevera, vakaenda Jerusaremu kuzobayira Jehovha Mwari wamadzibaba avo.

¹⁷Saizvozvo vakasimbisa ushe hwaJudha, vakasimbisa Rehobhoamu mwanakomana waSoromoni, makore matatu; nokuti vakafamba panzira yaDhavhidhi naSoromoni makore matatu.

¹⁸Rehobhoamu akawana mukadzi, Maharati mukunda waJerimoti mwanakomana waDhavhidhi, nowaAbhihairi mukunda waEriabhi mwanakomana waJese.

¹⁹Iye akamuberekera vanakomana, vaiti: Jeushi, naShamaria, naZahami.

²⁰Pashure akawanawo Maaka mukunda waAbhusaromu; iye akamuberekera Abhija, naAtai, naZiza, naSheromiti.

²¹Rehobhoamu akada Maaka mukunda waAbhusaromu kupfuura vakadzi vake vose navarongo vake; (nokuti akawana vakadzi vane gumi navasere navarongo vana makumi matanhatu, akabereka vanakomana vana makumi maviri navasere navanasikana makumi matanhatu.)

²²Rehobhoamu akagadza Abhija mwanakomana waMaaka ave mukuru nomuchinda pakati pavana vababa vake; nokuti akanga achida kumuita mambo.

²³Akaita nokungwara, akaparadzira vanakomana vake vose panyika dzose dzaJudha naBhenjamini kumaguta ose enhare; akavapa zvokudya zvakawanda. Akavatsvakirawo vakadzi vazhinji.