Read Shona Union Version 2002 2 Makoronike 12 Bible Online

2 Makoronike 12 - Shona Union Version 2002 bible

2 Makoronike 12

¹Zvino ushe hwaRehobhoamu hwakati hwasimbiswa, iye ava nesimba, akarasha murayiro waJehovha, navaIsiraeri vose pamwechete naye.

²Zvino pagore rechishanu ramambo Rehobhoamu, Shishaki mambo weIjipiti akasvika kuzorwa neJerusaremu, nokuti vakanga vatadzira Jehovha,

³ane ngoro dzine chiuru chimwe namazana maviri, navatasvi vamabhiza vane zviuru zvina makumi matanhatu, navanhu vakabva naye Ijipiti, vakanga vasingagoni kuverengwa, vaiti: vaRubhimi, navaSukimi, navaItiopia.

⁴Akakunda maguta akakombwa aJudha, akasvika Jerusaremu.

⁵Zvino Shemaya muporofita akasvika kuna Rehobhoamu nokumachinda aJudha akanga akaungana paJerusaremu nemhaka yaShishaki, akati kwavari, “Zvanzi naJehovha, ‘Mandirasha, saka ndakakuregeraiwo paruoko rwaShishaki.’ ”

⁶Ipapo machinda aIsiraeri namambo vakazvininipisa, vakati, “Jehovha akarurama.”

⁷Zvino Jehovha akati achiona kuti vazvininipisa, shoko raJehovha rikasvika kuna Shemaya, richiti, “Vazvininipisa, handingavaparadzi, asi ndobva ndovarwira; kutsamwa kwangu hakungadururwi pamusoro peJerusaremu noruoko rwaShishaki.

⁸Kunyange zvakadaro vachava varanda vake; kuti vazive kuti zvakadini kundishumira ini nokushumira ushe hwenyika dzimwe.”

⁹Naizvozvo Shishaki mambo weIjipiti akandorwa neJerusaremu, akatora pfuma yeimba yaJehovha, nepfuma yeimba yamambo; akazvitora zvose; akatorawo nhoo duku dzose dzendarama dzakaitwa naSoromoni.

¹⁰Ipapo mambo Rehobhoamu akaita panzvimbo yazvo nhoo duku dzendarira, akadziisa pamaoko avakuru vavarindi, vairinda mukova weimba yamambo.

¹¹Zvino nguva dzose kana mambo achipinda mumba maJehovha, varindi vaidzibata, ndokudzidzoserazve mumba mavarindi.

¹²Zvino akati azvininipisa, kutsamwa kwaJehovha kukabviswa kwaari, akasaparadzwa chose; uyezve, kuna Judha zvimwe zvakanaka zvakawanikwa.

¹³Nokudaro mambo Rehobhoamu akazvisimbisa paJerusaremu, akabata ushe; nokuti Rehobhoamu akanga ana makore makumi mana nerimwe pakutanga kwake kubata ushe, akabata ushe paJerusaremu makore ane gumi namanomwe, iro guta rakanga ratsaurwa naJehovha pamarudzi ose aIsiraeri, kuti aise zita rakemo; zita ramai vake rakanga riri Naama muAmoni.

¹⁴Akaita zvakaipa, nokuti haana kushingaira kutsvaka Jehovha.

¹⁵Zvino mabasa aRehobhoamu, okutanga nookupedzisira, haana kunyorwa here mumashoko omuporofita Shemaya, noomuoni Idho, mazita amadziteteguru achiverengwawo? Zvino kurwa kwakanga kuripo pakati paRehobhoamu naJerobhoami nguva dzose.

¹⁶Rehobhoamu akavata namadzibaba ake, akavigwa muguta raDhavhidhi; Abhija mwanakomana wake akamutevera paushe.