Read Shona Union Version 2002 2 Makoronike 25 Bible Online

2 Makoronike 25 - Shona Union Version 2002 bible

2 Makoronike 25

¹Amazia akanga ana makore makumi maviri namashanu pakutanga kwake kubata ushe; akabata ushe paJerusaremu makore makumi maviri namapfumbamwe; zita ramai vake rakanga riri Jehoadhani weJerusaremu.

²Iye akaita zvakarurama pamberi paJehovha, asi haana kuita nomwoyo wose.

³Zvino akati asimba paushe hwake, akauraya varanda vake vakauraya mambo baba vake.

⁴Asi haana kuuraya vana vavo, asi akaita sezvakanyorwa pamurayiro pabhuku yaMosesi, sezvakarairwa naJehovha, achiti, “Madzibaba haafaniri kufira vana vavo, navana havafaniri kufira madzibaba avo; asi munhu mumwe nomumwe anofanira kufira zvivi zvake.”

⁵Amazia akaunganidzawo vaJudha, akagadza pamusoro pavo vatariri vezviuru navatariri vamazana nedzimba dzamadzibaba avo, ivo vaJudha vose navaBhenjamini; akavaverenga, vose vamakore ana makumi maviri navakapfuura, akavawana vari varume vane zviuru zvina mazana matatu vakatsaurwa, vaigona kurwa, vaigona kurwa nepfumo nenhoo.

⁶Akaripirawo varume vane simba noumahare vane zviuru zvine zana vavaIsiraeri, akavapa matarenta ane zana esirivha.

⁷Asi mumwe munhu waMwari akauya kwaari, akati, “Haiwa, mambo, hondo yavaIsiraeri ngairege kuenda nemi, nokuti Jehovha haapo panaIsiraeri, pavana vaEfuraimu vose.

⁸Asi endai imi moga, shingai murwe nesimba; Mwari angakukundisai navavengi here? Nokuti Mwari ane simba rokubatsira nerokukundisa.”

⁹Ipapo Amazia akati kumunhu waMwari, “Zvino tichaita seiko pamusoro pamatarenta ane zana andakapa pfumo ravaIsiraeri?” Munhu waMwari akapindura, akati, “Jehovha anogona kukupai zvinopfuura izvozvo kwazvo.”

¹⁰Ipapo Amazia akavaraura, iro pfumo rakanga rauya kwaari richibva kwaEfuremu, kuti vadzokerezve kumusha; nemhaka iyo vakatsamwira Judha kwazvo, vakadzokera kumusha vatsamwa kwazvo.

¹¹Zvino Amazia akatsunga mwoyo, akatungamirira vanhu vake, akaenda kuMupata woMunyu, akauraya vana vaSeiri vane zviuru zvine gumi.

¹²Vana vaJudha vakatapa vane zviuru zvine gumi vari vapenyu, vakaenda navo pamusoro pedombo, vakavakandira pasi padombo, vakavhunikanya vose.

¹³Asi varume vehondo vakanga vadzoswa naAmazia, kuti varege kundorwa naye, vakandowira maguta aJudha, kubva paSamaria kusvikira paBhetihoroni, vakauraya vanhu vane zviuru zvitatu kwavari, vakapambara zvizhinji.

¹⁴Zvino Amazia akati achidzoka pakuuraya vaEdhomu, akauya navamwari vavana vaSeiri, akavaita vamwari vake, akavapfugamira, nokuvapisira zvinonhuwira.

¹⁵Saka Jehovha akatsamwira Amazia, akatuma muporofita kwaari; iye akati kwaari, “Wakabvunzireiko vamwari vavanhu vakakoniwa kurwira vanhu vavo pamaoko ako?”

¹⁶Zvino wakati achataura naye, mambo akati kwaari, “Takakuita gurukota ramambo here? Nyarara, uchaurayirweiko?” Ipapo muporofita akanyarara, asi akati, “Ndinoziva kuti Mwari anofunga kukuparadza, nokuti wakaita izvozvi, ukasaterera zvandakakuraira.”

¹⁷Ipapo Amazia mambo waJudha akatsvaka zano, akatuma kuna Joashi mwanakomana waJehoahazi, mwanakomana waJehu, mambo waIsiraeri, akati, “Uya tirwe.”

¹⁸Joashi mambo waIsiraeri akatuma shoko kuna Amazia mambo waJudha, akati, “Rukato rwakanga ruri paRebhanoni rwakatuma shoko kumusidhari wakanga uri paRebhanoni, rukati, ‘Ipa mwanakomana wangu mukunda wako ave mukadzi wake;’ zvino imwe mhuka yakanga iri paRebhanoni ikapfuurapo, ikatsika-tsika rukato.

¹⁹“Iwe unoti, ‘Tarira wakunda Edhomu; zvino mwoyo wako wava namanyawi, wozvikudza; gara hako zvino kumusha kwako; nokuti uchatsvakireiko njodzi, uwiremo, iwe naJudha pamwechete newe?’ ”

²⁰Asi Amazia akaramba kunzwa; nokuti zvakanga zvichibva kuna Mwari, kuti avaise mumaoko avavengi vavo; nokuti vakanga vatevera vamwari vaEdhomu.

²¹Naizvozvo Joashi mambo waIsiraeri akaenda; iye naAmazia mambo waJudha vakarwa paBhetishemeshi riri paJudha.

²²Judha vakakundwa naIsiraeri, mumwe nomumwe akatizira kutende rake.

²³Joashi mambo waIsiraeri akasunga Amazia mambo waJudha, mwanakomana waJoashi, mwanakomana waJehoahazi, paBhetishemeshi, akaenda naye Jerusaremu, akaputsa rusvingo rweJerusaremu, kubva pasuo raEfuremu kusvikira pasuo rapakona, makubhiti ana mazana mana.

²⁴Akatora ndarama yose nesirivha, nemidziyo yose yakawanikwa mumba maMwari kuna ObhedhiEdhomu, nepfuma yomumba mamambo, navanhu kuzova rubatso, akadzokera Samaria.

²⁵Zvino Amazia mwanakomana waJoashi mambo waJudha wakagara ari mupenyu makore ane gumi namashanu shure kwokufa kwaJoashi mwanakomana waJehoahazi mambo waIsiraeri.

²⁶Zvino mamwe mabasa aAmazia, okutanga nookupedzisira, tarirai, haana kunyorwa here mubhuku yamadzimambo aJudha naIsiraeri?

²⁷Zvino kubva panguva yakarega Amazia kutevera Jehovha, vakamurangana, vakamumukira paJerusaremu; iye ndokutizira Rakishi; asi vakatuma vanhu Rakishi vachimutevera, vakamuurayirapo.

²⁸Vakauya naye pamabhiza, vakamuviga kumadzibaba ake muguta raJudha.