Read Shona Union Version 2002 Ezira 5 Bible Online

Ezira 5 - Shona Union Version 2002 bible

Ezira 5

¹Zvino vaporofita, vaiti muporofita Hagai, naZekariya mwanakomana waIdho, vakaporofitera vaJudha vakanga vari paJudha neJerusaremu; vakaporofitera nezita raMwari waIsiraeri.

²Ipapo Zerubhabheri mwanakomana waShearitieri, naJeshua mwanakomana waJozadhaki, vakasimuka, vakatanga kuvaka imba yaMwari paJerusaremu; vaporofita vaMwari, vakanga vanavo, vachivabatsira.

³Zvino panguva iyo Tatenai, mubati wenyika mhiri kworwizi, naShetaribhozenai, namakurukota avo vakasvika kwavari, vakati kwavari, “Makarairwa nani kuvaka imba iyi, nokupedza rusvingo urwu here?”

⁴Ipapo vakataurawo navo, vakati, “Mazita avarume vanovaka imba iyi ndivanaani?”

⁵Asi ziso raMwari wavo rakanga rakatarira vakuru vavaJudha, vakakoniwa kuvaregesa basa, kusvikira mhaka yaiswa kuna Dhariusi nemhinduro pamusoro payo ichizodzoka nen’wadhi.

⁶Ndiwo mashoko en’wadhi yakatumirwa mambo Dhariusi naTatenai mubati mhiri kworwizi, naShetaribhozenai, nemakurukota ake vaAfarishaki, vakanga vari mhiri kworwizi;

⁷vakamutumira nwadhi makanga makanyorwa kudai, “Kuna mambo Dhariusi, rugare rwose ngaruve nemi.

⁸“Mambo ngaaziviswe kuti takaenda kurutivi rwenyika yaJudha, kuimba yaMwari mukuru, inovakwa namabwe makuru, uye matanda anoiswa mumasvingo; basa iri rinoshingairirwa, rinopfuurira mberi zvakanaka pamaoko avo.

⁹Zvino takabvunza vakuru ivavo, tikati kwavari, ‘Ndianiko wakakurairai kuvaka imba iyi nokupedza rusvingo urwu?’

¹⁰Takavabvunzawo mazita avo, kuti tikuzivisei, tinyore mazita avarume vanovatungamirira.

¹¹“Vakapindura vachiti, ‘Isu tiri varanda vaMwari wokudenga napasi, tinovaka imba yakadeya kuvakwa makore mazhinji akapfuura, yakavakwa nomumwe mambo mukuru waIsiraeri, ikapera.’

¹²“Asi madzibaba edu akati atsamwisa Mwari wokudenga, iye akavaisa mumaoko aNebhukadhenezari mambo weBhabhironi, muKaradhea; iye akaparadza imba ino, akatapa vanhu, ndokuenda navo Bhabhironi.

¹³Asi negore rokutanga raKoreshi mambo weBhabhironi, mambo Koreshi akaraira, kuti imba ino yaMwari ivakwe.

¹⁴Nemidziyo yendarama neyesirivha yeimba yaMwari, yakanga yatorwa naNebhukadhinezari patemberi yaiva Jerusaremu, ikaiswa mutemberi yeBhabhironi, mambo Koreshi akabvisa izvozvo mutemberi yeBhabhironi, zvikapiwa mumwe wainzi Sheshibhazari, waakanga aita mubati;

¹⁵akati kwaari, ‘Tora midziyo iyi, undoiisa mutemberi iri Jerusaremu, imba yaMwari ivakwe panzvimbo yayo.

¹⁶Ipapo uyu Sheshibhazari wakauya, akateya nheyo dzeimba yaMwari iri Jerusaremu; zvino kubva panguva iyo kusvikira zvino yakaramba ichivakwa, nazvino ichigere kupera.’

¹⁷“Naizvozvo zvino, kana mambo achifara nazvo, ngavanzvere muimba yepfuma yamambo iri Bhabhironi, vawone kana zviri izvo, kana mambo Koreshi akaraira kuti imba ino yaMwari ivakwe Jerusaremu, mambo agotizivisa kuda kwake pamusoro pemhaka iyi.”