Read Shona Union Version 2002 Nehemiya 10 Bible Online

Nehemiya 10 - Shona Union Version 2002 bible

Nehemiya 10

¹Zvino vakasimbisa sungano ndivava: Nehemiya, mubati, mwanakomana waHakaria, naZedhekia;

²naSeraya, naAzaria, naJeremiya;

³naPashuri, naAmaria, naMarikiya;

⁴naHatushi, naShebhania, naMaruki;

⁵naHarimi, naMeremoti, naObhadhiya;

⁶naDhanieri, naGinetoni, naBharuki;

⁷naMeshurami, naAbhiya, naMijamini;

⁸naMaazia, naBhirigai, naShemaya; ndivo vaiva vapristi.

⁹Uye vaRevhi ava: Jeshua, mwanakomana waAzania, naBhinui, wavanakomana vaHenadhadhi, naKadhimieri;

¹⁰nehama dzavo: Shebhania, naHodhia, naKerita, naPeraya, naHanani;

¹¹naMika, naRehobhi, naHashabhia;

¹²naZakuri, naSherebhia, naShebhania;

¹³naHodhia, naBhani, naBheninu;

¹⁴uye vakuru vavanhu ava: Paroshi, naPahatimoabhi, naErami, naZatu, naBhani;

¹⁵naBhuni, naAzigadhi, naBhebhai;

¹⁶naAdhonia, naBhigivhadhi, naAdhini;

¹⁷naAteri, naHezekia, naAzuri;

¹⁸naHodhia, naHashumi, naBhezai;

¹⁹naHarifi, naAnatoti, naNobhai;

²⁰naMagipiashi, naMeshurami, naHezeri;

²¹naMeshezabheri, naZadhoki, naJadhua;

²²naPeratia, naHanani, naAnaya;

²³naHoshea, naHanania, naHashubhi;

²⁴naHaroheshi, naPiriha, naShobheki;

²⁵naRehumi, naHashabhina, naMaaseya;

²⁶naAhiya; naHanani, naAnani;

²⁷naMaruki, naHarimi, naBhaana.

²⁸Asi vamwe vanhu, ivo vapristi, navaRevhi, navarindi vemikova, navaimbi, navaNetinimi, navose vakanga vazviraura pavanhu venyika iyo kuchengeta murau waMwari, navakadzi vavo, navanakomana vavo, navakunda vavo, mumwe nomumwe akanga achiziva nokunzwisisa,

²⁹vakanamatira hama dzavo, ivo vakuru, vakazvisunga nokutukwa nokupika kuti vachafamba nomurau waMwari, wavakapiwa naMosesi muranda waMwari, nokurangarira nokuita mirairo yose yaJehovha Ishe wedu, nezvaakatonga nezvaakatema;

³⁰uye kuti hatingapi vanhu venyika vakunda vedu kana kutorera vakomanavedu vakunda vavo;

³¹uye kuti kana vanhu venyika vakauya nezvinhu zvavo, kana zvokudya zvipi nezvipi, kuzotengesa nezuva reSabata, isu hatingavatengeri neSabata, kana panerimwe zuva dzvene; uye kuti ticharegera nyika pagore rechinomwe nokusareva zvikwerete zvose.

³²Takazviitirawo mutemo kuti ticharipira basa reimba yaMwari wedu chetatu cheshekeri pagore rimwe nerimwe;

³³basa rezvingwa zvokuratidza, nechipiriso choupfu chenguva dzose, nechipiriso chinopiswa nguva dzose, rapamaSabata, napakugara kwemwedzi, napane mimwe mitambo yakataurwa, nerezvimwe zvinhu zvitsvene, nerezvipiriso zvezvivi zvokuyananisira vaIsiraeri nazvo, neramabasa ose muimba yaMwari wedu.

³⁴Tikakanda mijenya, isu vapristi navaRevhi navanhu, pamusoro pezvipo zvehuni, kuti tiuye nadzo mumba maMwari wedu, namadzoro edzimba dzamadzibaba edu, panguva dzakatarwa gore rimwe nerimwe, kuti dziveserwe paaritari yaJehovha Mwari wedu, sezvakanyorwa pamurayiro;

³⁵tikazvisunga kuti tichauya nezvitsva zveminda yedu, nezvitsva zvezvibereko zvose zvemiti yamarudzi ose, gore rimwe nerimwe kumba kwaJehovha;

³⁶namatangwe avanakomana vedu navana vemhongora dzezvipfuwo zvedu, sezvakanyorwa pamurau, navana vemhongora dzemombe dzedu namakwai edu, kuti tiuye nazvo kumba kwaMwari wedu, nokuvapristi vanobata mumba maMwari wedu;

³⁷uye kuti tichauya nezvitsva zvoupfu, nezvezvipiriso zvinotsaurwa, nezvibereko zvemiti yamarudzi ose, zvewaini nezvamafuta, kuvapristi, kumakamuri eimba yaMwari wedu, nezvegumi zveminda yedu kuvaRevhi, nokuti vaRevhi ndivo vanopiwa zvegumi zvezvinorimwa nesu pamaguta ose.

³⁸Mupristi mwanakomana waAroni anofanira kuva navaRevhi kana vaRevhi vachitora zvegumi; zvino vaRevhi vanofanira kuuya nechegumi chezvegumi kuimba yaMwari wedu kumakamuri eimba yepfuma.

³⁹Nokuti vana vaIsiraeri navana vaRevhi vanofanira kuuya nechipiriso chinotsaurwa chezviyo, newaini, namafuta, kumakamuri mune midziyo yeimba tsvene nokuvapristi vanobatamo, navarindi vemikova, navaimbi; hatingarashi imba yaMwari wedu.