Read Shona Union Version 2002 Esiteri 6 Bible Online

Esiteri 6 - Shona Union Version 2002 bible

Esiteri 6

¹Zvino usiku uhwo mambo akashaiwa hope, akaraira kuti vauye nebhuku yamashoko amakoronike, akaravirwa mambo.

²Vakawana kuti pakanyorwa kuti Modhekai akadeya kuzivisa mashoko aBhigitana naTereshi, varanda vaviri vamambo pakati pavarindi vomukova, vakatsvaka kuuraya mambo Ahashivheroshi.

³Ipapo mambo akati, “Modhekai akakudzwa nokurumbidzwa seiko pamusoro pechinhu ichi?” Varanda vamambo vaimubatira vakati, “Haana chaakaitirwa.”

⁴Mambo akati, “Ndianiko uri paruvanze?” Zvino Hamani akanga apinda paruvanze rwokunze kweimba yamambo, achida kukumbira kuna mambo kuti Modhekai asungirirwe namatanda aakanga amugadzirira.

⁵Varanda vamambo vakati kwaari, “Tarirai Hamani umire paruvanze.” Mambo akati, “Ngaapinde.”

⁶Naizvozvo Hamani akapinda. Mambo akati kwaari, “Munhu, mambo waanoda kumukudza, angaitirweiko?” Zvino Hamani akati mumwoyo make, “Mambo vangada kukudza aniko, asi ini?”

⁷Hamani akati kuna mambo, “Iye munhu, mambo waanoda kukudza,

⁸ngaatorerwe nguo dzoushe, idzo dzinosifukwa namambo, nebhiza rinositasva namambo, nekorona youshe inosidzikwa pamusoro wake;

⁹zvino nguo nebhiza ngazviiswe pamaoko omumwe wamachinda amambo anokudzwa kwazvo, kuti vafukidze munhu uyo, mambo waanoda kukudza, vagomufambisa munzira dzomuguta, akatasva bhiza, vadanidzire pamberi pake, vachiti, ‘Munhu, mambo waanoda kukudza, ngaaitirwe saizvozvo.’ ”

¹⁰Ipapo mambo akati kuna Hamani, “Chimbidzika utore nguo nebhiza, sezvawataura, undoitira Modhekai muJudha saizvozvo, iye agere pasuo ramambo; usarega shoko rimwe pamashoko ose awataura.”

¹¹Zvino Hamani akatora nguo nebhiza, akafukidza Modhekai, akamufambisa panzira dzomuguta akatasva bhiza, akadanidzira pamberi pake, achiti, “Ndizvo zvichaitirwa munhu uyo mambo waanoda kukudza.”

¹²Zvino Modhekai akadzokera kusuo ramambo. Asi Hamani akachimbidzika kuenda kumba kwake achichema, akafukidza musoro wake.

¹³Hamani akarondedzera kuna Zereshi mukadzi wake neshamwari dzake dzose zvose zvaakaitirwa. Ipapo shamwari dzake dzakangwara naZereshi mukadzi wake vakati kwaari, “Kana Modhekai uyu wawakatanga kuwa pamberi pake ari worudzi rwavaJudha, haungakundi, asi zvirokwazvo uchawa pamberi pake.”

¹⁴Vakati vachataura naye, varanda vamambo vakasvika, vakachimbidzika kuenda naHamani kumafundo akanga agadzirwa naEsiteri.