Read Shona Union Version 2002 EKISODHO 20 Bible Online

EKISODHO 20 - Shona Union Version 2002 bible

EKISODHO 20

¹Zvino Mwari akataura mashoko awa ose, akati,

²“Ndini Jehovha, Mwari wako, akakubvisa munyika yeIjipiti, muimba youranda.

³“Usava navamwe vamwari kunze kwangu.

⁴“Usazviitira mufananidzo wakavezwa, kana uri mufananidzo wechinhu chiri kudenga kumusoro, kana wechiri panyika pasi, kana wechiri mumvura pasi penyika.

⁵Usapfugamira izvozvo, kana kuzvishumira; nokuti ini Jehovha, Mwari wako, ndiri Mwari ane godo; ndinorova vana nokuda kwezvivi zvamadzibaba avo, kusvikira kurudzi rwechitatu norwechina rwavanondivenga;

⁶ndichaitira nyasha vane zviuru zvamazana vanondida, vanochengeta mirairo yangu.

⁷“Usareva zita raJehovha Mwari wako pasina; nokuti Jehovha haangaregi kupa mhosva anoreva zita rake pasina.

⁸“Rangarira zuva reSabata, kuti urichengete rive dzvene.

⁹Ubate mazuva matanhatu, uite mabasa ako ose;

¹⁰asi zuva rechinomwe iSabata raJehovha Mwari wako; usatongobata mabasa naro, iwe, kana mwanakomana wako, kana mwanasikana wako, kana muranda wako, kana murandakadzi wako, kana zvipfuwo zvako, kana mweni wako ari mukati mamasuo ako,

¹¹nokuti namazuva matanhatu Jehovha akaita denga napasi, negungwa, nezvose zviri mukati mazvo, akazorora nezuva rechinomwe; naizvozvo Jehovha akaropafadza zuva reSabata akariita dzvene.

¹²“Kudza baba vako namai vako, kuti mazuva ako ave mazhinji panyika yaunopiwa naJehovha Mwari wako.

¹³“Usauraya munhu

¹⁴“Usaita upombwe

¹⁶“Usapupurira wokwako nhema.

¹⁷“Usachiva imba yowokwako, usachiva mukadzi wowokwako, kana muranda wake, kana murandakadzi wake, kana nzombe yake, kana mbongoro yake, kana chimwe chowokwako.”

¹⁸Vanhu vose vakaona kutinhira, nemheni, nezwi rehwamanda, negomo rinopfungaira, zvino vanhu vakati vachiona izvozvo, vakadedera vakamira kure.

¹⁹Vakati kuna Mosesi, “Imi chitaurai henyu nesu, tinzwe; asi Mwari ngaarege kutaura nesu, tirege kufa.”

²⁰Mosesi akati kuvanhu, “Musatya henyu, nokuti Mwari akauya kuzokuidzai, kuti mugare muchimutya, murege kutadza.”

²¹Vanhu vakamira kure, Mosesi akaswedera kurima guru kwakanga kuna Mwari.

²²Jehovha akati kuna Mosesi, “Iti kuvana vaIsiraeri, ‘Imi makaona mumene kuti ndakataura nemi ndiri kudenga.

²³Musaita vamwe vamwari pamwechete neni; musazviitira vamwari vesirivha kana vamwari vendarama.’

²⁴Undiitire atari yevhu, ubayire pamusoro payo zvipiriso zvako zvinopiswa nezvipiriso zvako zvokuyananisa, namakwai ako nenzombe dzako; panzvimbo imwe neimwe pandicharangaridza zita rangu, ndichauyapo kwauri, ndichikuropafadza.

²⁵Zvino kana uchindivakira atari yamabwe, urege kuivaka namabwe akavezwa, nokuti kana ukasimudzira mbezo yako pamusoro pebwe, warisvibisa.

²⁶Rega kukwirawo kuatari yangu nezvikwiriso, kuti kunyasi kwako kurege kufukurwa kwairi.”