Read Shona Union Version 2002 EKISODHO 25 Bible Online

EKISODHO 25 - Shona Union Version 2002 bible

EKISODHO 25

¹Zvino Jehovha akataura naMosesi akati,

²“Taura navana vaIsiraeri kuti vandipe chipo; munditorere chipo kune mumwe nomumwe anoda kundiitira izvozvo nomwoyo wake.

³Ndicho chipo chamunofanira kutora kwavari: Ndarama, nesirivha, nendarira,

⁴nezvakarukwa zvitema, nezvishava, nezvitsvuku, nemicheka yakaisvonaka, nemvere dzembudzi,

⁵namatehwe amakondohwe akazodzwa zvitsvuku, namatehwe amatenhe, namatanda omuakasia,

⁶namafuta emwenje, nezvinonhuwira zvamafuta okuzodza, noupfu unonhuwira,

⁷nezvibwe zveonikisi, nezvibwe zvokuisa paefodhi napahombodo yechipfuva.

⁸Ngavandiitire nzvimbo tsvene, kuti ndigare pakati pavo;

⁹sezvandichakuratidza zvose, iwo mufananidzo wetabhenakeri, nomufananidzo wenhumbi dzayo dzose, munofanira kuita saizvozvo.

¹⁰“Ngavaite areka yamatanda omuakasia, kureba kwayo kunofanira kuva makubhiti maviri nehafu, noupamhi hwayo kubhiti rimwe nehafu, nokukwira kwayo kubhiti rimwe nehafu.

¹¹“Unofanira kuifukidza nendarama yakaisvonaka, uifukidze nechomukati nechokunze, uite pamusoro payo hata yendarama inoipoteredza.

¹²Uiumbire zvindori zvina zvendarama, uzviise pamakumbo ayo mana, zvindori zviviri zvive parutivi rumwe, nezvindori zviviri panorumwe rutivi.

¹³Uveze matanda omuakasia, ndokuafukidza nendarama.

¹⁴Ugopinza matanda iwayo muzvindori zviri panhivi dzeareka, kuti areka itakurwe nawo.

¹⁵Matanda anofanira kugara muzvindori zveareka, ngaarege kubviswa kwazviri.

¹⁶Zvino unofanira kuisa mukati meareka chipupuriro chandichakupa.

¹⁷Uitewo chifunhiro chokuyananisa nendarama yakaisvonaka; kureba kwacho makubhiti maviri nehafu; noupamhi hwacho kubhiti rimwe nehafu.

¹⁸Uitewo makerubhi maviri endarama uaite nendarama yakapambadzirwa pamiromo miviri yechifunhiro chokuyananisa.

¹⁹Ita kerubhi rimwe pamuromo mumwe nerimwe kerubhi pano mumwe muromo; uite makerubhi pamiromo yacho miviri zvive chinhu chimwe nechifunhiro chokuyananisa.

²⁰Makerubhi atambanudzire mapapiro avo kumusoro, akafukidza chifunhiro chokuyananisa.

²¹Uise chifunhiro chokuyananisa pamusoro peareka, ugoisa mukati meareka chipupuriro chandichakupa.

²²Ndipo pandichasangana newe, nditaure newe, ndiri pamusoro pechifunhiro chokuyananisa, pamusoro peareka yechipupuriro, ndikuudze zvose zvandichakupa, kuti uraire vanhu vaIsiraeri.

²³“Itawo tafura yamatanda omuakasia; kureba kwayo makubhiti maviri, noupamhi hwayo kubhiti nokukwirira kwayo kubhiti rimwe nehafu.

²⁴Uifukidze nendarama yakaisvonaka, ugoiitirawo hata yendarama inoipoteredza.

²⁵Uiitire ukomba unoipoteredza, unoupamhi sohwechanza, ugoiitirawo hata yendarama inopoteredza ukomba hwayo.

²⁶Uiitire zvindori zvina zvendarama, ugoisa zvindori pamakona mana ari pamakumbo ayo mana.

²⁷Zvindori zvive pedyo noukomba, pave pokutakura tafura napo namatanda.

²⁸Matanda uaite nomuakasia, uafukidze nendarama, tafura igotakurwa nawo.

²⁹Uitewo midziyo yayo, nembiya dzayo, nezvirongo zvayo, nemikombe yayo yokudira nayo; uzviite nendarama yakaisvonaka.

³⁰Misi yose unofanira kuisa pamberi pangu patafura chingwa chokuratidza.

³¹“Unofanira kuitawo chigadziko chemwenje chendarama yakaisvonaka; chigadziko chiitwe nendarama yakapambadzirwa, chigadziko chacho, nehunde yacho, nezvimbiya zvacho, namapfundo acho, namaruva acho; zvose ngazviitwe chive chinhu chimwe nacho;

³²kumativi acho ngakubude matavi matanhatu; matavi matatu echigadziko kuno rumwe rutivi rwacho, namatavi matatu echigadziko kuno rumwe rutivi rwacho.

³³Ngapave nezvimbiya zvitatu zvakaumbwa samaruva omuamanda padavi rimwe, nepfundo, neruva, nezvimbiya zvitatu zvakaumbwa samaruva omuamanda pane rimwe davi, nepfundo, neruva: saizvozvo matavi matanhatu anobuda pachigadziko;

³⁴uye pachigadziko pave nezvimbiya zvina zvakaumbwa samaruva azvo;

³⁵nepfundo panyasi pamatavi maviri akaumbwa pamwechete nacho, nepfundo panyasi pamamwe matavi akaumbwa pamwechete nacho, nepfundo panyasi pamatavi maviri akaumbwa pamwechete nacho, akafanana namatavi matanhatu anobuda pachigadziko.

³⁶Mapfundo azvo namatavi azvo ngazvive pamwechete nazvo; zvose zvive chinhu chimwe chakaumbwa nendarama yakaisvonaka yakapambadzirwa.

³⁷Uitewo mwenje yacho minomwe; vagotungidza mwenje yacho, kuti ivhenekere pamberi pacho.

³⁸Nembato dzacho, nendiro dzacho, nemwenje yacho, zviumbwe nendarama yakaisvonaka.

³⁹Ngazviumbwe netarenda rendarama yakaisvonaka, pamwechete nemidziyo iyoyo yose.

⁴⁰“Uchenjerere kuti uzviite nomufananidzo wazvo wawakaratidzwa pagomo.