Read Shona Union Version 2002 EKISODHO 4 Bible Online

EKISODHO 4 - Shona Union Version 2002 bible

EKISODHO 4

¹Zvino Mosesi akapindura akati, “Asi tarirai, havanganditendi, kana kuteerera izwi rangu, nokuti vachati, ‘Jehovha haana kuzviratidza kwauri.’ ”

²Jehovha akati kwaari, “Chiiko icho chiri muruoko rwako?” Akati, “Itsvimbo.”

³Akati, “Ikandire pasi.” Akaikandira pasi, ikashanduka kuvanyoka, Mosesi akaitiza.

⁴Zvino Jehovha akati kuna Mosesi, “Tambanudza ruoko rwako, uibate parumhinda; (iye akatambanudza ruoko rwake, akaibata, ikashanduka kuvatsvimbo muruoko rwake);

⁵kuti vatende kuti ndini Jehovha, Mwari wamadzibaba avo, Mwari waAbhurahamu, naMwari waIsaka, naMwari waJakobho, akazviratidza kwauri.”

⁶Jehovha akatiwo kwaari, “Isa ruoko rwako muchipfuva chako.” Akaisa ruoko rwake muchipfuva chake; zvino akati achirubvisa, onei ruoko rwake rwava namaperembudzi rwati mbembe sechando.

⁷Akati, “Isa ruoko rwako muchipfuva chakozve. (Iye akaisa ruoko rwake muchipfuva chakezve; zvino akati achirubvisa muchipfuva chake, onei rwashandukazve senyama yake.)

⁸Zvino kana vachiramba kukutenda, kana kuteerera izwi rechiratidzo chokutanga, vachatenda izwi rechiratidzo chechipiri.

⁹Zvino kana vachiramba kutenda zviratidzo izvo zviviri, kana kutenda izwi rako, uchere mvura yomurwizi, uidururire pakaoma, ipapo mvura yawachera ichashanduka ropa ipapo pakaoma.”

¹⁰Zvino Mosesi akati kuna Jehovha, “Haiwa, Jehovha, handizi munhu anogona kutaura zvakanaka, kunyange zuro, kana zuro riya, kana kubva panguva yamakataura nomuranda wenyu; nokuti ndiri munhu anomuromo usingagoni norurimi rusingagoni.”

¹¹Jehovha akati kwaari, “Ndianiko akaita muromo womunhu, ndianiko anoita mbeveve kana matsi, kana anoona, kana bofu? Ko handizi Jehovha here?

¹²Naizvozvo zvino chienda, ini ndichava muromo wako, ndikudzidzise zvaunofanira kutaura.”

¹³Iye akati, “Haiwa, Ishe, tumai henyu wamunoda kutuma naye.”

¹⁴Zvino kutsamwa kwaJehovha kwakamukira Mosesi, akati, “Ko Aroni, mukoma wako, muRevhi, haapo here? Ndinoziva kuti iye anogona kutaura kwazvo. Zvino tarira, wotobuda kusangana newe; kana achikuona achafara mumwoyo make.

¹⁵Utaure naye, ugoisa mashoko mumuromo make; ini ndichava nomuromo wako, uye nomuromo wake, ndikudzidzisei zvamunofanira kuita.

¹⁶“Iye achataura navanhu panzvimbo yako, agova muromo wako, iwe uchava saMwari kwaari.

¹⁷Zvino tora tsvimbo iyi muruoko rwako, ugoita zviratidzo nayo.”

¹⁸Zvino Mosesi akaenda, akadzokera kuna Jeturo, mukarabwe wake, akati kwaari, “Donditenderai henyu kuenda, ndidzokere kuhama dzangu Ijipiti, ndindoona kana vachiri vapenyu.” Jeturo akati kuna Mosesi, “Enda hako norugare.”

¹⁹Zvino Jehovha akati kuna Mosesi paMidhiani, “Enda, udzokere Ijipiti, nokuti vanhu vose vaitsvaka kukuuraya vakafa.”

²⁰Ipapo Mosesi akatora mukadzi wake navana vake vavakomana, akavatasvisa pambongoro, akadzokera kunyika yeIjipiti; Mosesi akatora tsvimbo yaMwari muruoko rwake.

²¹Jehovha akati kuna Mosesi, “Kana wodzokera Ijipiti, chenjera kuti uite pamberi paFarao zvishamiso zvose zvandaisa muruoko rwako; asi ndichaomesa mwoyo wake, kuti arege kutendera vanhu kuenda.

²²Zvino undoti kuna Farao, ‘Zvanzi naJehovha, Isiraeri, mwanakomana wangu, idangwe rangu’;

²³ndakati kwauri, ‘Tendera mwanakomana wangu kuenda andinamate’; iwe ukaramba kumutendera; zvino tarira ndichauraya mwanakomana wako wedangwe.”

²⁴Zvino vachiri panzira, pavakanga vavata, Jehovha akasangana naye, akatsvaka kumuuraya.

²⁵Ipapo Zipora akatora ibwe rinopinza, akacheka rukanda rwapamberi rwomwanakomana wake, akarukanda patsoka dzake akati, “Zvirokwazvo, uri chikomba cheropa kwandiri.”

²⁶Naizvozvo akamurega. Ipapo akati, “Uri chikomba cheropa nokuda kwokudzingiswa.”

²⁷Zvino Jehovha akati kuna Aroni, “Enda kurenje undosangana naMosesi.” Iye akaenda, akandosangana naye pagomo raMwari, akamutsvoda.

²⁸Ipapo Mosesi akaudza Aroni mashoko ose aJehovha, aakanga amutuma nawo, nezviratidzo zvose zvaakanga amuraira.

²⁹Mosesi naAroni vakaenda, vakaunganidza vakuru vose vavana vaIsiraeri.

³⁰Aroni akataura mashoko ose akataurwa naJehovha kuna Mosesi, akaita zviratidzo pamberi pameso avanhu.

³¹Vanhu vakatenda; zvino vakati vanzwa kuti Jehovha washanyira vana vaIsiraeri, akaona kunetswa kwavo, vakakotamisa misoro yavo, vakanamata Jehovha.