Read Shona Union Version 2002 EKISODHO 40 Bible Online

EKISODHO 40 - Shona Union Version 2002 bible

EKISODHO 40

¹Zvino Jehovha wakataura naMosesi akati,

²“Nomusi wokutanga womwedzi unofanira kumisa tabhenakeri netende rokusangana.

³Unofanira kuisa mukati mayo areka yechipupuriro, nokudzitira areka nechidzitiro.

⁴Upinzewo tafura, nokugadzira zvinhu zvinofanira kuva pamusoro payo; upinzewo chigadziko chemwenje, ugotungidza mwenje yacho.

⁵Uisewo atari yendarama yezvinonhuwira pamberi peareka yechipupuriro, ugoisa chidzitiro chomukova wetabhenakeri.

⁶Zvino uisewo atari yezvibayiro zvinopiswa pamberi pomukova wetabhenakeri yetende rokusangana.

⁷Uisewo mudziyo wokushambidzira pakati petende rokusangana neatari, ugodira mvura mukati mawo.

⁸Zvino ugadzirewo ruvanze nokurembedza chidzitiro chesuo roruvanze.

⁹“Utorewo mafuta okuzodza nawo, uzodze tabhenakeri nawo, nezvose zviri mukati mayo; ugoitsaura, iyo nezvose zvirimo, kuti chive chinhu chitsvene.

¹⁰Uzodzewo atari nezvibayiro zvinopiswa, nemidziyo yayo yose, kuti utsaure atari, atari chive chinhu chitsvene-tsvene.

¹¹Uzodzewo mudziyo wokushambidzira nechigadziko chawo, uutsaure.

¹²“Zvino uswededze Aroni navanakomana vake kumukova wetende rokusangana, ugovashambidza nemvura.

¹³Ipapo ufukidze Aroni nguo tsvene, ugomuzodza nokumutsaura, kuti andishumire pabasa roupristi.

¹⁴Usededzewo vanakomana vake, ugovafukidza nguo.

¹⁵Uvazodze, sezvawazodza baba vavo, kuti vandishumire pabasa roupristi; kuzodzwa kwavo kunofanira kuva kwavari upristi nokusingaperi, kusvikira kumarudzi avo ose.”

¹⁶Mosesi akaita saizvozvo; zvose zvaakanga arairwa naJehovha, wakazviita saizvozvo.

¹⁷Tabhenakeri ikamiswa nomwedzi wokutanga wegore rechipiri nomusi wokutanga womwedzi.

¹⁸Mosesi akamisa tabhenakeri, akaisa zvigadziko zvayo, akamisa mapuranga ayo, akaisa mbariro dzayo, nokumisa mbiru dzayo.

¹⁹Akawarira tende pamusoro petabhenakeri, akaisa chifukidzo chetende pamusoro payo, sezvakanga zvarairwa Mosesi naJehovha.

²⁰Akatora chipupuriro, akachiisa muareka, akapinza matanda paareka, akaisa chifunhiro chokuyananisa pamusoro peareka;

²¹akapinza areka mutabhenakeri, akarembedza chidzitiro chokudzitira nacho, akadzitira areka yechipupuriro; sezvakanga zvarairwa Mosesi naJehovha.

²²Akaisa tafura mutende rokusangana, kurutivi rwetabhenakeri nechokumusoro, kunze kwechidzitiro.

²³Akagadzirawo chingwa pamusoro payo pamberi paJehovha, sezvakanga zvarairwa Mosesi naJehovha.

²⁴Akaisa chigadziko chemwenje mutende rokusangana, chakatarisana netafura, kurutivi rwetabhenakeri nechenyasi.

²⁵Akatungidza mwenje pamberi paJehovha, sezvakanga zvarairwa Mosesi naJehovha.

²⁶Akaisa atari yendarama mutende rokusangana pamberi pechidzitiro;

²⁷akapisirapo zvinonhuwira zvemiti yakanaka, sezvakanga zvarairwa Mosesi naJehovha.

²⁸Akagadzira zvirembedzwa zvomukova wetabhenakeri.

²⁹Akaisa atari yezvipiriso zvinopiswa pamukova wetabhenakeri yetende rokusangana, akapisira pamusoro payo chipiriso chinopiswa, nechipiriso choupfu; sezvakanga zvarairwa Mosesi naJehovha.

³⁰Akaisa mudziyo wokushambidzira pakati petende rokusangana neatari, akaisa mukati mayo mvura yokushambidza nayo.

³¹Ipapo Mosesi naAroni navanakomana vake vakashamba maoko avo netsoka dzavopo;

³²pakupinda kwavo mutende rokusangana, napakuswedera kwavo kuatari, vaishamba, sezvakanga zvarairwa Mosesi naJehovha.

³³Akagadzirawo ruvanze rwaipoteredza tabhenakeri neatari, akarembedza chidzitiro chesuo roruvanze. Naizvozvo Mosesi akapedza basa rose.

³⁴Ipapo gore rakafukidza tende rokusangana, kubwinya kwaJehovha kukazadza tabhenakeri.

³⁵Mosesi akasagona kupinda mutende rokusangana, nokuti gore rakaramba rigere pamusoro paro uye kubwinya kwaJehovha kwakanga kwazadza tabhenakeri.

³⁶Zvino kana gore rokwidzwa richibva pamusoro petabhenakeri, vana vaIsiraeri vakapfuura vachifamba nzendo dzavo dzose.

³⁷Asi kana gore risina kukwidzwa, havana kufamba, kusvikira musi warinozokwidzwa.

³⁸Nokuti gore raJehovha rakanga riri pamusoro petabhenakeri masikati, nomoto waiva mariri usiku, pamberi pavose veimba yaIsiraeri panzendo dzavo dzose.