Read Shona Union Version 2002 Jobho 10 Bible Online

Jobho 10 - Shona Union Version 2002 bible

Jobho 10

¹Mwoyo wangu waneta noupenyu hwangu; Handingazvidzori pakunyunyuta kwangu; Ndichataura neshungu dzomwoyo wangu.

²Ndichati kuna Mwari, “Musandipa mhosva.” Ndiratidzei kuti munorwa neni nemhaka yeiko?

³Zvinokufadzai here kumanikidza, Nokuzvidza basa ramaoko enyu, Muchivhenekera kurangana kwavakaipa here?

⁴Munameso enyama here, Kana munoona somunhu here?

⁵Mazuva enyu akafanana namazuva omunhu here, Kana makore enyu namakore omunhu here?

⁶Zvamunobvunza zvakaipa zvangu, Nokunzvera zvivi zvangu,

⁷Kunyange muchiziva kuti handizi akaipa; Uye kuti hakuna anogona kurwira paruoko rwenyu here?

⁸Maoko enyu akandiita nokundiumba, Nhivi dzangu dzose; kunyange zvakadaro moda kundiparadza.

⁹Rangarirai, ndizvo zvandinokumbira, kuti makandiumba sevhu; Zvino muchandidzosera kuguruva here?

¹⁰Hamuna kundidurura somukaka here, Nokundikodza somukaka wakafa?

¹¹Makandifadza nenganda nenyama, Mukandisunganidza namapfupa namarunda.

¹²Makandipa upenyu netsitsi, Hanya dzenyu dzakachengeta mweya wangu.

¹³Asi makavanza zvinhu izvi mumwoyo menyu; Ndinoziva kuti chinhu ichi chaiva nemi kare.

¹⁴Kana ndikatadza munondicherekedza, Hamudi kundikanganwira kudarika kwangu.

¹⁵Kana ndiri akaipa, ndine nhamo; Kana ndiri akarurama, kunyange zvakadaro handingasimudzi musoro wangu; Zvandizere nokunyadzwa Ndichangotarira kutambudzika kwangu.

¹⁶Kana ndikazvikudza, munondironda seshumba; Munopamhazve kundishamisa nesimba renyu.

¹⁷Munowedzera zvapupu zvenyu kuzorwa neni, Nokuwanza kutsamwa kwenyu pamusoro pangu; Kushanduka nehondo zvineni.

¹⁸Makandibudisireiko pachizvaro chamai? Ndingadai ndaifira hangumo, ndisati ndaonekwa neziso romunhu.

¹⁹Ndaiita hangu sendisina kuvapo; Ndaitakurirwa kuhwiro ndichibva pachizvaro chamai.

²⁰Ko mazuva angu haazi mashoma here? Zvino gumai, Ndiregei henyu, kuti ndizorore zvishoma,

²¹Ndisati ndaenda kwandisingazodzoki, Kunyika yerima nomumvuri worufu;

²²Iyo nyika yerima guru, rima chairo; Nyika yomumvuri worufu, panokukanganiswa, Ipapo chiedza chakafanana nerima.