Read Shona Union Version 2002 Jobho 11 Bible Online

Jobho 11 - Shona Union Version 2002 bible

Jobho 11

¹Ipapo Zofari muNaamati akapindura, akati,

²“Ko mashoko mazhinji akadai haangapindurwi here? Munhu anoshoshoma angaruramisirwa here?”

³Manyawi ako angafanira kunyaradza vanhu here? Kana uchidadira, hakuna ungakunyadza here?

⁴Nokuti iwe unoti, “Zvandinoparidza ndezvazvokwadi, Ndakachena pamberi penyu.”

⁵Asi, haiwa! Dai Mwari hake achitaura, Ashamise miromo yake pamusoro pako;

⁶Akuratidze zvakavanzwa zvokungwara, Kuti kuna mativi mazhinji. Uzive naizvozvo kuti Mwari anokanganwira zvimwe zvakaipa zvako.

⁷Unganzwisisa zvakadzika zvaMwari here? Ungakwanisa kunzwisisa iye waMasimbaose here?

⁸Zvakakwirira sokudenga; iwe ungaiteiko? Zvakadzika kupfuura hwiro; iwe ungaziveiko?

⁹Kureba kwazvo kunopfuura nyika, Uye upamhi hwazvo hunopfuura gungwa.

¹⁰Kana iye akapfuura, akapfigira mutorongo, Akakokera vanhu kukutongwa, ndiani angamudzivisa?

¹¹Nokuti iye anoziva vanhu venhema; Anoonawo zvakaipa, kunyange asingazvifungi.

¹²Asi munhu asakachenjera anoshaiwa kunzwisisa, Zvirokwazvo, munhu anozvarwa semhuru yembizi.

¹³Kana iwe ukaruramisa mwoyo wako, Ukatambanudzira maoko ako kwaari;

¹⁴Kana zvakaipa zviri muruoko rwako, uzviise kure, Kusarurama ngakurege kugara mumatende ako;

¹⁵Zvirokwazvo ipapo ungasimudza chiso chako, usine gwapa, Zvirokwazvo, uchasimba, usingatyi, chinhu.

¹⁶Nokuti uchakanganwa njodzi yako, Uchairangarira semvura yapfuura;

¹⁷Upenyu hwako huchavara kupfuura masikati makuru; Kunyange kune rima, kuchava samangwanani.

¹⁸Iwe uchasimba pamwoyo, nokuti tariro ichavapo; Zvirokwazvo, ucharingaringa ndokuzorora hako akachengetwa.

¹⁹Uchavata hako pasi, hakuna angakutyisa; Zvirokwazvo, vazhinji vachatsvaka kukufadza.

²⁰Asi meso avakaipa achapera nokutarira, Vachashaiwa pokutizirapo, Tariro yavo ichava yokufa.