Read Shona Union Version 2002 Jobho 12 Bible Online

Jobho 12 - Shona Union Version 2002 bible

Jobho 12

¹Ipapo Jobho akapindura, akati,

²“Zvirokwazvo, imi muri vanhu vakangwara, Kungwara kuchafa pamwechete nemi.”

³Asi ini ndine njerewo semi; Handizi muduku kwamuri; Zvirokwazvo, ndianiko asingazivi zvinhu zvakadai?

⁴Ndakafanana nomunhu anosekwa nowaanogara naye, Munhu akadana kuna Mwari, iye akamupindura; Munhu wakarurama, akakwana, ndiye wosekwa.

⁵Munhu anogara akafara hake anoshora pamifungo yake munhu uri panjodzi. Kushorwa kunogarira vanhu vanotedzemuka norutsoka rwavo.

⁶Matende amakororo anofara hawo, Avo vanotsamwisa Mwari vanogara havo zvakanaka; Ivo vanozadzirwa ruoko rwavo naMwari.

⁷Asi bvunzai henyu zvino mhuka, dzichakudzidzisai; Neshiri dzokudenga, dzichakuudzai;

⁸Kana taurai henyu nenyika, ichakudzidzisai; Nehove dzegungwa dzichakuparidzirai.

⁹Ndianiko asingazivi pazvinhu izvi zvose, Kuti ndirwo ruoko rwaJehovha rwakaita izvi zvose?

¹⁰Mweya wezvipenyu zvose uri muruoko rwake, Nokufema kwavanhu vose.

¹¹Ko nzeve haiidzi mashoko, Somukanwa unoravira zvokudya here?

¹²Vatana ndivo vakangwara, Vana mazuva mazhinji ndivo vanonzwisisa.

¹³Iye ndiye anokungwara nesimba, Ndiye anamano nokunzwisisa.

¹⁴Tarirai, iye anokoromora, hazvingavakwizve; Iye anopfigira munhu, haangazozarurirwi.

¹⁵Tarirai, iye anodzivisa mvura, ndokupwa kwayo; Uye anoitumazve, ndokushandura kwayo nyika.

¹⁶Iye ane simba nokungwara kukuru; Akanyengerwa nounonyengera ndavake vose.

¹⁷Unokanganisa mano amanevanje, Vatongi anovaita mapenzi.

¹⁸Anosunungura simba ramadzimambo, Ndokusunga zviuno zvavo negwarada.

¹⁹Anotorera vapristi ukuru hwavo, Nokukunda vane simba.

²⁰Anotorera vakatenda mashoko avo, Nokubvisira vakuru kunzwisisa kwavo.

²¹Anodurura kushoora kwake pamusoro pamachinda, Nokusunungura bhanhire ravane simba.

²²Anofukura zvinhu zvakadzika parima, Anobudisira kuchiedza mumvuri worufu.

²³Anowanza ndudzi, ndokudziparadza, Anoparadzira ndudzi kwose, ndokudzitapa.

²⁴Anobvisa kunzwisisa kwavakuru vavanhu venyika, Anovadzungairisa murenje musine nzira.

²⁵Vanotsangadzira murima vasina chiedza, Anovadzengedzekesa somunhu akabatwa.