Read Shona Union Version 2002 Jobho 13 Bible Online

Jobho 13 - Shona Union Version 2002 bible

Jobho 13

¹Tarirai, ziso rangu rakaona izvi zvose, Nzeve yangu yakazvinzwa nokuzvinzwisisa.

²Zvamunoziva imi, ndinozvizivawo; Handizi muduku kwamuri.

³Zvirokwazvo, ndinoda kutaura nowaMasimbaose, Ndinoda kuzvidavira kuna Mwari.

⁴Asi imi munofukidza zvose nenhema dzenyu, Imi mose muri n'anga dzisina maturo.

⁵Haiwa! Dai muchinyarara mose! Ndiko kwaiva kungwara kwenyu!

⁶Zvino chinzwai kuzvidavira kwangu, Tererai munzwe ndichizvirevera nemiromo yangu.

⁷Munoda kurwira Mwari muchitaura zvisakarurama here? Nokureva zvinonyengera nokuda kwake here?

⁸Munoda kuva nehanya naye here? Munoda kurwira Mwari kanhi?

⁹Ko zvakanaka kana iye achikunzverai here? Imi mungamunyengera, sezvamunganyengera munhu here?

¹⁰Zvirokwazvo iye achakutukai, Kana mukava nehanya pakavanda.

¹¹Ukuru hwake haungakutyisiyi here? Haangakutyisiyi zvikuru here?

¹²Mashoko enyu enjere ishumo dzamadota, Nhare dzenyu inhare dzevhu.

¹³Nyararai, ndiregei nditaure, Ndiwirwe hangu nezvandingawirwa nazvo.

¹⁴Ndicharumireiko nyama yangu nameno angu, Nokubata upenyu hwangu muruoko rwangu?

¹⁵Kunyange akandiuraya hake, ndichamumirira hangu; Kunyange zvakadaro ndichazvidavirira hangu pamberi pake pamusoro pomufambiro wangu.

¹⁶Ndirwowo ruchava ruponeso rwangu, Kuti munhu asingatendi Mwari haangasviki pamberi pake.

¹⁷Inzwai zvakanaka kutaura kwangu, Kuparidza kwangu kupinde nzeve dzenyu.

¹⁸Tarirai zvino, ndarongedza mhaka yangu; Ndinoziva kuti ndicharuramisirwa.

¹⁹Ndianiko achaita nharo neni? Nokuti zvino ndinganyarara hangu, ndikafa.

²⁰Asi regai henyu kundiitira zvinhu zviviri, Ipapo handingavandi pamberi penyu;

²¹Bvisai ruoko rwenyu kure neni; Kutyisa kwenyu kurege kundivhundusa.

²²Ipapo mudane imi, ini ndichapindura; Kana ini nditaure hangu, imi mundipindure.

²³Zvakaipa zvangu nezvivi zvangu zvinganiko? Ndizivisei kudarika kwangu nechivi changu.

²⁴Munovanzireiko chiso chenyu, Muchiti ndiri muvengi wenyu?

²⁵Munoda kuvhundusa shizha rinopepereswa here? Munoda kudzingana namakoto akaoma here?

²⁶Munotonga zvinhu zvinovava pamusoro pangu, Munondidyisa nhaka yezvakaipa zvoujaya hwangu;

²⁷Munomana makumbo angu mumatanda, nokucherekedza nzira dzangu dzose; Munotarira tsoka dzamakumbo angu muganho;

²⁸Kunyange ndakafanana nechinhu chakaora chinopera, Senguo yapedzwa nezviundudzi.