Read Shona Union Version 2002 Jobho 15 Bible Online

Jobho 15 - Shona Union Version 2002 bible

Jobho 15

¹Ipapo Erifazi muTemani akapindura, akati,

²“Ko munhu, ane njere, angapindura nenjere dzisina maturo, Nokuzadza dumbu rake nemhepo inobva mabvazuva here?

³Angaita nharo nokutaura zvisingabatsire, Kana mashoko aasingagoni kubata basa rakanaka nawo here?

⁴Zvirokwazvo iwe unorasha kutya Mwari, Nokukanganisa vanoda kufunga Mwari.

⁵Nokuti zvakaipa zvako zvinodzidzisa muromo wako, Unotsaura rurimi rwavanyengeri.

⁶Muromo wako ndiwo unokupa mhosva, handizini. Zvirokwazvo miromo yako inokupupurira zvakaipa.

⁷Ko ndiwe wakatanga kuzvarwa kanhi? Kana wakaberekwa makomo asati avapo here?

⁸Iwe wakanzwa mano akavanzika aMwari kanhi? Ndiwe woga wakazviwanira njere kanhi?

⁹Unozivei iwe zvatisingaziviwo isu? Unonzwisisei iwe zvisati zviri matiriwo?

¹⁰Vakachena vhudzi navatana vakwegura kwazvo vanesu, Vakapfuura baba vako kwazvo pazero.

¹¹Ko kunyaradza kwaMwari hakukuringani here, Neshoko rinotaurwa nounyoro kwauri here,

¹²Mwoyo wako unokurashirei? Meso ako anobwaireiko?

¹³Zvaunorwa naMwari nomweya wako, Uchitendera mashoko akadai kubuda pamuromo wako.

¹⁴Munhu chinyiko? Angava akanaka sei? Naiye akazvarwa nomukadzi, angava akarurama sei?

¹⁵Tarira, haatendi vatsvene vake; Zvirokwazvo, kudenga hakuna kunaka pamberi pake.

¹⁶Ndoda munhu anosemesa, akaora, Munhu anonwa zvakaipa semvura.

¹⁷Ndichakuratidza, chiteerera; Ndichakududzira zvandakaona.

¹⁸(Zvakarehwa navanhu vakangwara Zvavakanzwa kumadzibaba avo, vasina kuzvivanza;

¹⁹Ivo vakanga vapiwa nyika voga, Hakuna mutorwa akapinda pakati pavo;)

²⁰Munhu akaipa anotambudzika achirwadziwa mazuva ake ose, Iwo makore akatarirwa mumanikidzi.

²¹Izwi rezvinotyisa riri munzeve dzake; Muparadzi achamusvikira akafara.

²²Haatendi kuti achadzokazve achibva parima, Anovandirwa nomunondo.

²³Unofamba-famba achitsvaka zvokudya, achiti, ‘Zviripiko?’ Anoziva kuti zuva rerima riri pedyo naye,

²⁴Njodzi nokutambudzika zvinomutyisa; Zvinomukunda, samambo akazvigadzirira kurwa.

²⁵Nokuti akatambanudzira ruoko rwake kuzorwa naMwari, Akazvikudza pamberi powaMasimbaose;

²⁶Anomhanyira kwaari anomutsipa mukukutu, Namakwande makobvu enhoo dzake.

²⁷Nokuti akafukidza chiso chake namafuta, Akaunganidza mafuta mazhinji pachiuno chake.

²⁸Akagara pamaguta akanga ava matongo, Padzimba dzisina kufanira kugarwa nomunhu, Dzaikarokushanduka matongo.

²⁹Iye haangavi mupfumi, pfuma yake haingagari, Nezvibereko zvazvo hazvingaremberi pasi.

³⁰Haangabvi parima; Murazvo womoto uchawomesa matavi ake, Uchabviswa nomweya womuromo waMwari.

³¹Ngaarege kuvimba nezvisina maturo, achizvinyengera; Nokuti mubairo wake uchava zvisina maturo.

³²Zvichaitwa nguva yake isinokusvika, davi rake haringavi nyoro.

³³Achazuka madzambiringa ake agere kuibva somudzambiringa, Uchazuka maruva ake somuorivhi.

³⁴Nokuti ungano yavasingadi Mwari haingabereki, Moto uchapedza matende avafufuri.

³⁵Vane mimba yezvakashata, vanobereka zvakaipa, Dumbu ravo rinogadzira kunyengera.”