Read Shona Union Version 2002 Jobho 18 Bible Online

Jobho 18 - Shona Union Version 2002 bible

Jobho 18

¹Ipapo Bhiridhadhi muShuhi akapindura, akati,

²“Muchateyana namashoko kusvikira riniko? Chimbofungai henyu, tigotaurirana pashure.

³Tinonzi mhuka neiko, Navanhu vasina kunaka pamberi penyu?

⁴Iwe unozvibvarura nokutsamwa kwako, Nyika ingarashwa nokuda kwako kanhi? Kana dombo ringabviswa panzvimbo yaro here?

⁵Zvirokwazvo, chiedza chavakaipa chichadzima, Murazvo womoto wake haungavhenekeri.

⁶Chiedza chichasviba patende rake, Mwenje wake pamusoro pake uchadzima.

⁷Nhambwe dzesimba rake dzichadzorwa, Namano ake achamuwisira pasi.

⁸Nokuti anowisirwa mumumbure namakumbo ake amene, Anofamba pamusoro pezvakarukwa.

⁹Rugombe ruchamubata chitsitsinho, Musungo uchamubatisa.

¹⁰Anovanzirwa chiswe muvhu, Nomurau panzira.

¹¹Uchavhunduswa nezvinotyisa pamativi ose, Zvichamuteverera pedyo-pedyo.

¹²Simba rake richarumwa nenzara. Njodzi ichamugarira parutivi rwake.

¹³Ichapedza mitezo yomuviri wake, Dangwe rorufu richapedza mitezo yake.

¹⁴Uchadzurwa patende rake raaivimba naro; Uchaiswa kuna mambo anotyisa.

¹⁵Mutende rake munogara zvisati zviri zvake; Suriferi ichasaswa pamusoro peimba yake.

¹⁶Midzi yake ichaoma pasi, Davi rake richatemwa kumusoro.

¹⁷Haangazorangarirwi panyika; Zita rake haringazozikanwi panzira dzomumusha.

¹⁸Achadzingwa pachiedza aende kurima; Achadzingwa abve panyika.

¹⁹Haangavi nomwanakomana kana muzukuru pakati pavanhu vake, Kana mumwe akasara, paakanga agere ari mutorwa.

²⁰Vanogara kumavirazuva vachakanuka vachiona zuva rake, Vagere kumabvazuva vachabatwa nokubvunda.

²¹Zvirokwazvo, ndizvo zvakaita panogara vasina kururama, Ndiyo nzvimbo yousingazivi Mwari.”