Read Shona Union Version 2002 Jobho 19 Bible Online

Jobho 19 - Shona Union Version 2002 bible

Jobho 19

¹Ipapo Jobho akapindura, akati,

²“Muchatambudza mweya wangu kusvikira riniko, Nokundipwanya namashoko enyu here?

³Makandituka zvino kagumi; Hamunyari zvamakanditsungirira.

⁴Kana ndichinge ndatadza hangu, Kutadza kwangu kuchagara neni.

⁵Kana imi muchida kwazvo kuzvikudza pamusoro pangu, Nokundipa mhosva muchiti ndakatukwa;

⁶Zivai zvino kuti ndiye Mwari asina kundiruramisa, Akandikomberedza nomumbure wake;

⁷Tarirai ndinochema ndichiti, ‘Ndakaitirwa zvakaipa!’ Asi handinzwiki; Ndinochema kuti ndibatsirwe, asi handiruramisirwi.

⁸Akadzivira nzira yangu, kuti ndirege kupfuura; Akaisa rima panzira dzangu.

⁹Wakandibvisira kurumbidzwa kwangu, Nokunditorera korona yangu pamusoro wangu.

¹⁰Akandiputsa kumativi ose, ndakaparadzwa; Akadzura tariro yangu somuti.

¹¹Akandimutsirawo kutsamwa kwake, Akati ndiri mumwe wavadzivisi vake.

¹²Hondo dzake dzinondiunganira, dzinozvigadzirira nzira kurwa neni. Dzinokomberedza tende rangu nemisasa yadzo.

¹³Akaisa hama dzangu kure neni, Vazikanwi vangu vava savatorwa chose kwandiri.

¹⁴Hama dzangu dzandinyengera, Shamwari dzangu, dzaindiziva, dzakandikanganwa.

¹⁵Vanogara mumba mangu, navarandakadzi vangu vanoti ndiri mubvakure; Vanondiona vachiti ndiri mweni.

¹⁶Ndinodana muranda wangu, asi haandipinduri, Kunyange ndichimunyengetera nomuromo wangu.

¹⁷Kufema kwangu kunosemesa mukadzi wangu, Ndinonyangadza vana vamai vangu.

¹⁸Kunyange navana vaduku vanondishorawo; Kana ndichisimuka, vanondipopotera.

¹⁹Shamwari dzangu dzose dzaindiziva, dzinondinzvenga, Vose vandaida vandifuratira.

²⁰Pfupa rangu rinonamatira ganda rangu nenyama yangu, Ndasiyirwa ganda rameno angu.

²¹Ndinzwirei tsitsi, ndinzwirei tsitsi, imi shamwari dzangu; Nokuti ruoko rwaMwari rwandibata.

²²Munonditambudzireiko saMwari, Musingaguti nenyama yangu?

²³Haiwa, dai mashoko angu ainyorwa zvino, Haiwa, dai ainyorwa pabhuku.

²⁴Dai aitemwa nepeni yedare nomutobvu Aitemwa padombo nokusingaperi.

²⁵Asi ndinoziva kuti Mudzikinuri wangu mupenyu, Uye kuti pakupedzisira uchasimuka panyika;

²⁶Kunyange ganda rangu richinge raparadzwa saizvozvo, Kunyange zvakadaro ndichaona Mwari ndine nyama yangu.

²⁷Ndichamuona ari kurutivi rwangu; Meso angu achaona, asati ari omutorwa; Itsvo dzangu dzapera mukati mangu.

²⁸Kana muchiti, ‘Tichamutambudza sei!’ Mudzi wemhosva zvauri mukati make!

²⁹Ityai munondo; Nokuti kutsamwa kucharohwa nomunondo, Kuti muzive kuti kutonga kuripo.”