Read Shona Union Version 2002 Jobho 21 Bible Online

Jobho 21 - Shona Union Version 2002 bible

Jobho 21

¹Ipapo Jobho akapindura, akati,

²“Inzwai zvakanaka kutaura kwangu; Munyaradzwe nazvo.

³Ndiregei, nditaurewo; Kana ndapedza kutaura, mungandiseka henyu.

⁴Kana ndirini, ndinochema kuvanhu here? Ndingaregereiko kupera mwoyo?

⁵Nditarirei, mushamiswe, Muise ruoko rwenyu pamuromo.

⁶Kunyange ndozvirangarira ndinotambudzika, Kutya kukuru kunobata nyama yangu.

⁷Vakaipa vanoraramireiko, Vachikwegura nokuwedzerwa simba here?

⁸Vana vavo vanosimbiswa pamwechete navo pamberi pavo, Navazukuru vavo vachizviona nameso avo.

⁹Dzimba dzavo dzinorugare, hadzityiswi, Uye shamhu yaMwari haigari ichivarova.

¹⁰Hando yavo inoberekesa, isingakoni, Mhou yavo inobereka, isingasvodzi.

¹¹Vanobudisa pwere dzavo seboka ramakwai; Vana vavo vanotamba.

¹²Vanoimba vachiridzirwa ngoma nembira, Vanofara vachiridzirwa nyere.

¹³Vanopedza mazuva avo vachifara, Vanoburukira kuSheori kamwe-kamwe.

¹⁴Kunyange zvakadaro vanoti kuna Mwari, ‘Ibvai kwatiri; Nokuti hatidi kuziva nzira dzenyu.’

¹⁵Iye waMasimbaose ndianiko, kuti timushumire? Tichabatsirwa neiko kana tikanyengetera kwaari?

¹⁶Tarirai, kufara kwavo hakuzi mumaoko avo; Mano avakaipa ari kure neni.

¹⁷Ko mwenje wavakaipa unodzimwa kangani? Njodzi yavo inovavinga kanganiko? Mwari anovapavurira kutambudzika pakutsamwa kwake kanganiko?

¹⁸Vanotongofanana namakoto anodzingwa nemhepo here? Nehundi inotorwa nedutu remhepo?

¹⁹Imi munoti, ‘Mwari anochengetera vana vake zvakaipa. Ngaamutsive iye amene, azvizive.’

²⁰Meso ake amene ngaaone kuparadzwa kwakwe, Iye ngaanwe kutsamwa kwowaMasimbaose.

²¹Nokuti achava nehanya yeiko neimba yake kana aenda, Kana kuwanda kwemwedzi yake kwatapudzwa.

²²Ndianiko angadzidzisa Mwari kuziva, Zvaari iye anotonga vari kumusoro?

²³Mumwe anofa achine simba rake rose, Akafara chose anorugare.

²⁴Mazamu ake azere nomukaka, Mwongo wamapfupa ake wakanyorova.

²⁵Mumwe anofa ane shungu dzomwoyo, Asina kutongaravira zvakanaka.

²⁶Vanovata pasi pamwechete paguruva, Honye dzinovafukidza vose.

²⁷Tarirai ndinoziva kufunga kwenyu, Namano akaipa amunondifungira.

²⁸Nokuti munoti, ‘Imba yomuchinda iripiko? Tende raigarwa nowakaipa riripiko?’

²⁹Hamuna kubvunza here vanofamba nenzira? Hamuzivi zviratidzo zvavo here?

³⁰Kuti munhu akaipa anodarikwa pazuva renjodzi here? Kuti vanobviswa pazuva rokutsamwa here?

³¹Ndianiko angamuzivisa mufambiro wake pachena? Ndiani achamutsiva zvaakaita here?

³²Zvino anotakurirwa kuhwiro, Vanorinda rinda rake.

³³Mavhinga omupata achamunakira, Vanhu vose vachamutevera, Sezvaakatungamirirwa navasingaverengwi.

³⁴Zvino munondinyaradza sei nezvisina maturo, Zvamasarirwa nenhema dzoga pakupindura kwenyu?”