Read Shona Union Version 2002 Jobho 22 Bible Online

Jobho 22 - Shona Union Version 2002 bible

Jobho 22

¹Ipapo Erifazi muTemani akapindura, akati,

²“Ko munhu angabatsira Mwari here? Zvirokwazvo, munhu, akangwara, anozvibatsira hake amene.

³WaMasimbaose une hanya nokururama kwako here? Iye angabatsirwa nazvo kana iwe ukakwanisa nzira dzako here?

⁴Iye anokuraira zvaunomutya here? Kuti akutonge here?

⁵Zvakaipa zvako hazvizakakura here? Zvisina kururama zvako hazviperi.

⁶Nokuti wakatora rubatso kuhama yako pasina, Wakakunungura nguo dzavakanga vasina kufuka.

⁷Hauna kupa vane nyota mvura kuti vanwe, Wakanyima vane nzara zvokudya.

⁸Asi munhu ane simba, nyika ndeyake; Munhu anokudzwa, ndiye akagara mairi.

⁹Akadzinga chirikadzi dzisine chinhu, Maoko enherera akavhuniwa.

¹⁰Saka iwe wakapotedzwa nemisungo, Unovhunduswa pakarepo nokutya.

¹¹Nerima, kuti arege kuona, Uye mvura zhinji inokufukidza.

¹²Ko Mwari haazi kudenga kumusoro-soro here? Tarira kukwirirwa kwenyeredzi, dzakakwirira sei!

¹³Iwe unoti, ‘Mwari unoziveiko? Ungagona kutonga pakati perima guru here?’

¹⁴Makore matema akamufukidza, haagoni kuona; Unofamba pakutenderera kwedenga.

¹⁵Iwe unoda kuramba uchifamba nenzira yekare. Yakatsikwa navanhu vakaipa here?

¹⁶Ivo vakabvutwa nguva yavo isati yasvika; Nheyo dzavo dzakadururwa sorukova rwemvura.

¹⁷Ivo vakati kuna Mwari, ‘Ibvai kwatiri; Uye, waMasimbaose angatiiteiko?’

¹⁸Kunyange zvakadaro wakazadza dzimba dzavo nezvakanaka; Asi mano avakaipa ari kure neni.

¹⁹Vakarurama vanozviona, vakafara; Vasine mhosva vanovaseka,

²⁰Vachiti, ‘Zvirokwazvo vakatimukira vakaparadzwa; Zvakasara zvavo zvakapedzwa nomoto.’

²¹Shamwaridzana naye zvino, uve norugare; Ipapo uchaitirwa zvakanaka.

²²Gamuchira hako murairo womuromo wake, Uchengete mashoko ake mumwoyo mako.

²³Kana ukadzokera kuno waMasimbaose, uchavakwa; Kana ukabvisa zvisakarurama kure namatende ako.

²⁴Isa pfuma yako paguruva, Nendarama yeOfiri pakati pamabwe ehova;

²⁵Ipapo waMasimbaose achava pfuma yako, Nesirivha inokosha kwazvo kwauri.

²⁶Nokuti ipapo uchafarira waMasimbaose, Uchasimudzira chiso chako kuna Mwari.

²⁷Uchanyengetera kwaari, iye achakunzwa; Uye acharipa mhiko dzako.

²⁸Uchatemawo chirevo, chikasimbiswa kwauri; Uye chiedza chichavhenekera nzira dzako.

²⁹Kana vakakusundira pasi, uchati, ‘Ndichasimudzwa;’ Iye uchaponesa munhu anozvininipisa.

³⁰Iye acharwira nyangwe nomunhu ane mhaka, Zvirokwazvo ucharwirwa iye nokuchena kwamaoko ako.”