Read Shona Union Version 2002 Jobho 23 Bible Online

Jobho 23 - Shona Union Version 2002 bible

Jobho 23

¹Ipapo Jobho akapindura, akati,

²“Kunyange nanhasi ndinonyunyuta ndine shungu; Kurohwa kwangu kwakanyanya kukunda kugomera kwangu.

³Haiwa! Dai ndaiziva kwandingamuwana, Kuti ndisvike ipo pachigaro chake.

⁴Ndairondedzera mhaka yangu pamberi pake, Ndaizadza muromo wangu nenharo.

⁵Ndaiziva mashoko aanopindura nawo, Ndainzwisisa zvaanondiudza.

⁶Angaita nharo neni nesimba rake guru here? Kwete; asi anganditeerera hake.

⁷Apo akarurama angataurirana naye; Kuti ndisunungurwe nokusingaperi pamutongi wangu.

⁸Tarira, ndinopfuura mberi, asi haapo; Uuye shure, asi handimuoni;

⁹Nokuruoko rworuboshwe, kana achibata, asi handigoni kumuona; Anozvivanza paruoko rworudyi, kuti ndirege kumuona.

¹⁰Nokuti iye anoziva nzira yandinofamba nayo; Kana akandiidza, ndichabuda ndakaita sendarama.

¹¹Rutsoka rwangu rwakaramba ruchitsika paakatsika iye; Ndakarambira panzira yake, handina kutsauka.

¹²Handina kudzoka pamurairo wemiromo yake; Ndakachengeta sepfuma mashoko omuromo wake kupfuura mugove wezvokudya zvangu.

¹³Asi iye anorangarira chinhu chimwe, ndianiko angamudzora? Zvinoda mwoyo wake, ndizvo zvaanoita.

¹⁴Nokuti anoita zvandakatemerwa; Nezvinhu zvizhinji zvakadai zviri kwaari.

¹⁵Saka ndinotambudzika pamberi pake; Kana ndichimufunga ndinomutya.

¹⁶Nokuti Mwari akatorera mwoyo wangu simba, waMasimbaose akandivhundusa.

¹⁷Nokuti handina kuparadzwa nokuda kwerima, Kana nokuda kwerima guru rakafukidza chiso changu.”