Read Shona Union Version 2002 Jobho 24 Bible Online

Jobho 24 - Shona Union Version 2002 bible

Jobho 24

¹WaMasimbaose anoregereiko kutara nguva dzokutonga? Vanomuziva vanoregereiko kuona mazuva ake?

²Vanoshandura miganho varipo; Vanopamba mapoka amakwai, vachiafudza.

³Vanotinha mbongoro yenherera, Vanotora nzombe yechirikadzi vachiita rubatso.

⁴Vanodzinga varombo panzira; Varombo venyika vanovanda vose.

⁵Tarira, sembizi murenje Vanobudira kumabasa avo, vachishingairira zvokwadi; Renje rinovapa zvokudya zvavana vavo.

⁶Vanocheka zvavanodya kusango; Vanounganidza madzambiringa avakaipa.

⁷Vanovata usiku hwose vasina zvavakafuka, Pachando havana chavangazvifukidza nacho.

⁸Vakanyorova nokupfunha kwemvura yamakomo, Vanombundikira dombo nokushaiwa pokutizira.

⁹Varipo vanobvuta nherera pazamu ramai, Nokutora rubatso rwavarombo;

¹⁰Naizvozvo vanofamba vasina zvavakafuka, Vanotakura zvisote vane nzara;

¹¹Vanosvina mafuta mukati mamasvingo avanhu ava; Vanotsika zvisviniro zvamadzambiringa avo, vachifa nenyota.

¹²Vanhu vanogomera mukati meguta rina vanhu vazhinji, Uye mweya yavakakuvadzwa inochema; Kunyange zvakadaro Mwari haane hanya nezvisina kururama.

¹³Ndivo vanovenga chiedza; Havazivi nzira dzacho, Havarambi vachifamba pamakwara acho.

¹⁴Muurayi anomuka kana kwoedza, anouraya murombo neanoshaiwa; Usiku wakafanana nomubi.

¹⁵Ziso remhombwewo rinomirira rubvunzavaeni, Achiti, “Hakune ziso richandiona;” Ndokufukidza chiso chake.

¹⁶Usiku vanopaza dzimba; Masikati vanozvipfigira; Havazivi chiedza.

¹⁷Nokuti mangwanani akaita serima guru kwavari vose; Nokuti vanoziva kutyisa kwerima guru.

¹⁸Iye anofambisa pamusoro pemvura; Mugove wavo wakatukwa panyika; Haachafambi nenzira yeminda yemidzambiringa.

¹⁹Kuoma nokupisa kunopedza mvura yechando; Ndizvo zvinoita Sheori navakatadza.

²⁰Chizvaro chichamukanganwa; honye dzichatapirirwa naye; Haachazorangarirwi; Uye kusarurama kuchavhunwa somuti.

²¹Iye unoparadza han’a isingabereki; Haaitiri chirikadzi zvakanaka.

²²Anobvisa vane simba nesimba rake; Kana iye achisimuka, hakuna munhu anoziva kana achararama.

²³Mwari anovagarisa vakachengetwa, vachivimba nazvo; Asi meso ake anotarira nzira dzavo.

²⁴Vanokudzwa; gare-gare vaenda; Vanodukupiswa, vanobviswa panzira savamwe vose, Vanochekwa semisoro yehura dzezviyo.

²⁵Kana zvisina kudaro zvino, ndiani angati ndine nhema, Nokushaisha mashoko angu simba here?