Read Shona Union Version 2002 Jobho 26 Bible Online

Jobho 26 - Shona Union Version 2002 bible

Jobho 26

¹Ipapo Jobho akapindura, akati,

²“Iwe wakabatsira sei asine simba! Wakaponesa sei ruoko rusine simba!

³Wakapa mano sei asina kungwara, Nokududzira kwazvo zivo yazvokwadi!

⁴Wakataurira aniko mashoko awa? Mweya wakabuda kwauri ndowaaniko?

⁵Vakafa vanodedera Pasi pemvura navagere mukati mayo.

⁶Sheori rakashama pamberi pake, Kuparadza hakune chifukidzo.

⁷Anotatamura rutivi rwokumusoro pasine chiro, Anoturikira nyika pasine chinhu.

⁸Anosungira mvura mumakore ake makobvu; Asi gore haribvaruki nokurema kwayo.

⁹Anofukidza chigaro chake choushe, chirege kuonekwa,

¹⁰Akatara muganho pamusoro pemvura, Kusvikira pakuparadzana kwechiedza nerima.

¹¹Mbiru dzedenga dzinodedera, Nokuvhunduka nokutuka kwake.

¹²Anomutsa gungwa nesimba rake, Nenjere dzake anoparadza Rahabhi.

¹³Denga rinoshongedzwa nomweya wake; Ruoko rwake rwakabaya nyoka inokurumidza.

¹⁴Tarira, izvi ndiwo mudzivo woga wenzira dzake; Haiwa, tinogonzwa zeve-zeve roga rezwi rake! Asi kutinhira kwesimba rake ndianiko angakunzwisisa?”