Read Shona Union Version 2002 Jobho 28 Bible Online

Jobho 28 - Shona Union Version 2002 bible

Jobho 28

¹Nokuti mugodhi uripo panobva sirivha, Nzvimbo iripo pavanonatsa ndarama.

²Mhangura inocherwa pasi, Nendarira inonyauswa pabwe.

³Munhu anokunda rima, Anotsvakisisa kusvikira kumativi ose-ose. Mabwe ari murima guru nomumumvuri worufu.

⁴Anochera mugodhi kure napanogara vanhu; Vanokanganikwa norutsoka rwavanopfuura; Vanorembera kure navanhu, vachizeya uku nokuku.

⁵Kana iri nyika, zvokudya zvinobva mairi; Pasi pazvo pakashandurwa zvinenge nomoto.

⁶Pamabwe ayo ndipo panogara zvibwe zesafiro, Ano upfu hwendarama.

⁷Nzira iyo haizikanwi negondo, Ziso rorukodzi harina kuiona;

⁸Zvikara, zvinozvikudza, hazvina kupfuura napo. Shumba, ine hasha, haina kupfuura napo.

⁹Iye anotema dombo romusarasara noruoko rwake; Anoshandukura makomo nemidzi yawo.

¹⁰Anochera mugero pamatombo; Ziso rake rinoona zvinokosha.

¹¹Anodzivira nzizi dzemvura dzirege kudonha; Chinhu chakavanzika anochibudisa pachena.

¹²Asi uchenjeri huchawanikwepiko? Kunzwisisa kunogarepi?

¹³Munhu haazivi mutengo wahwo; Hauwanikwi panyika yavapenyu.

¹⁴Pakadzika panoti, “Hauzi mandiri;” Negungwa rinoti, “Hauzi mandiri.”

¹⁵Haungatengwi nendarama, Nyangwe nesirivha haingaidzirwi mutengo wawo.

¹⁶Haungaenzaniswi nendarama yeOfiri, Kana nezvibwe zveonikisi inokosha kana zvesafiro.

¹⁷Ndarama negirazi hazvingaenzani nahwo; Zvishongo zvendarama yakaisvonaka hazvingatsinhaniswi nahwo.

¹⁸Korari nemapere hazvingatongerehwi; Zvirokwazvo mutengo wouchenjeri unopfuura matombo akatsvuka.

¹⁹Topazi yeItiopia haingaenzani nahwo, Haungaenzaniswi nendarama yakaisvonaka.

²⁰Zvino huchenjeri unobvepiko? Kunzwisisa kunogarepi?

²¹Zvahwakavanzirwa meso avapenyu vose, Nokudzitirirwa shiri dzokudenga.

²²Kuparadza noRufu zvinoti, “Takanzwa guhu rahwo panzeve dzedu.”

²³Mwari anonzwisisa nzira yahwo, Ndiye anoziva kwahunobva.

²⁴Nokuti anotarira kumigumo yenyika, anoona zvose pasi pokudenga pose;

²⁵Panguva yaanotarira mhepo kurema kwayo; Zvirokwazvo, anoyera mvura nechiyero.

²⁶Panguva yaakatemera mvura chirevo, Nemheni yomutinhiro nzira yayo.

²⁷Panguva iyo akahuona, akahududzira; Akahusimbisa, nokuhunzvera.

²⁸Akaudza munhu achiti, “Tarira, kutya Ishe, ndihwo uchenjeri. Kurega zvakaipa ndiko kunzwisisa.”