Read Shona Union Version 2002 Jobho 29 Bible Online

Jobho 29 - Shona Union Version 2002 bible

Jobho 29

¹Zvino Jobho akapfuurazve namashoko ake, akati,

²“Haiwa, dai ndaiita hangu sapamwedzi yakare, Sapamazuva andairindwa naMwari;

³Panguva iyo mwenje wake waivhenekera pamusoro wangu, Ndaifamba ndichivhenekerwa parima nechiedza chake;

⁴Sezvandakanga ndakaita pamazuva okusimba kwangu, Panguva iyo hushamwari hwaMwari huchiri patende rangu;

⁵Panguva iyo waMasimbaose achiri neni, Navana vangu vachakandipoteredza;

⁶Panguva iyo pandaitsika paisukwa nomukaka akafa, Uye dombo raindidururira nzizi dzamafuta!

⁷Panguva yandaibuda kusuo reguta, Panguva yandaigadzira chigaro changu padare,

⁸Majaya akati achindiona aivanda, Navatana vaisimuka vakaramba vamire;

⁹Machinda ainyarara pakutaura kwawo, Aifumbira miromo yawo;

¹⁰Mazwi avakuru ainyarara, Ndimi dzavo dzainamatira mumikanwa yavo.

¹¹Nokuti nzeve yakati ichindinzwa, ndokundiropafadza; Ziso rakati richindiona, ndokundipupurira zvakanaka.

¹²Nokuti ndairwira varombo vaichema, Nenhererawo, nowaishaiwa mubatsiri.

¹³Aikarofa aindiropafadza; Ndaiimbisa mwoyo wechirikadzi nomufaro.

¹⁴Ini ndaifuka kururama, naiko kwaindifukidza; Kururama kwangu kwaiva senguo nekorona.

¹⁵Ndaiva meso amapofu, Netsoka dzavanokamhina.

¹⁶Ndaiva baba vavaishaiwa; Ndainzvera mhaka yowandakanga ndisingazivi.

¹⁷Ndaivhuna meno avasina kururama, Nokubvuta chaakanga auraya mumeno ake.

¹⁸Panguva iyo ndakati, ‘Ndichafira mudendere rangu, Ndichawanza mazuva angu aite sejecha,’

¹⁹Mudzi wangu wakatandavarira kusvikira kumvura, Dova rinovata usiku hwose padavi rangu.

²⁰Kukudzwa kwangu kunoramba kuri kutsva, Uta hwangu hunoramba uchivandudzwa muruoko rwangu.

²¹Vanhu vainditeerera nokundimirira, Vainyarara kana ndichivaraira.

²²Havazaitaurazve kana ini ndareva mashoko angu; Kutaura kwangu kwakadonhera pamusoro pavo.

²³Vaindimirira somunhu anomirira mvura; Vaishamisa miromo yavo sevanoshamira mvura yokupedzisira.

²⁴Ndaivasekerera kana vasingatsungi; Havana kudzima chiedza chechiso changu.

²⁵Ndaivasanangurira nzira yavo, ndikagara sashe wavo, Ndaigara samambo pahondo, Somunhu anonyaradza vanochema.