Read Shona Union Version 2002 Jobho 3 Bible Online

Jobho 3 - Shona Union Version 2002 bible

Jobho 3

¹Shure kwaizvozvo Jobho wakashamisa muromo wake, akatuka zuva rake.

²Jobho akapindura akati,

³“Zuva randakaberekwa naro ngarirove, Nousiku uhwo hwavakati, ‘Mwana womukomana agamuchirwa.’ ”

⁴Zuva iro ngarive rima; Mwari ari kumusoro ngaarege kurirangarira, Nechiedza ngachirege kurivhenekera.

⁵Rima nomumvuri worufu ngazviritore rive razvo; Gore ngarigare pamusoro paro; Zvose zvinosvibisa zuva ngazvirivhunduse.

⁶Kana uri usiku uhwo, ngaubatwe nerima guru; Ngaurege kufara pakati pamazuva egore; Ngaurege kurahwa pakati pemwedzi.

⁷Usiku uhwo ngaurege kubereka; Izwi romufaro ngarirege kupinda mauri.

⁸Vanotuka zuva iro ngavautukewo, Ivo vanogona kumutsa shato huru.

⁹Nyeredzi dzamambakwedza ahwo ngadzisvibe; Ngaumirire chiedza, asi huchishaiwe; Ngaurege kuona fungiro dzameso amangwanani;

¹⁰Zvausina kupfiga mikova yemimba yamai vangu, Kana kuvanza kutambudzika pameso angu.

¹¹Ndakaregereiko kufa ndichiri mumimba? Ndakaregerei kuparara ndichibuda mudumbu,

¹²Mabvi akandigamuchirireiko? Kana mazamu, kuti ndimwe?

¹³Nokuti ndingadai zvino ndakatandavara, ndinyerere; Ndingadai ndivete; ipapo ndingadai ndazorora;

¹⁴Pamwechete namadzimambo namakurukota enyika Vakazvivakira matongo;

¹⁵Kana namachinda, aiva nendarama, Akazadza dzimba dzawo nesirivha;

¹⁶Kana ndingadai ndisina kuvapo somwana akaponiwa nguva isina kusvika; Savacheche vasina kutongoona chiedza.

¹⁷Vakaipa vanorega kutambudza kwavo ipapo; Vakaneta vanozorora ipapo.

¹⁸Vasungwa vano rugare pamwechete ipapo; Havanzwi izwi romutariri.

¹⁹Vaduku navakuru varipo; Uye muranda akasununguka panatenzi wake.

²⁰Munhu ari panjodzi anopiyirweiko chiedza, Noupenyu kuno ane shungu pamwoyo;

²¹Avo vanoshuva rufu, asi haruuyi; Vanoruchera kupfuura pfuma yakavanzwa pasi;

²²Vanopembera kwazvo, Nokufara, kana vachiwana hwiro?

²³Munhu, akadzimira nzira yake, anopiyirweiko upenyu, Iye akadzivirirwa norumhanda naMwari?

²⁴Nokuti ndinogomera ndisati ndadya, Kuuura kwangu kunodururwa semvura.

²⁵Nokuti chinhu chandaitya chandiwira, Nechandinozeza chandivinga.

²⁶Handina mufaro, kana kunyarara, kana kuzorora; Asi njodzi inongosiuya.