Read Shona Union Version 2002 Jobho 30 Bible Online

Jobho 30 - Shona Union Version 2002 bible

Jobho 30

¹“Asi zvino vaduku kwandiri vanondiseka, Ivo vandaishovora kuisa madzibaba avo pambwa dzamapoka angu.

²Simba ramaoko avo ringandibatsireiko? Ivo vakapererwa nesimba kwazvo.

³Vaonda nokushaiwa nenzara; Vanotetena ivhu rakaoma murima ramatangwaza nokuparadzwa.

⁴Vanotanha zvinovava pamakwenzi; Midzi yomurara ndizvo zvokudya zvavo.

⁵Vanodzingwa pakati pavanhu; Vanovashoverera sembavha.

⁶Vanofanira kugara pamipata yakasviba, Pamakomba enyika namatombo.

⁷Vanorira pakati pamakwenzi; Vanounganira pasi porukato.

⁸Ndivo vana vamapenzi, zvirokwazvo vana vavanhu vakaipa; Vakadzingwa panyika vachirohwa.

⁹Zvino ndava chiimbo chavo, Ndava shumo yavo.

¹⁰Vanondisema, vanomira kure neni, Havaregi kupfira mate pachiso changu.

¹¹Nokuti iye akasunungura rukungiso rwake akanditambudza; Vakarasha tomu pamberi pangu.

¹²Vasina maturo vanosimuka kurudyi rwangu; Vanosundira makumbo angu, Vanozvigadzirira nzira dzavo kundiparadza.

¹³Vanoparadza nzira yangu, Vanowedzera njodzi yangu, Ivo vanhu vasina mubatsiri.

¹⁴Vanouya vakafanana navanopinda pakakoromoka pakuru; Vanomhanyira kwandiri pakati pamasvingo akakoromoka.

¹⁵Zvinotyisa zvandivinga, Vanodzinga kukudzwa kwangu semhepo; Kufara kwangu kwapfuura segore.

¹⁶Zvino mweya wangu wadururwa mukati mangu; Mazuva enjodzi andibata.

¹⁷Panguva yousiku mapfupa angu anoururwa mukati mangu, Uye zvinondibaya hazvizorori.

¹⁸Nesimba rake guru nguo yangu yachinyikara; Rinondisunga sehuro dzejasi rangu.

¹⁹Iye akandiwisira mumatope, Ndava seguruva nedota.

²⁰Ndinochema kwamuri, asi hamundidaviri; Ndimire, asi munongonditarira.

²¹Mashanduka hamune tsitsi neni; Munonditambudza nesimba roruoko rwenyu.

²²Munondisimudza nemhepo, munonditasvisa pamusoro payo; Munondinyangarisa mudutu remhepo.

²³Nokuti ndinoziva kuti muchandiisa kurufu, Nokuimba yakatarirwa vapenyu vose.

²⁴Ko munhu, anonyura, haangatambanudzi ruoko here; Pakutambudzika kwake haangaridzi mhere here?

²⁵Ko handina kuchema akanga ari panjodzi here? Mweya wangu wakanga usine shungu pamusoro powaishaiwa here?

²⁶Ndakati ndichitarira zvakanaka, zvakaipa zvikasvika, Ndakati ndichimirira chiedza, rima ndokusvika.

²⁷Hura hwangu hunovira, hauzorori; Mazuva okutambudzika andivinga.

²⁸Ndinochema ndisino mushana; Ndinosimuka pakati peungano, ndichichema kubatsirwa.

²⁹Ndava hama yamakava, Neshamwari yemhou shiri.

³⁰Ganda rangu rasviba, rinokwatuka kwandiri; Mapfupa angu atsva nokupisa.

³¹Naizvozvo mbira dzangu dzashanduka kuchema, Uye nyere yangu rava izwi ravanochema misodzi.”