Read Shona Union Version 2002 Jobho 31 Bible Online

Jobho 31 - Shona Union Version 2002 bible

Jobho 31

¹“Ndakaita sungano nameso angu; Zvino ndingatarira musikana seiko?

²Nokuti mugove waMwari unobva kumusoro ndoweiko, Nemhaka yowaMasimbaose inobva kudenga ndeyeiko?

³Ko haizi njodzi kuna vasina kururama here, Nokuparadzwa kuna vaiti vezvakaipa here?

⁴Ko iye haaoni nzira dzangu, Nokuverenga nhambwe dzangu dzose here?

⁵Kana ndichinge ndafamba nenzira isina maturo, Norutsoka rwangu rwamhanyira zvinonyengera;

⁶(Ngandiidzwe pachiyero chakarurama, Kuti Mwari azive kusanyengera kwangu;)

⁷Kana kutsika kwangu kuchinge kwatsauka panzira, Nomwoyo wangu ukatevera meso angu, Kana gwapa richinge ranamatira pamaoko angu;

⁸Ipapo ini ndidzvare hangu, asi mumwe ngaadye; Zvibereko zvomunda wangu ngazvidzurwe.

⁹Kana mwoyo wangu uchinge wanyengerwa nomukadzi, Kana ndavandira pamukova wowandaigara naye;

¹⁰Ipapo mukadzi wangu ngaakuyire mumwe, Navamwe ngavakotamire pamusoro pake.

¹¹Nokuti chinhu icho chivi chakashata, Zvirokwazvo, chinhu chakaipa chinofanira kurohwa navatongi.

¹²Nokuti ndiwo moto unopedza kusvikira pakuparadza, Ungadzura zvibereko zvangu zvose.

¹³Kana ndichinge ndazvidza mhaka yomuranda wangu kana murandakadzi wangu, Panguva yavakaita nharo neni;

¹⁴Ndichaiteiko kana Mwari akasimuka? Kana akandivinga, ndingapindurei kwaari?

¹⁵Akandiita mudumbu ramai haazi iye akamuitawo here? Ko haazi mumwe akatiumba isu tose mudumbu ramai here?

¹⁶Kana ndichinge ndanyima varombo zvavakakumbira, Kana kushaisa meso echirikadzi;

¹⁷Kana ndichinge ndadya chimedu changu ndiri ndoga, Nherera ikasadyawo;

¹⁸(Kwete, kubva paujaya hwangu yakakurira kwandiri ndikaita sababa vayo, Ndaiva muperekedzi wayo kubva padumbu ramai vangu;)

¹⁹Kana ndichinge ndaona munhu achiparara nokushaiwa nguo, Kana anoshaiwa asina chokufuka;

²⁰Kana chiuno chake chisina kundivonga, Kana asina kudziyirwa nemvere dzamakwai angu;

²¹Kana ndichinge ndasimudzira nherera ruoko rwangu, Nokuti ndakaona kuti ndichabatsirwa pasuo;

²²Ipapo fudzi rangu ngaribve pabendekete, Ruoko rwangu ngaruvhunike papfupa.

²³Nokuti njodzi inobva kuna Mwari yakandityisa, Ndakakoniwa kuita chinhu nokuda kwoumambo hwake.

²⁴Kana ndichinge ndavimba nendarama ikava tariro yangu, Ndikati kundarama yakaisvonaka, ‘Ndinovimba newe.’

²⁵Kana ndichinge ndakafara nokuti pfuma yangu yakanga yawanda, Uye nokuti ruoko rwangu rwakanga rwawana zvizhinji;

²⁶Kana ndichinge ndaona kubwinya kwezuva, Kana mwedzi uchifamba wakachena;

²⁷Mwoyo wangu ukanyengerwa pakavanda, Muromo wangu ukatsvoda ruoko rwangu;

²⁸Nechinhu ichowo chaiva chaipa chinofanira kurohwa navatongi; Nokuti ndinenge ndaramba Mwari ari kumusoro.

²⁹Kana ndichinge ndafarira kuparadzwa kwomuvengi wangu, Kana kuzvikudza panguva yaakavingwa nezvakaipa;

³⁰(Zvirokwazvo handina kutendera muromo wangu kutadza, Ndichikumbira nokupanjira kuti afe;)

³¹Kana vanhu vetende rangu vasina kutaura, vachiti, ‘Ndianiko angawana munhu usina kugutiswa nenyama yake?’

³²Mweni haana kuvata husiku panzira dzomumusha; Asi ndaizarurira mufambi mikova yangu;

³³dai ndaifukidza kudarika kwangu saAdhama, Ndichivanza zvakaipa zvangu pachipfuva changu;

³⁴Zvandaitya vanhu vazhinji, Ndikavhunduswa nokushorwa namapoka avanhu, Ndikanyarara, ndikasabuda pamukova,

³⁵Haiwa, dai ndaiva nomunhu anondinzwa! (Tarirai, ndirwo runyoro rwangu, waMasimbaose ngaandipindure;) dai ndaiva norugwaro rwakanyorwa nomudzivisi wangu!

³⁶Zvirokwazvo, ndairutakura pafudzi rangu; Ndairudzika pamusoro wangu sekorona.

³⁷Ndaimududzira kuwanda kwenhambwe dzangu; Ndaiswedera kwaari somuchinda.

³⁸Kana munda wangu ukadanidzira kwandiri, uchindipa mhosva, Nemihoronga yawo ikachema yose;

³⁹Kana ndichinge ndadya zvibereko zvawo ndisina kutenga, Kana ndichinge ndarashisa varidzi vawo upenyu hwavo;

⁴⁰Ipapo hutumbambeva ngahumerepo panzvimbo yezviyo, Nesora panzvimbo yebhari.” Mashoko aJobho apera.